කොළඹ විශ්ව විද්‍යාලයීය පළමු වසර සිසුහු පසු ගිය 2013-11-07 වන බ්‍රහස්පතින්දා දින සාර්ථක ලෙස ‘වාණි උත්සවය ‘ පැවත් වූහ.එදින සන්ධ්‍යාවේ  ප.ව.3.30 ට V.K. සමරනායක ශාලාවේ දී සුබ මොහොතින්  ආරම්භකළ උත්සවයට ආරාධිත අමුත්තෝ ,සහායකවරු සහ සිසුහු බොහෝ දෙනෙක් සහභාගී වූහ. මෙය ද්‍රවිඩ ජාතිකයෝ අධ්‍යාපනය ,කලාව,විද්‍යාව තේමා කරගෙන වාර්ෂිකව පවත්වන ආගමික පසුබිමක් සහිත උත්සවයකි.දෙමළ/සිංහල මාස ක්‍රමයට අනුව  පුරට්ටාදී/බිනර මස යෙදෙන නවරාත්‍රි කාල සීමාව තුළ නිවෙස්වල,පාසල්වල හෝ වැඩ කරන ස්ථානවල මෙම ආගමික උත්සවය පවත්වනු ලැබේ. වාණි යනු සකල කලා අධිපතිනී සරස්වතී දේවියට කියන නමකි. මෙමගින් දරුවන්ට, ඉගෙන ගන්නා ළමුන්ට,වැඩ කරන ජනතාවට ආශීර්වාද ලැබෙන බව පිළි ගනී.

පළමු වසර දෙමළ සිසුන් මූලිකව සංවිධානය කළ මෙම මහෝත්සවය විශ්ව විද්‍යාලයේ සිසුන්ගේ අන්තර් සබැඳියාව හා අන්‍යොන්‍ය අවබෝධය මොනවට විදහා පෑවේය.උත්සවය පුරාවට නර්තනාංග ,උත්සවය පිළිබඳ හැඳින්වීමක් ඇතුළුව විචිත්‍රාංග ගණනාවක් අන්තර්ගත විය.මෙහිදී ජාතීන්ගේ එකමුතුව හුවා දක්වමින් සිංහල ,හින්දු  විවිධ නැටුම්,ගැයුම් සහ සංගීත  අංග ද අන්තර්ගත විය. පුරා දෙහෝරාවක් පමණ සටහන් වුණු වාණි උත්සවය තුළින් ආගම් වලට ගරු කළ යුතු ය යන වටිනා පණිවිඩය ලබා දුනි.