ජය පැරදුම මැදින් එල්ලේ තරඟාවලිය නිමා වෙයි….

Share

සියලු දෙනාගේම හදවත් තුල තරඟකාරී රිද්මය දැඩි කරමින්, නවකයින්ගේ කෙලිබිමට තවත් එක් සුවිශේෂී දිනයක් උදා වූයේ, විශ්වවිද්‍යාලයට අනන්‍ය ක්‍රීඩාවක් ලෙසින් නම් දැරූ එල්ලේ තරඟාවලියේ ආරම්භයත් සමඟයි. අතිශය උද්‍යෝගිමත් සහ ක්‍රීඩාකාරී තරඟ බිමක් මවමින් පැවති මෙම තරඟාවලිය, සමස්ත ක්‍රීඩා උලෙළේ උණුසුම් බව තීව්‍ර කිරීමට සමත් අංගයක් බවට පත් විය.

කොළඹ විශ්වවිද්‍යාලයීය විද්‍යා පීඨය, කලමණාකරණ හා මූල්‍ය පීඨය, ශාස්ත්‍ර පීඨය, හෙද පීඨය ,කොළඹ විශ්වවිද්‍යාලයට අනුබද්ධිත හොරණ ශ්‍රීපාලි මණ්ඩපය සහ කොළඹ විශ්වවිද්‍යාලයීය පරිගණක අධ්‍යයනායතනයේ බාලක බාලිකා යන දෙඅංශයේම කණ්ඩායම්, මෙම තරඟාවලියට ඉදිරිපත් වුණි.

බාලක අංශයේ අවසන් මහා තරඟය, සියලුදෙනාගේම උද්‍යෝගය පසෙකලා, හදවත් මඳකට නතර කල අවස්ථාවක් බවට පත් වූයේ, විද්‍යා පීඨ කණ්ඩායම සහ කලමණාකරණ හා මූල්‍ය පීඨ කණ්ඩායම සම ලකුණු ලබා ගැනීමත් සමඟිනි. අතිරේක තරඟ වටයක තියුණු අවසානය හමුවේ, සමස්ත තරඟාවලියේ බාලක අංශයේ ප්‍රථම ස්ථානය විද්‍යා පීඨ කණ්ඩායම තමන් සතු කරගැනීමට සමත් විය. එසේම දෙවන ස්ථානය කලමණාකරණ හා මූල්‍ය පීඨ කණ්ඩායම විසිනුත්, තෙවන ස්ථානය කොළඹ  විශ්වවිද්‍යාලයීය පරිගණක අධ්‍යයනායතන කණ්ඩායම විසිනුත් හිමිකර ගැනීමට සමත් විය.

ප්‍රේක්ෂකයින්ගේ සුවිශේෂී අවධානය දිනාගත් බාලිකා අංශයේ තරඟාවලිය තුල, කරට කර තරඟ රටාවක නියැලෙමින් ප්‍රථම ස්ථානය ශාස්ත්‍ර පීඨ කණ්ඩායමත්, දෙවන ස්ථානය විද්‍යා පීඨ කණ්ඩායමත් දිනා ගැනීමට සමත් විය. හොරණ ශ්‍රීපාලි මණ්ඩපයේ තරඟ කණ්ඩායමට එහි තෙවන ස්ථානය හිමිවිය.

ක්‍රීඩා උළෙලේ ලකුණු සටහන අනුව, විද්‍යා පීඨය පෙරමුණේ රැදී සිටින අතර, පිලිවෙළින් කලමණාකරණ හා මූල්‍ය පීඨයත්, කොළඹ විශ්වවිද්‍යාලීය පරිගණක අධ්‍යයනායතනයත් දෙවන හා තෙවන ස්ථානයේ රැදී සිටී. තරඟාවලියේ ජයග්‍රාහකයින් සියලු දෙනාට FOS Media අපගේ සුභ පැතුම් එක් කරන අතර, උද්‍යෝගය, තරඟකාරීත්වය හා සාමූහිකත්වය කැටිකරගත් නවකයින්ගේ කෙලිබිම, ඉදිරි තරඟ තොරතුරු දැන ගැනීම සඳහා, රැඳී සිටින්න අප සමඟින්….

 
Tagged :