දයාබර නංගීට…

Share

දයාබර නංගීට,

ඔබ විශ්වවිද්‍යාලට තේරීපත්වූ බව දැනගත් දා සිට කියන්නට බොහොමයක් දේ තිබුනද, ඒ සියල්ල කුමන ආකාරකින් ඔබට කියන්නටද කියා මට පැහැදිලි අවබෝධයක් නොතිබුණු නිසා මෙතෙක් කල් නිහඬව සිටියෙමි. නංගී.. අපි දෙදෙනා සයුරු හතකින් වෙන්වී සිටියත් එදාමෙන් අදටත් අපි ඉතාමත්ම සෙනෙහෙබර අය වෙමු. කියන්නට ඇති සියල්ල මට දුරකථනය හරහා පහසුවෙන් කියන්නට හැකි වුවත්, මට කියන්නට ඕනෑකර තිබු සියල්ල මෙම ලියමනෙන් මම ලියා එවමි. ඒ මගේ අත් අකුරු මගේ කැඩපත නිසාවෙනි.

ඔබත් මමත් කිසිදා නොදුටු, එහෙත් අම්මා හා අපපච්චී පමණක් දුටු ආදරණීය අක්කාගේ සදාකාලික සමුගැනීම සමඟින් මම නිතරඟයෙන්ම පවුලේ ”ලොකු දුව” වීමි. ඉතාමත්ම අපහසු එහෙත් අනිවාරයෙන් ඉටුකළ යුතු ”ලොකු දුව” නම් වූ රාජකාරියේ අපහසුම අවධියට පැමිණ සිටිමි. ඒ අප පවුලෙන් පිටත වූ සමාජය පිළිබඳ කිසිවක් නොදත් ඔබ, මුල් වරට එහි යනවිට දකින සමාජය නම් අපැහැදිලි බොඳ සිතුවම නිසා ඔබ වෙහෙසට පත්වීමේ අවදානමෙන් මා ඔබ ගලවා ගතයුතු නිසා.

ඉදිරියට පැමිණෙන අවුරුදු කීපයක කාලයෙදී ඔබ එකම වේදිකාවක එකම මොහොතක චරිත කීපයක් නිරුපණය කළ යුතුයි. ඒ සිසුවියකගේ චරිතය, දියණියකගේ චරිතය, මිතුරියකගේ චරිතය හා ඇතැම්විට පෙම්වතියකගේ චරිතය ය. මම ඒ චරිත සියල්ල පසුගිය අවුරුදු කිපයෙදී නිරුපණය නොකල ද, කල ද මා අසා ඇති කතන්දර අනුව මා යමක් ඔබට ලියා එවන්නම්.

නංගී ඔබ පාසල් ඉගෙනීම් කටයුතු ආරම්භ කළ දා පටන් අද දක්වා කිසි දිනක මම ඔබට පාඩම් කරන්නට කියා බලකර නැත්තෙමි.ඒ ඉරිසියාවක් නිසා හෝ වෙනයම් අහිතවත් සිතිවිල්ලක් නිසා හෝ නෙවෙයි. ඒ ඔබට ගැළපෙන ඉගෙනුම් මාවත ඔබ විසින් ම අවබෝධ කරගත යුතු නිසා. රුපය, ධනය, බලය ආදී වූ භෞතික සම්පත් සියල්ලට වඩා, ඉගෙනීම වැදගත් බව ඔබ විසින් ම තේරුම් ගතයුතු නිසා. ඔබේ කැමති අකමැති අනුව ඔබ විෂයන් තෝරා ගතයුතු නිසා. ඒ විෂය හදාරන්නේ ඔබ නිසා. ඔබේ ජිවිතයේ අයිතිය ඔබ සතු නිසා.

එහෙත්,

ඉගෙනීමෙන් පුද්ගලයෙක් ලබන සතුට පිළිබඳව මා ඔබට නිරන්තරයෙන් කියාදී ඇත. ආත්ම අභිමානය පිළිබඳ මා ඔබට කියාදී ඇත. හැකි අයුරින් සහය දී ඇත. නමුත් ඒ සතුට ළඟා කරගැනීමට වෙහෙසීම හුදෙක් ඔබගේ වගකීමකි.

