මෙවර වෙසක් පොහොය නිමිති කරගෙන මහා සංඝරත්නය සිය නමක් උදෙසා මහා දානමය පිං කමක් කොළඹ විශ්වවිද්‍යාලයීය විද්‍යා පීඨ දෙවන වසර ශිෂ්‍ය ශිෂ්‍යාවන් විසින් පසුගිය මැයි 8 වනදා පවත්වන ලදී.
මෙම දානමය පිංකම සඳහා අදහස ඇති වූ පසු ව එය ක්‍රියාවට නංවනු වස් අප සහෝදර ශිෂ්‍ය ශිෂ්‍යාවන් ඉතා කැපවීමෙන් කටයුතු කරන ලදී. ප්‍රථමයෙන් විශ්වවිද්‍යාලයෙන් අවශ්‍ය අවසර ලබා ගැනීමේ කටයුතු, මහා සංඝරත්නයට ආරාධනා කිරීම ආදි කටයුතු කඩිනමින් සිදු කරන ලදී. දානමය පිංකමට අවැසි මුදල් ප්‍රතිපාදන දෙවන වසර ශිෂ්‍ය ප්‍රජාවගේ නො මසුරු දායකත්වය මත සම්පූර්ණ කෙරුණු අතර පිංකමට අවශ්‍ය සියලු අනෙකුත් කටයුතු ක්‍රමයෙන් සම්පූර්ණ කෙරිණ.
එසේම දානයට පෙර දින ඒ සඳහා තාවකාලික මඩු ඉදිකිරීම, සැරසිලි කටයුතු දෙවන වසර ශිෂ්‍ය ශිෂ්‍යාවන් විශාල පිරිසකගේ සහයෝගයෙන් සූදානම් කෙරිණි.
මැයි 8 පින්බර දිනයට හිරු උදාවු මොහොතේ සිට සුදුවතින් සැරසී සිටි සියලු ශිෂ්‍ය ශිෂ්‍යාවෝ මෙම මහඟු පුණ්‍යකර්මය සඳහා ලහිලහියේ සූදානම් වූහ. ආහාරපාන, පළතුරු, කැවිලි පෙවිලි, දැහැත් හා අටපිරිකර ආදිය නිල් කලාපයේ සූදානම් වන අයුරු දැකීම පවා පහන් සිතුවිලි වඩවනසුලු වේ. එලෙස ම ප්‍රථම වසර සහෝදර ශිෂ්‍ය ප්‍රජාව විසින් සාදන ලද ධවල වර්ණැති වෙසක් කූඩු පීඨය පුරා එල්ලා තිබීමෙන් ද සැරසිලි සඳහා තවත් විචිත්‍රත්වයක් එකතු වූ බව ද සඳහන් කළ යුතු ය.
හේවිසි වාදනය හා කරඬුව පෙරමුණු කරගෙන මල් වැල් වියන යටින් මහා සංඝරත්නය පීඨයට වැඩම වූ පසු දානය පිළිගැන්වීමේ කටයුතු සියල්ල මනා ලෙස සියලු දෙවන වසර ශිෂ්‍ය ශිෂ්‍යාවන් ගේ එකමුතුවෙන් සිදු කරන ලදී.
මෙම මහා පුණ්‍ය කර්මයෙන් සියලු දෙනාගේ සිත් නිවී සැනසේවා! විද්‍යා පීඨයට සෙත සැලසේවා! යන්න අපගේ පැතුම බව විශේෂයෙන් ම සඳහන් කළ යුතු ය.
දැල්වූ පහනෙන් කොතෙක් පහන් දැල්වුව ද පහන් තුඩ තෙල් ගෑවී ශෝභාව බලවත් වන්නා සේ සිදු කරන ලද මහා පුණ්‍ය කර්මයේ පින් මහිමය විද්‍යා පීඨයේ සියලු දෙනාටම ලැබේවා!
ඡායාරූප සඳහා අනුග්‍රහය: