නිල් අහසේ පියාසලන යෝධ Airbus A380

Share

ලොව වඩාත් ම ආරක්ෂාකාරි ප්‍රවාහන මාධ්‍යය කුමක් දැයි කියා කෙනෙකුගෙන් ඇසුවහොත් විවිධාකාර පිළිතුරු දෙනු ඇති වුව ද සත්‍ය පිළිතුර වන්නේ ඔබ සමහර විට දී බිය වන ගුවන් ගමනයි. එසේ ගුවනින් මගී ප්‍රවාහනයේ යෙදෙන යානා අතරින් ලොව විශාලතම මගී ගුවන් යානය වන්නේ  ‘එයාර්බස්’ ආයතනය නිපද වූ පුළුල් බඳ ගුවන් යානාවක් වන A380 යානයයි.

එවකට ලොව විශාලතම ගුවන් යානය වූ, ඇමරිකානු බෝයින් සමාගමේ 747 යානයට අභියෝගයක් එල්ලකිරීම සඳහා, යුරෝපීය නිෂ්පාදකයන් විසින් 1990 දී අරඹා , 2005 අප්‍රේල් මස 27 වැනි දා අධ්‍යයනය අවසන් කළේ ප්‍රංශයෙන් පළමු ගුවන් ගත වීම ද සිදු කරමිනි. එසේ ගුවන් ගත වුව ද පළමු වාණිජ ගුවන් ගමන සිදු කෙරුනේ මෙහි පළමු පාරිභොගිකයා වන සිංගප්පූරු ගුවන් සේවය මගින් තවත් වසර දෙකකට පසු එනම් 2007 ඔක්තොම්බර් 25 සිංගප්පුරුවේ සිට සිඩ්නි දක්වා සිදු කළ ගමන් වාරයකිනි. එලෙසින් තම ගමන් මාර්ගය ආරම්භ කළ මෙකී යානය , වත්මන වන විට 400,000 කට ආසන්න ගුවන් ගමන් සිදු කර ඇති අතර මගීන් මිලියන 170 කට ආසන්න පිරිසක් ප්‍රවාහනය කර ඇත. ඒ අනුව සෑම මිනිත්තු 2 කට වරක් ම මේ වර්ගයේ ගුවන් යානයක් ගුවන් ගත වීමට තරම් ජනප්‍රිය වී ඇත. ලොව පුරා වාණිජ ගුවන් ගමන් 300 ක් කෙරෙහි A380 දායකත්වය අද වන විට ලබා දෙනු ලබයි. එනමුත් මෙම වර්ගයේ යානාවක් ප්‍රථම වරට කාල සටහනකට අනුව ලංකාවට පැමිණියේ මෑතකදී වීම විශේෂත්වයකි.

එසේ වීමට මූලික හේතුව කටුනායක ගුවන්තොටුපල A380 මෙහෙයුම් සිදු කිරීමට අවශ්‍ය මූලික පහසුකම් සපුරාගැනීම ප්‍රමාද වීමයි. මේ වන විට A380 සඳහා අවම මට්ටමේ පහසුකම් සැපයීමට හැකි වුවත් දිනපතා A380 මෙහෙයුම් සිදු කිරීමට තරම් අප ප්‍රධාන ගුවන් තොටුපල සංවර්ධනය වී නැහැ. එසේ නමුත් මත්තල ජාත්‍යන්තර ගුවන්තොටුපල කිසිදු අවහිරයකින් තොරව A380 යානා හැසිරවීමට අවශ්‍ය පහසුකම් වලින් සමන්විතය.

සම්පූර්ණ දිග මීටර 72.72 වන මෙම යානයේ තටු අතර පළල මීටර 79.75 තරම් විශාල අගයකි. මීටර 24.09 ක උසක් හිමි මෙම යානය මහල් දෙකකින් යුක්ත ය. මගීන් 544 ක් සමඟින් උපරිම බර ටොන් 63.04 ගෙන යාමට සමත් මෙම යානය , කිලෝමීටර 15,200 ක පියසැරි පරාසයක් හිමි ය. GP 7200 සහ RR Trent 900 යන එන්ජින් මාදිලි දෙකකින් පාරිභොගිකයන්ට ලබා ගැනීමට අවස්ථාව ලබාදී ඇති අතර එක් ගුවන් යානයකට එන්ජින් 4කින් බලය සැපයේ. මෙකී එන්ජින් මගින් කිලෝ නිව්ටන් 311 තෙරපුමක් ලබා දෙමින් මැක් 0.96 ක උපරිම වේගයක් ලබා දෙයි.

