හුදු භාරයක් නොවේ, ලෙළනොදුන්නත් එසවුණේ අභිමානයයි.

Aurasa 0 Comments

නව පරිසරයකට ඇතුළු වූ යම් ජීවීන් විශේෂයක් එයට අනුගත වීමට යම් කාලයක් ගන්නා සේ, දැන් ගතවන්නේ නවක අපි සරසවි මව් තුරුලේ උණුහුමට හුරු වෙමින් සිටන කාලයයි. කොළඹ විශ්වවිද්‍යාලයීය ගෘහස්ථ ක්‍රීඩාගාරය මැයි දෙවනි දා පස්වරුවේ දැඩි ජයඝෝෂාවකින් දෙදරුම කෑම ඇරඹුණේ ජව ගන්වන්නයි හැඩ දැඩිව භාරයන් එසවිල්ල. මේ එකී අනුවර්තනය උත්ප්‍රේරණය කරනා උනුන් ගැටෙනා හමුවනා, නවකයන්ගේ ක්‍රීඩා උළෙලෙහි බර එසවීමේ ඉසව්වයි.

විශ්වවිද්‍යාලයෙහි විද්‍යා, ශාස්ත්‍ර, නීති, කළමානාකරණ හා මූල්‍ය, හෙද, තාක්ෂණ පීඨ වලින් මෙන්ම කොළඹ විශ්වවිද්‍යාලීය පරිගණක අධ්‍යනාංශය හා දේශිය වෛද්‍ය ආයතනයෙන් කණ්ඩායම් ලෙස බර පන්ති අටක් යටතේ සිසුන් හතළිස් තුන්දෙනෙක් සහභාගී වූ මෙම ඉසව්වේ අවසන් තීරණයයෙහි වගකීම දරන්නන් වූයේ ශ්‍රී ලංකා යුධ හමුදාවේ ප්‍රවීණ ක්‍රිඩක යූ.ජී.එන්.එස් කුලතුංග සහ එස්.එච් චන්දන යන විනිසුරුවරුන්ය. ජව එසවීමේ (power lifting) ආකෘතියට පැවති මෙම තරඟයේ ස්කොට් (squat), ඩෙඩ්ලිෆ්ට් (dead-lift) සහ බෙන්ච් ප්‍රෙස් (bench press) යන ක්‍රියාකාරකම් තුනටම එක් ක්‍රීඩකයෙක් උත්සාහයන් ත්‍රිත්වයක දී මුහුණ දෙන අතර ඒ සියල්ලෙහි ම උපරිම දක්ෂතාවයන්හි ඓක්‍යයෙහි වටිනාකමෙන් බර පන්තිය තුළ ක්‍රීඩකයාගේ ස්ථානය තීරණය කෙරිණි.

සිසුන් පමණක් සහභාගී වූ මෙහි ජය ගොස කිතු ගොස බවට පරිවර්තනය විම අරඹා නවකයන්ගේ නවමු අවස්ථාව ගත් 59 kg ට අඩු බර පන්තියේ පළමු ස්ථානය තාක්ෂණ පීඨයේ අමිල සඳරුවන් විසින් දෙවන හා තෙවන ස්ථාන පිළිවෙලින් එන්.සී උලින්ද (තාක්ෂණ. පී) හා චමත් (ශාස්ත්‍ර. පී) දිනා ගත්හ. 59 – 66 kg බර පන්තියේ පළමු, දෙවන හා තෙවන ස්ථාන පිළිවෙලින් පසන්.එම්. විතාන (විද්‍යා.පී), මධුශංක (කළමනාකරණයහා මූ. පී), හසන්ත (කො.වි පරිගණක අධ්‍යනාංශය), 66 -74 kg බර පන්තියේ එම ස්ථාන පිළිවෙලින් ඒ.ඩබ්ලිව්.පී.එස් විජේසිංහ  (කළමනාකරණයහා මූ. පී) ද, පසිඳු විජේසේන (කො.වි පරිගණක අධ්‍යනංශය), ආර්.ඒ.එස්.පී රණවක (නීති. පී) ද, 74-83 kg බර පන්තියේ එම ස්ථාන පිළිවෙලින් සමිත් අබේගුණවර්ධන (තාක්ෂණ.පී), භක්ති දිල්ශාන් (කළමනාකරණ හා මූ. පී), සංජය (හෙද. පී) ද ,83-93 kg බර පන්තියේ ස්ථාන පිළිවෙලින්ද වයි.පී බොතේජු (කළමනාකරණයහා මූ.පී),දිනුක සංකල්ප (කො.වි පරිගණක අධ්‍යනාංශය), ටී. අශේන් උදාර (විද්‍යා .පී) ද,93 – 105 kg බර පන්තියේ පළමු හා දෙවන ස්ථාන පිළිවෙලින් පසිඳු (කළමනාකරණය හා මු.පී) හා රන්ශික ජයමාන්න (විද්‍යා. පි) ද,105-120 kg බර පන්තියේ එම ස්ථාන පිළිවෙලින් වී. තනොජ් නිද්‍යාහාර හ හිමේෂ් අංජුල(කො.වි පරිගණක අධ්‍යනාංශය) විසින් තම පීඨයන් වෙත ප්‍රදානය කරනු ලැබිණි.