හෙට දින ඔබ විශ්වවිද්‍යාලට ඇතුළත් වේවි. මා අද දින ඔබට කියන්නේද විශ්වවිද්‍යාල අධ්‍යාපනය අවසානයෙදී ඔබ ඉහළ සාමාර්ථ ලබාගනී නම් එය ඔබගේම සතුටට කරුණක් වනබව පමණි. ඒ තුළින් ඔබගේ ආත්ම අභිමානය ගොඩනැගෙන බව පමණි. කෙටියෙන් කීවොත් එය ඔබගේ අනාගතයේ ස්ථාවර බව තීරණය කරන එකම සාධකය වෙයි. එනිසා වෙහස වී ඉගෙනීම ඔබගේ කැමැත්ත විය යුතුයි. නමුත් ඔබ හදාරන විෂයන් ඔබම තෝරා ගන්න කිසිදා මා නොවන්න. ඔබ ඔබම වන්න. ආදර නංගි සිසුවියගේ චරිතය සාර්ථකව නිරූපණය කරන්න.

දෙවන සහ වඩාත්ම වැදගත් චරිතය දියණියගේ චරිතය.

මම මගේ රැකියා කටයුතු සඳහා මේ රට බලා මගේ රට අත් හැර එන විට දළදා වහන්සේට පමණක් දෙවැනි අප්පච්චීත්, ඒ හා සම අම්මාත් ඔබට බාර කළ බව මට මතක ඇති ලෙසින්ම ඔබටද මතක ඇති බව මට සිතෙයි. ඔබ නිවසින් පිටවී කොළඹ එනවිට ඔවුන් දෙදෙනා පමණක් නිවසේ තනිවනු ඇත.
අම්මා ඒ වෙන්වීම මැදහත් සිතින් දරාගන්නී, නමුත් අප්පච්චී, දූවරු පෙනන්නට නැති නිසා ඒ ගැන සිතා දුක් වේවි. ඒ නිසා ඔබ අවස්ථාව ලද හැම විටම ඒ දෙදෙනා දකින්නට යන්න. ගෙදරින් පිටවූ විට ලැබෙන අසිමිත නිදහස ඉදිරියේ ඔවුන් අමතක වේවි. එයට ඉඩ ලබා නොදෙන්න. ඇවිදින්නට කියදී කතාකරන්නට කියාදී සිරිත් විරිත් උගන්වා උසමහත් කර ඔබ ඇති දැඩි කළ ඒ අය අමතක කිරිම සුදුසු නොවෙයි.

දෙමාපිය සිත් රිදවා ඔබටත් මටත් කිසිදා සතුටුවිය නොහැක. මා යළිත් එනතුරු මගේ දෙඇස්, එදා මෙන්ම අදටත් හෙටටත් ඔබට බාරයි. ඔවුන් ඔබගේ උත්තරීතර යුතුකමයි. ඔබ ඔවුන්ගේ සිත් අසාධාරන ලෙස රිදවූ බවක් මට නොදන්වන්න. එවන් යමක් දැනගත් දා මා ඔබ අත් හරිමි.

මම කිසිදාකත් ජාති ජන්ම ගැන සිතා යමෙක් අගය කරන්නියක නොවෙමි. එහෙත් අප්පච්චී සහ අත්තා රැකගෙන ආ සිරිත් විරිත් රැකගැනීම ඔබගේත් මගේත් යුතුකමක් කියා පමණක් ඔබට කියමි. ඒ අප ඔවුන්ගේ සිත් නොරිදවිය යුතුයි කියා මා සිතු නිසාවෙන් සහ සිතන නිසාවෙනි. නමුත් අනාගතය කවර ලෙසකින් විසඳේද කියා මා සතු අදහස් නොමැත. නමුත් අපි එය සිහියේ තබාගනිමු.

මම මගේ රටට එනතුරු දියණියගේ චරිතය නිරූපණය කරන්න හැකි උපරිමයෙන්.

