මළල ක්‍රීඩා තරඟයෙන් උණුසුම් වූ නවකයින්ගේ ක්‍රීඩා උළෙල…

Anuththara 0 Comments

දහසකුත් එකක් බලාපොරොත්තු සරසවි බිමේ කෝඩුකාරයන්ගේ සිත් තුළ රඳවමින් ඇරඹි නවකයන්ගේ ක්‍රීඩා උළෙලෙහි  පිටිය සහ ජවන තරඟ ඉසව් ඉකුත් මැයි මස  11 සහ 12 යන දෙදින පුරාවට කොළඹ විශ්වවිද්‍යාලයීය ක්‍රීඩා පිටියේදී පැවැත්විණි.

පිටිය සහ ජවන ඉසව්  රැසකින් මළල ක්‍රීඩා පිටිය උණුසුම් කිරීමට සමත් වූ තියුණු තරඟකාරිත්වයක් විශ්වවිද්‍යාලයීය ක්‍රීඩා පිටියට පෑයූ නවක ක්‍රීඩක ක්‍රීඩිකාවන් අතර දක්නට ලැබුණි. මෙහිදී දක්ෂතම මළල ක්‍රීඩකයා බවට පත් වීමට ශාස්ත්‍ර පීඨයෙහි ආර්.එම්.නිෆ්‍රාස් සොයුරා සමත් වූයේ කොළඹ විශ්වවිද්‍යාලයීය නවකයන්ගේ ක්‍රීඩා ඉතිහාසයෙහි නව පිටුවක් පෙරලමිනි. මිනිත්තු දෙකක කාලයක් තුළ මීටර 800 පිරිමි තරඟය අවසන් කිරීමට ඔහු සමත් වූයේ මීට වසර 44කට පෙර තබන ලද වාර්තාවක් අලුත් කරමිනි.

දක්ෂතම මළල ක්‍රීඩිකාව බවට පත් වීමට දුර පැනීම ඉසව්වෙන් ඉහළ දස්කම් පෑ කොළඹ පරිගණක අධ්‍යයන ආයතනයෙහි තිලාරා ඒකනායක සොයුරියට හැකි විය. සමස්ත මළල ක්‍රීඩා කාන්තා ශූරතාවෙහි තෙවන ස්ථානය විද්‍යා පීඨය ද, දෙවන ස්ථානය හොරණ ශ්‍රී පාලි මණ්ඩපය සතු වූ අතර ප්‍රථම ස්ථානය කළමනාකරණ හා මූල්‍ය පීඨය ලබා ගන්නා ලදී. සමස්ත මළල ක්‍රීඩා පිරිමි ශූරතාවයෙහි තෙවන ස්ථානය ශාස්ත්‍ර පීඨය ද, දෙවන ස්ථානය විද්‍යා පීඨය ද, ප්‍රථම ස්ථානය කළමනාකරණ හා මූල්‍ය පීඨය ද ලබා ගන්නට සමත් විය. එමෙන්ම සමස්ත පිටිය සහ ජවන ක්‍රීඩා ඉසව්වන්ගේ තෙවන ස්ථානය කොළඹ පරිගණක අධ්‍යයන ආයතනය ද, අනුශූරතාවය විද්‍යා පීඨය ද, ශූරතාවය කළමනාකරණ සහ මූල්‍ය පීඨය ද දිනා ගැනීමට සමත් විය.

උද්වේගය, ජවය, කුතුහලය සපිරි නවකයන්ගේ මළල  ක්‍රීඩා උළෙල සමාප්ත වූයේ ජය පැරදුමෙන් එහා ගිය සහෝදරත්වයක් නවක සිසුන් අතර ඇති කරමිනි.

දැනට පැවති තරඟ අතුරින් සමස්ත ලකුණු පුවරුවෙහි විද්‍යා පීඨ නාමය ඉහළින්ම රඳවා පවත්වා ගැනීමට විද්‍යා පීඨ සිසුන්ට අද දිනයේත් හැකි විය. දිනෙන් දින උණුසුම් වන නවකයන්ගේ ක්‍රීඩා උළෙලෙහි නව තතු දැන ගැනීමට රැදී සිටින්න, FOSMedia  අප සමඟ.

Image Courtesy : FOS Media