මේ දින වල කොළඹ විශ්වවිද්‍යාලයීය විද්‍යා පීඨයේ අණුක ජීව විද්‍යාව සහ ජෛව රසායන විද්‍යාව හදාරන සිසුන් විශේෂ කටයුත්තකට සූදානම් වෙමින් සිටිනවා. එය නමින් ගාන්ධර්වාභිනන්දන 2016. අඛණ්ඩව තුන් වන වරටත් පැවැත්වෙන මෙහි සංවිධාන කටයුතු අතරතුර එහි සංවිධායක කමිටුවේ නිමෝත් දිල්ශාන් සොයුරා සමඟ පිළිසඳරක යෙදෙන්නට අවස්ථාවක් ලැබුණා.
ගාන්ධර්වාභිනන්දන ගැන යමක් සඳහන් කලොත්…
ඔව්, මේ ප්‍රසංගය අණුක ජීව විද්‍යාව සහ ජෛව රසායන විද්‍යාව හදාරන සිසුන් තමයි සංවිධානය කරන්නෙ. මුල් ම ප්‍රසංගය විශාරද සුනිල් එදිරිසිංහ මහතාගේ සහභාගීත්වයෙන් තමයි පැවැත්වුණේ. 2012 වසරෙ දි විශාරද අමරසිරි පීරිස් මහතාගේ සහභාගීත්වයෙන් සාර්ථකව පැවැත්වුණා. මේ තුන්වෙනි වතාව. මේ වතාවේ දි අපි තීරණය කළා ටිකක් වෙනස් අත්දැකීමක් ප්‍රේක්ෂකයන්ට ලබා දෙන්නට. ඒ අනුව අපි මෙවර යුග දෙකක් එක් කරමින් ප්‍රසංගය සඳහා වික්ටර් රත්නායක ශූරීන්ට සහ කරුණාරත්න දිවුල්ගනේ ශූරීන්ට ආරාධනා කළා. ඒ වගේ ම ප්‍රසංගයේ සංගීතය මෙහෙයවීම සිදු කරන්නෙ ජයන්ත රත්නායක මහතා.
කථනය සිදු කරන්නෙ මහාචාර්ය සරත් විජේසූරිය මහතා.
ප්‍රසංගය පැවැත්වෙන්නෙ කොහේ ද, කවද ද, කීයට ද?
මෙවර අපි ප්‍රසංගය කොළඹ මියුසියස් විද්‍යාලයීය ශ්‍රවණාගාරයේ දී අගෝස්තු මස 26 වෙනිදා පස්වරු 6.30 ට පවත්වන්නට සියලු කටයුතු මේ වනවිට සූදානම් කරල තියෙනවා.
මේ ප්‍රසංගය පැවැත්වීමේ අරමුණ මොකක් ද?
මෙම ප්‍රසංගයේ මූලික අරමුණ ගැන කිව්වොත්, රසායන විද්‍යා දෙපාර්තුමේන්තුවෙහි පිහිටා තිබෙන පීඨය තුළ ඉතාමත් ම ක්‍රියාකාරී එමෙන් ම පර්යේෂණ විශාල වශයෙන් සිදුකිරීමට භාවිතාවෙන ජෛව තාක්ෂණ විද්‍යාගාරයේ කටයුතු සඳහා අවශ්‍ය අරමුදල් රැස් කිරීම ප්‍රධාන යි.
අවසාන වශයෙන් යමක් සඳහන් කලොත්…
ඔව්, අපි විශ්වාස කරනවා මෙම ප්‍රසංගය සම්භාව්‍ය සහ සුභාවිත ගීතවලට ප්‍රිය කරන සැමට නැවුම් අත්දැකීමක් වෙයි කියලා. ඉතින් අපි ආරාධනා කර සිටිනවා ඒ සැමට එදිනට සොඳුරු සංගීත සැඳෑවකට සහභාගී වන ලෙසට.
ප්‍රවේශ පත්‍ර සඳහා:
- Tickets.lk
- නුගේගොඩ සරසවි පොත් හල ඇතුලු ප්‍රධාන පොත්හල්
- අණුක ජීව විද්‍යාව සහ ජෛව රසායන විද්‍යාව හදාරන සිසුන් හරහා
- එදින දොරටුවෙන්