තෙවෙනි සහ සිත් ගන්නා චරිතය මිතුරියගේ චරිතය.

මිතුරියක වීම ඉතාමත් පහසුයි. නමුත් සැබෑ මිතුරියක වීම ඉතාමත්ම අපහසුයි. එනිසා මිතුරියක වන්නට පෙර නිහතමානී වන්න, අන් අදහස් වලට ගරුකරන්නියක වන්න, උපරිමයෙන් සමාජයට සළකන්න. නමුත් පෙරළා සැළකුම් හෝ ස්තුතියක් හෝ කිසිසේත් බලාපොරොත්තු නොවන්න. ඔබ කරුණාවන්ත අයෙක් , ඉවසිලිවන්ත අයෙක් වන්න.

මිතුරියක වීමේ පළමු පියවර ඔබේ සිනහව, ඔබේ සිත ලොවට පෙන්වන වටිනාම ආභරණය. සිනාසෙන්න සියලුදෙනා සමඟ. පෙරලා ඔවුන් ඔබ සමඟ සිනාසෙවී.
දෙවැන්න ඔබේ කතාව.ඔබ සමඟ සිනාසෙන අයවේද ඔවුන් හා සුහදශීලී වන්න.ඔවුන් ද සුහදශීලී වෙවී ඔබ සමඟ.
තෙවන්න ඔබේ සවනින් ඔබට ඇසෙන ඔවුන්ගේ පුංචි හැඬුමක හඬ හඳුනා ගන්න. ඔබේ දෑසින් සැඟවුණු කඳුලු දැකගන්න. ඔබ දකිවී ඔවුන් ලෝකයට හොරා හඬන උන් බව. ඔබේ දෑතින් ඒ කඳුළු පිසදමන්න. එහෙත් පෙරළා ඒ කිසිවෙකුගෙන් ස්තූතියක් බලාපොරොත්තු නොවන්න. නමුත් ඔබ සතුටු වන්න.

එයයි ජීවිතය.

ඔබ මිතුරියක වන්නට පෙර උසුළු විසිළු කිරීමේ කලාව, මනාව උගත යුතුයි. උසුළු විසුළු විඳීමේ කලාවද මනාසේ හැදෑරිය යුතුයි. උසුළු විසුළු නොදත් අයෙක් කිසිදා කිසිවකුගේ මිතුරියක නොවනු ඇත. එනිසා ඉවසීමත් සිනහවත් ජිවිතයට ළගා කරගන්න. එහෙත් උසුළු විසුළු මැද ජිවත් වන සැබෑ ඔබ , ඔබවම අමතක නොකරන්න.

ආද‍ර නංගී, සමකාලීනයන්ට, ජ්‍යෙෂ්ඨයන්ට සහ නවකයින්ට ආද‍රබර මිතුරියක වී, සොයුරන්ට මෙන්ම සොයුරියන්ට ද දයාබර මිතුරියක වී ඔබේ චරිතය නිරූපණ කරන්න.

අවසාන සහ අවිනිශ්චිත චරිතය, පෙම්වතියගේ චරිතය.

ආදර නංගී ඔබ පෙම්වතියක වේද නොවේද එය කෙලෙසක අවසන්වේ ද මම නො දනිමි. නමුත් ඔබ විශ්වවිද්‍යාලයේ ජිවත් වන අවුරුදු හතරක කාලයේදී එක් අයෙකුට හෝ සෙනෙහබර වේවි. එය නවත්වන්නට අපහසු වේවි. නමුත් ඔබට මම යමක් කියමි.

පළමුව …..

ඔබ පෙම්වතියක් වේ නම්, අවබෝධ කරන්න ” ඔහු” නම් වූ චරිතය. අවංක වන්න ඔබ ඔහුට. සැපේ දී සේම දුකේ දී ද අත නො හරින්න. ඔහුගේ නිදහස ලබාදෙන්න ඔහුට. නමුත් නංගී විමසිලිවත් වන්න.