එලෙසින් ම මෙම යානයේ සැකැස්ම තුළින් ද ගුවන් යානා තාක්ෂණයේ නවමු පැතිකඩක් විවර කර ඇත. යම් හෙයකින් මෙම යානය තනි ලෝහයෙන් නිර්මාණය කළේ නම් යානයේ වත්මන් බරට වඩා ටොන් 15 ක බරක් එක් වනු ඇත. යානයේ විශාල කොටසක් Glare TM නම් විශේෂිත තීරුවලින් නිමවා ඇති අතර යානයේ වර්ග මීටර 4400 මුලු වපසරියට ම භාවිත කර ඇත්තේ කිලෝග්‍රෑම් 500 කට ආසන්න තීන්ත තීරු තුනකි. මෙකී සැහැල්ලු බව නිසා යානයෙන් සිදු වන පරිසර හානිය අවම වී ඇති අතර එක් මගී කිලෝමීටර දුරක් සදහා වැය වන්නේ ඉන්ධන ග්‍රෑම් 75 තරම් සුළු ප්‍රමාණයකි. එලෙසින් ම මෙම යානය තුළ සම්පූර්ණ වශයෙන් ස්වාධීන ද්‍රව පීඩන බලයෙන් ක්‍රියත්මක විදුලි බල පද්ධතියක් ද පවතී. එසේම යානා නියමුවරුන්ගේ පහසුව සඳහා ‘ඉලෙක්ට්‍රොනික පුස්තකාලය’ නම් සටහන් රඳවා ගන්නා නව විශේෂාංගයක් හදුන්වා දී ඇත. මගී පහසුව උදෙසා ද මෙම යානය විශේෂ අවධානයක් යොමු කර ඇත. මීටර 49.9 ක දිගකින් යුතු කැබින් කාමර ද මීටර 6.5ක පළලකින් කින් යුතු ප්‍රදාන කැබින් කාමරයකින් ද මීටර 5.8 ක පළලක් ඇති ඉහළ කැබින් කාමරයකින් ද යානාව සමන්විත වේ. විශේෂ ආසන සකස් කිරීමක් හරහා මගීන්ට පුළුල් ඉඩකඩක් ලබා දෙන යානාවේ උෂ්ණත්වය අංශක 18 ත් 30 ත් අතරත් රඳවා පවත්වා ගනී. සෑම මිනිත්තු 2 කට වරක් යානවේ වාතය අලුත් කිරීම හරහා නැවුම් වාතය මගීන්ට ලබා ගැනීමේ පහසුකම සපයා ඇත.

මෙකී සුපිරි පහසුකම් සපිරි ගුවන් යානා විශේෂයට අයත් යනාවන් 125 ක් මේ වන විට අනතුරු වලට මුහුණ පා ඇති මුත් ඉතා දරුණු ගණයේ අනතුරුවලට ලක් වී නො මැති හෙයින් වඩා ආරක්ෂාකාරී යානාවක් ලෙස මෙය ගැනිය හැකි වේ.
දැනට A380-800 මාදිලිය පමණක් පවතින අතර මෙම වසරේ දී  A380 plus නම් නව මාදිලියක් මෙම යානාවන් අතරට එක් වීමට නියමිත ය. එලෙසින් තව කාලයක් නිල් අහසේ රජ කිරිම යානා නිෂ්පාදකයන්ගේ අරමුණ වී ඇත.

Sources:

  1. http://www.airliners.net/forum/viewtopic.php?t=123437
  2. https://www.aeroinside.com/incidents/type/a388/airbus-a-380-800
  3. http://www.modernairliners.com/airbus-a380/airbus-a380_history/
  4. http://www.aircraft.airbus.com/aircraftfamilies/passengeraircraft/a380family/commonality/
 
Tagged :