සරසවියේ තම කුළුඳුල් ක්‍රීඩා තරඟය තුළ තම නාමය විශේෂ ස්ථානය රඳවා ගැනීමේ හැකියාව ලබාගත්තේ 74 – 83 kg බර පන්තිය යටතේ සමිත් අබේගුණවර්ධනය(තාක්ෂණ. පී). ඒ ශරීර ස්කන්ධය අනුරූප ව වැඩි ම භාරයක් එසවූ තරඟාවලියේ ශක්තිමත් ම ක්‍රීඩකයා (strongest man) බවට පත්වෙමිනි.

අධිෂ්ඨානයෙන්, කැපවීමෙන් හා සහෝදරත්වයෙන් කුළුගැන්වුනු මේ තරඟ අවසානයේ සමස්ථ ප්‍රතිඵලය දැක්වුණේ කළමනාකරණ හා මූල්‍ය පීඨය ලකුණු 7 ක් රැගෙන ශූරත්වය ආරෝපණය කරගනිමින්, විද්‍යා පීඨය ලකුණු 5 ක් ලබා අනුශූරතාව දිනා ගනිමින් හා තුන් වන ස්ථානය තාක්ෂණ පීඨය සිසුන් ලකුණු 3ක් ලබා තහවුරු කරගනිමින් ය. තවද කොළඹ විශ්වවිද්‍යාලයීය පරිගණක අධ්‍යයනාංශය සිව්වැනි ස්ථානයත්, හෙද පීඨය පස්වන ස්ථානායත්, දේශීය වෛද්‍ය ආයතනය සයවන ස්ථානයත්, නීති පීඨය සත් වන ස්ථානයත්, ශාස්ත්‍ර පීඨය අටවන ස්ථානය ලබාගත්තේ එක් ලකුණක් බැගින් ස්වකීය නාමයන්ට දෙවාලමිනි.

අති සංවිධිතව සිදු කළ යුත්තක් වු මෙම ඉසව්ව සාර්ථක නිමාවක් කරා ගමන් කරවීමට කටයුතු කළ නායක තිසර බණ්ඩාර (විද්‍යා.පී) හා උපනායක දිල්ශාන් උදයරංග (කළමනාකරණයහා මූල්‍ය.පී) ප්‍රමුඛ කොළඹ විශ්වද්‍යාලීය බර එසලීමේ කණ්ඩායම ස්තූතිපූර්වකව සිහිපත් කළ යුතු ය.

මෙලෙසින් නවක අප ජීවන කතාවේ සරසවි පරිච්ඡේදයට සොඳුරු පළමු මතක වගන්ති කිහිපයකටත් වඩා අනර්ඝ අද්දැකුමෙන් සටහන් තෑබූ, ඒ කතාවේ පසුවදන ලියවෙනතෙක් නැවත නැවත කියවා සැමවිටම නවමු යමක් උගතහැකි ලෙස සටහන් තැබූ ජවාධික සන්ධ්‍යාවක් එසේ සරසවි ඉතිහාසයේ එතී රාත්‍රී අඳුරේ සැඟවිණි.