සැකය අත්හරින්න . මක්නිසාද සැකය ඔබේ සතුට ගිල දමන නිසා. ඔබ දකිනා සියල්ල තුළ නොදකිනා කතන්දර බොහොමයකි. ඒවා කියවන්න. සියල්ල දැනගන්න.

මතක තබාගන්න ඔහු “පළමුවැන්නා” බවත්. ඔබ ”දෙවැන්නා” බවත්. ඔබ පළමුවැන්නා වීමට උත්සාහ දරයි නම්, ඒ ආදර සම්බන්ධතාවට වැඩි ආයුෂ නොවනු ඇත. ඔබ ”සමතැන” නොව ”නිසිතැන” ලබාගන්න.

තවද ……..

ඔබට යමෙක් ගෙන එන පෙම් ඇරයුමට ඔබ එකඟ වීමට පෙර දහස් වරක් සිතන්න. ඔබට කිසිදා කිසිවෙකුගේ සිතක් රිදවීමට ස්වභාවධර්මයෙන් අවසර නැත. මන්දයත් ඔහු කවුරුන් හෝ මවකගේ පුතෙක් . නැගණියකගේ අයියා කෙනෙක් . අක්කකෙනෙකුට  මල්ලීකෙනෙක්. කෙටියෙන් කිවොත් ඔබ මෙන්ම ජීවිතයක්. එනිසා නංගී, සිතක් රිදවන්නට ඔබට අයිතියක් නැත. එනිසා දහස්වරක් සිතා බලන්න.

දෙවෙනුව …..

දෑත් දෙපා සවිමත්, අඩුයයි කියන්නට නොහැකි රුපයක්, උගත්කමක්, බුද්ධිමත්බවක්, යම් ධනයක් උපතින්ම හිමි ඔබ කිසිදා ආදරය පතා පුරුෂයෙක් පසුපස හඬමින් යා යුතුද ? පුරුෂයෙක් ඔබට ආලවන්ත වී ඔබ සොයයි නම් සමාජය ඔහු වීරයෙක් කියා කියා වී. නමුත් ඔබ ආදරය පතා පුරුෂයෙක් වෙනුවෙන් කැපවේනම්, ඔහු හා මුලු සමාජයම ඔබට සිනාසේවි.

දිනක් මම මගේ මිතුරෙකුගෙන් ඇසුවා ” පෙම් යෝජනාව ඔබගෙන් ද අයගෙන් ද ” කියා. ඔහු මට කිව්ව ” ඇය යෝජනාවක් ගෙන ආවනම් එදිනම ඇය මගෙන් ප්‍රතික්ෂේප වනු ඇත ” කියා.

ඔබගේ යම් අයෙකුට ඇති කැමැත්ත සිතේ දරාසිටීම අපහසු වේවි. එහෙත් ඔබ සහ මම ගැහැණුන් වී මේ රටේ ඉපිද සිටිමු.

ආත්ම ගෞරවය සියල්ලට වඩා වටී. එනිසා ඔබ විසින් ඔබ පාලනය කරගත යුතුයි. මන්දයත් අම්මාත් අප්පච්චිත් ඔබ සහ මා දැඩි කරන්නට ඇත්තේ අප සමාජයෙන් සිනහවට ලක්වනු දකින්නට නොවේ. අපි සිනහවට ලක්වූ බවක් දැනගත් දා එම වේදනාවෙන් ඔවුන් මියයනු ඇත.

ආදරේ නොකියා ඔබෙන් වාසි පතා ඔබ සොයා ඒවි දහසක් අය . එනිසා අහස උසට බලාපොරොත්තු දී නොදකිනසේ යාවි ඔවුන්. පුරුෂයෙක් ඔබට සැබවින්ම ආලවන්ත නම් ඔබ සොයා ඒවි. නොදැක නො සිටීවි. ඒ නිසා ඔබ දකිනා චරිත පිළිබඳ හදවනින් නොව බුද්ධියෙන් විමසන්න. ඔබ දකීවි බොහෝ දේ. ඔබ වටිනා අයෙක්, සමාජයේ කොටසක්. කිසිදා, කිසිවිට අසරණ වී හැඩිමට සුදුසුකම් නොලබන අයෙක්. එනිසා විමසිලිමත්වන්න. ඔබගේ වටිනාකම ඔබ රැකගන්න.

