නංගියේ, මල්ලියේ…

Hasanthi 3 Comments

අලුත් මුහුණු පෙළක් විශ්වවිද්‍යාල පරිශ්‍රයට ඇතුළු වෙලා.
කාලය කොයි තරම් වේගයෙන් අපි ව පහු කරන් ගිහින් ද? අපි හිතන්නත් කලියෙන් “එකේ උන්නු අපි දැන් දෙකේ” වෙලා!!!
ඉතිං හීනියට ආඩම්බරය තැවරිච්ච ලොකු සතුටක් අපේ සිනහවේ නැතුවා කියන්න බැහැනෙ. මේ ලැබූ වැඩිහිටි පදවියත් එක්ක ම, ඔය බලාපොරොත්තු පොදි බැඳ ගත්තු නවක මුහුණු දකින කොට මතකාවර්ජනයක් නිතැතින් ම ඇති වෙනවා.
මටත් මතකයි එදා හීන පොදියක් අරන් කොළඹ විශ්වවිද්‍යාලයට මා තැබූ ඒ තෘතීය අධ්‍යාපනයේ පළමු සහ හොඳ ම පියවර. එදා වාතලය හරිම උණුසුම් කියලයි මට දැනුනෙ. ලොකු නුහුරු බවක්, පුංචි තැතිගැන්මක් එක්කම ජීවිතයේ අලුත් කඩඉමක් විදියටයි ඒ දවස මට මතක. සත්තයි එදා ඔබටත් ඔබේ ජීවිතයේ අලුත් ම මුල පිරීමක් ලෙසින් දැනෙන්න ට ඇති. එදා ඉඳන් අද වෙන කොට පුරා වසරක් ම ගෙවිලා ගිහින්. ජීවිතයට විශ්වවිද්‍යාල පරිසරයෙන් ලැබුනු අත්දැකීම් මෙතෙකැයි කියා වෙබ් පිටුවකට කොහොම සාරාංශ කර රචනා කරන්න ද හිතා ගන්නත් බැරි තරම්. ඒ තරම් ම මේ සරසවි පියස, ඔබ දැනුමෙන් සන්නද්ධ කරාවි, අත්දැකීමෙන් පොහොසත් කරාවි, ඔබ මෙතෙක් ඔබ සතු යැයි හඳුනා නොගත් දක්ෂතා ඉස්මතු කරාවි, ඔබේ ජීවිතයට බොහෝ දෑ එක්කාසු කරාවි.

freshers-2017-2

පොත පතින් එහා ගිය සමාජ වටිනාකම්, ජ්‍යේෂ්ඨත්වය, ගරුත්වය, එකිනෙකා පිළිබඳ හැඟීම සහෝදරත්වය, ආදරය, සෙනෙහස මෙකී නොකී බොහෝ  දෑ මේ පරිශ්‍රය ඔබට සමීප කරාවි. දායාද කරාවි. ඔබ මේ පියසට සෙවණ සොයා පැමිණෙන කොට විශ්වවිද්‍යාලය කෙසේවත් ඔබේ මුදල් තරාතිරමින්, ඔබේ බල පුළුවන්කාරකමින් ඔබ ව ඉස්මතු නොකරාවි, ඔබ ව කොන් නොකරාවි. කුමන සමාජ පසුබිමකින් ඔබ පැමිණ අපේ සහෝදර බැම්මට එකතු වනවා ද යන්න කිසිම ගැටලුවක් නැහැ. ඔබට සහෝදරත්වයේ ,මිත්‍රත්වයේ ගුණ සුවඳ වෑහෙන හදවතක්, වැරදි දෙයින් නිවැරදි දෙය හඳුනාගන්නට තරම් බුද්ධි මහිමයක් පවතින තුරු ඔබ තනි වන්න හැදුවත් මේ බිම කිසි දා ඔබ ව තනි නොකරාවි. ඔබ වැටෙන්නේ කොතන ද සවිය ඔබ සොයා ඒවි. එයයි ගෙවුණු වසරේ, මා ගෙවූ විශ්වවිද්‍යාල දිවියේ සොඳුරු ම අව්‍යාජ මතකය “සහෝදරත්වය”.

ඉතිං නංගියේ, මල්ලියේ , මේ ඇරඹෙන්නේ ඔබේ ජීවිතයේ සුන්දර ම කාලයයි. සමහර වෙලාවට මේ දැනුත් ඔබ ප්‍රසිද්ධ ඉංජිනේරු සිහිනයේ නැතිනම් වෛද්‍ය සිහිනයේ කල් මරනවා වන්නට පුලුවන්. ඇස් අරින්න, ලෝකය දිහා බලන්න. අපි නොදුටු දෑ බොහෝමයි, හඳුනා නොගත් අවස්ථා බොහෝමයි. ඔබ තවමත් විශිෂ්ටයෙක්. අතරමං වුණ සිහිනයෙන් ඇහැරිලා ඔය ඉහ ඉද්දර ඇති අවස්ථාවෙන් ඵල නෙළන්නට ඔබ තවමත් ප්‍රමාද නැහැ. අවශ්‍යය ඔබ සතු වුවමනාවයි, කැපවීමයි, ධෛර්යයයි.

අහස් දිය නැති ව දේදුන්නක් බලා පොරොත්තු වන්න අපහසුයි සේම අභියෝග නැති ගමනකුත් නැහැ. පෙළින් පෙළට අභියෝග පැමිණේවි, ඒ ඔබ ව තව තවත් ශක්තමත් කරන්නයි. සහෝදරත්වය විටක ඔබට අසීමාන්තික ශක්තියක්, සෙනෙහසක්, දෙ හදක් එකතු වන ආදරයක්, නැති නම් ඔබ ව වැරදි මඟ යවන පිළිලයක් වුව ද විය හැකිය. දිරියෙන්, නුවණින් මුහුණ දෙන්න. සාක්කිකාරයන් දස දහස් ගණනින් වුව ද සාක්ෂි දරාවි, ඔබ සූදානම් නම්, මේ බිම ඔබ ව විශිෂ්ටයන්ගෙනුත් විශිෂ්ටයකු කරන බවට.

අහිංසක අම්මා, තාත්තා, සහෝදර සහෝදරියන්, දහසක් බලාරොත්තු පිරි සතුටු කඳුළු වෑහන දෙනෙතින් ඔබට ආශිර්වාද කරන්නට ඇති. ඒ හිත් දුකින් නොබිඳෙන, ඒ ඇස් සෝ කඳුළෙන් නොතෙමෙන, ලස්සන අනාගතයකට, අපේ සහෝදර බැම්මෙන් උණුසුම් සුභ පැතුම්!

freshers-2017-3

 
  • Gayan Akmeemana

    අවුරුදු තුනකට කලින් මම ආපු දවසත් අද වගේ මතකයි මට

    • Shalitha M.Amarasinghe

      Good luck nanga .I walked into my past after reading your article .those days were amazing .

  • Swaranga Jayasanka

    Still remember the day.. එදා gate එක ලග ඉදන් kg එක ලගට කොච්චර දුර දැනුනද….