හ්ම්ම්ම් අපේ blog එකට මං සාමාන්‍යයෙන් එන්නේ කවි සින්දු වගේ දේවල් ඔයාලට අරගෙන. නමුත් මේ ගමන මං හිතුව පොඩ්ඩක් වෙනස් පැත්තකට යන්න. මුහුණු පොත එහෙමත් නැත්තම් facebook කියන මාතෘකාව මේ දවස් වල වැඩි වශයෙන්ම කතා වෙනවා. එයට හේතු වුනු කරුණු කාරණා බොහොමයක් තියෙනවා. ඉතාමත් මෑතකදී සිදු වුනු ඒ අවාසනාවන්ත සිදුවීම නිසා මුහුණු පොත ගැන ජනතාව ගොඩක් කතා වෙනවා. සමහර අය කියන්නේ ලංකාවෙන් facebook තහනම් කල යුතු බවයි. මම මගේ අදහස ඔයාලට ඉදිරිපත් කරන්නේ ඉතාමත් මධ්‍යස්තවයි.

ඇත්තෙන්ම දැන් ලෝකේ තාක්ෂණය ඉතාමත් දියුණු අවධියකයි අප සිටින්නේ.කොටින්ම කිව්වොත් ලෝකය තාක්ෂණයේ හිනිපෙත්තටම නැග ඇත.එම තාක්ෂණික විප්ලවය ඔස්සේ අපහටත් ඉදිරියට යාමට සිදු වනවා විනා අපට නැවතීමක් නොමැත. මං මේ ලිපිය සකස් කරන laptop යන්ත්‍රය පවා තාක්ෂණික දියුණුවේ ප්‍රතිඵලයකි.වෙනස් වන ලෝකයේ අපත් ඒ අයුරින්ම වෙනස් විය යුතුවේ. එය මාර්ටින් වික්‍රමසිංහ ශුරීන් ගම්පෙරලිය නව කතා පොතේ ඉතාමත් අලංකාරව කියා ඇත්තේ මෙසේය. “කෙමෙන් වෙනස් වන පරිසරය නොතකා ඇතැම් පැරණි අවයව, පැරණි ස්වරුපයෙන් රැක ගැනීමට තැත් කල සත්තු වඳ වී ගියෝය ” එසේම අප ගතානුගතික විය යුතුද නැත.දැන් ඉන්න තරුණ පරම්පරාව ඉතාමත් උනන්දුවෙන් ලොව දැනුම සිසාරා බලයි.අන්තර්ජාලය එයට තෝතැන්නකි.නමුත් මතක තබා ගත යුත්තේ ඕනෑම දෙයක් දෙපැත්ත කැපෙන කඩුවක් මෙන් බවය.

Facebook එහෙමත් නැත්තම් මුහුණුපොත ලෝකයේ ඉතාමත් ජනප්‍රිය සහ වැඩිම ජනතාවක් පරිහරණය කරන සමාජ ජාලයයි.(social network) . 2004 වසරේදී Mark Zuckerberg විසින් ආරම්භ කල මෙම සමාජ අඩවි ජාලය ලොව පුරාම ජනප්‍රිය වුයේ Mark Zuckerberg ව ධනවතෙක් බවට පත් කරවමිනි. facebook මගින් නව මිතුරු මිතුරියන් දැන හඳුනා ගැනීමටත් පැරණි මිතුරු මිතුරියන් සමග මිත්‍රත්වය වැඩි දියුණු කර ගැනීමටත් බොහෝ පිරිස් උනන්දු වෙනවා.

ඉස්සර කාලේ තරුණයෙක් තරුණියක් එක්ක අදහස් හුවමාරු කරන්න භාවිත කලේ ලියුම් කඩදාසියි. මට මතක් වෙන්නේ ගම්පෙරලිය නව කතා පොතයි. පාසල් සමයේදී හටගන්නා යොවුන් ප්‍රේමය ඉතාමත් සුන්දරයි.එහිදී තමාගේ ප්‍රේමවන්තියට තමන්ගේ අදහස් ලියුමකින් ලියා පොතක් අස්සේ දාල දෙන සුන්දර කාලයක් තිබුන.ඒ කාලේදී තාක්ෂනය එතරම් දියුණු නැහැ.තවත් කාලේ ගත වෙනකොට දුරකථන තාක්ෂනය දියුණු වෙන්න පටන් ගත්ත. එවිට තරුණ තරුණියන් අතර අදහස් හුවමාරු වෙන්න පටන් ගත්තේ කෙටි පණිවිඩ එහෙමත් නැත්තම් sms හරහායි. ඒ කාලේ තරුණියගෙන් තරුණයා ඉල්ලන්නේ දුරකථන අංකයයි. නමුත් දැන් තත්වේ හාත්පසින්ම වෙනස් වෙලා. දැන් තරුණියක් මුණ පසු මුලින්ම අහන්නේ “ඔය facebook ඉන්නවද ?”යන පැනයයි.ඉන් අනතුරුව ඔහු ඇය සමඟ chat කර සුහඳ තාවය වැඩි දියුණු කර ගනියි. නමුත් භයානකම දේ වන්නේ කිසිදිනෙක ජීවිතේටම දැක නැති පුද්ගලයෙකු සමග chat කරන්න ගිය විටදීයි. තරුණිය ඔහුගේ බස් වලට රැවටී තමන්ගේ ජීවිතයම විනාශ කරගනියි. එවැනි පුවත් අපමණ ඇත.මං එකයි පෙරදී සඳහන් කලේ තාක්ෂනය දෙපැත්ත කැපෙන කඩුවක් මෙන් බව.

නුතන තාක්ෂනය පරිහරණය කිරීම වරදක් නොවේ.facebook භාවිතයද වරදක් නොවෙයි. නමුත් එය පරිහරණය කරන්නා එය නිසි පරිදි පරිහරණය කල යුතුය. වර්තමානයේ තාක්ෂනය පාවිච්චි කරන පිරිස වඳුරා දැලි පිහිය අසු උනාක් මෙන් භාවිතා කරයි. හරි හැටි අවබෝධයකින් තොරව ක්‍රියා කිරීමෙන් සිදුවන්නේ අනතුරකි. එබැවින් සිදු විය යුතු වන්නේ facebook තහනම් කිරීම නොව එය නිසි ලෙස පරිහරණය කිරීමයි.