අත් හැර යන්නට යෙමෙක් සුදානම් වේද යන්නට දෙන්න ඔහුට. කූඩුකර තබා සුරතල් කරන්නට තරම් නොවටී ඔහු. අත්හරින්න සසර ගමනින්ම. අත්හැර ගියපසු නැවත කිසිදා ඔහු ජිවිතයට සමීපකර නො ගන්නට තරම් ශක්තිමත් වන්න, එයයි ඔබේ වටිනාකම. ඔබ තනිවම ජිවත් වන්නට තරම් ශක්තිමත් බව සිහියේ තබාගන්න. විටක අතීත මතක ඔබ රිදවනු ඇත. ඒ මතක මත සිට ඔබ කිවිඳියක වන්න. ලේඛිකාවක් වන්න. චිත්‍ර ශිල්පිණියක වන්න. වටිනාකම් එක් කරගන ඔබටම.

නැවතත් ලියමි ” ඔබ ශක්තිමත් ” ……

………………………………………………………………………………………………………..

මිතුරියක ලෙස පමණක් අද දක්වා මම ඔබට ලංවී සිටියෙමි.

උසුළු විසුළු කරමින් පමණක් මම ඔබ හා සිටියෙමි.

තරවටු කළෙමි එහෙත් කිසිදා උපදෙස් නොදුන්නෙමි. නමුත් මා අද ඔබට ලියුවේ බොහෝ දිනක සිට සිතමින් සිටි යමක්. කිසිදා මා මෙලෙසින් ඔබට ලියයි කියා ඔබ නොසිතන්නට ඇතී. එහෙත් කාලය ගතවී ඇත. ඔබ මා හඬවා ඇත. අද ද මා හඬවයි. හෙටද මා හඬවනු ඇත. ඔබ මා ඉදිරිපස වැටි මට වඳිනා විට මුලු මහත් විශ්වයම මගේ දෙපා අබියස කියා මට සිතෙයි. අක්කා ජීවත්ව සිටියා නම් කියා මට දහස් වරක් සිතී ඇත.

දැන් ඔබ ඔබේ ජිවිත ගමන යායුතුයි. ඔබේ දෙපයින් නගී සිට. ……………………………………………………………..

දිනක ඔබ ලොව දිනූ දියණියක්සේ අපට සමුදී පිරිසිදු උඩරට ඔසරියකින් සැරසී නිවසින් පිටවනු ඇත. එය බලා අපි තිදෙනා සතුටු වෙමු. අපට ඒ සතුට පමණක් ඉතිරි වේවි.

නැවතත් කියමි, නැවත නැවත ලියමි, ” ඔබ ශක්තිමත්”

අරුණෝදයේ පායා එන හිරු, වැන්නී
උදා තරුව වී හිරු සමගින් එන්නී
පායා දිලෙන හිරු මම වේ නම් නැගණී
ඉර බටු තරුව ඔබමයි ආදර මිතුරී……..
හිරු නැති ලොවට සුදු සඳ පයා එන්නී
සඳ කිරණින් මිහිතලයම නාවන්නී
විඩාබර මිහිතලය මම වේ නම් නැගණී
ඔබමය මට සිසිල දුන් මගෙ සඳ සාවී
නිරුදක කතරකට දිය ගඟුලක් වැන්නී
පිපාසිත සිතට දිය දෝතක් වැන්නී
කතරක අතරමං වුයේ මම ම වෙමී
මට සිසිලස ගෙනා වේ, ආදර නැගණී…….
ආ ලෙස එකට හැමදා සෙනෙහසින් බැඳී
එන හැම දිනකදී හමුවෙමු සිනහ වෙවී
මම මහමායාව වේ නම්, මතු භවයකදී
ප්‍රජාපතී ගෝතමියම ඔබ වේවී …………

මිට ,
ආදර අක්කා.