විදේශ විශ්වවිද්‍යාලයකට උසස් අධ්‍යාපනය සඳහා අයදුම් කරන්නේ කොහොමද? (How to prepare for GRE)

ඉතා වැඩ අධික වූ නිසා ලිපි මාලාවේ ඊළඟ ලිපිය ලියන්නට මද කලක් ගත වූවා. කෙසේ නමුත් ලද කෙටි කාලයෙන් ඔබට වැදගත් දෙයක් ලියන්නට හැකි වේ යැයි මා සිතනවා. මුලින්ම පසුගිය ලිපි දෙක කියෙව්වේ නැත්නම් ඒ දෙක කියවලා එන්නකෝ. මෙන්න links දෙක. article 1, article 2. අද අපි කථා කරමු GRE ගැන. මොකද්ද මේ GRE කියලා කියන්නේ? ඒක අපේ උසස් අධ්‍යාපනයට කොච්චර වැදගත් ද? ඒක නැතුව අපිට මොකුත්ම කර ගන්න බැයිද? කොහොමද මේක ගොඩ දාගන්නේ. ඔය වගේ ගොඩාක් ප්‍රශ්ණ ඔබට තිබෙනවා ඇති. මේ ප්‍රශ්ණ වලට මගේ අත්දැකීම් එක්ක දෙන්න පුළුවන් පිළිතුරු අද මම ලිපියෙන් ගොනු කරන්න බලාපොරොත්තු වෙනවා. වැරදි යමක් හරි තව අලුතෙන් යමක් එකතු කරන්න තියෙනව නම් හරි comment එකක් මඟින් ඒක කියන්න ඔයාලට අවස්ථාව තියෙනවා.

අපි මේ ගැන ප්‍රශ්ණ උත්තර අනුවම සාකච්ඡා කරමු.

මොකද්ද මේ GRE කියලා කියන්නේ?

Graduate Record Examination කියන එක කෙටි කරලා තමයි GRE කියන නම හැදිලා තියෙන්නේ. මේක විදේශ විශ්ව විද්‍යාලයකට ඇතුලත් වීම සඳහා ඉතා ඉහල පිළිගැනීමක් ඇති විභාගයක්. අපි මේකට Admission Test එකක් කියලා කියනවා. මෙය ETS කියන ඇමෙරිකානු ආයතනය මඟින් තමයි පවත්වාගෙන යන්නේ. මෙය ඉතා හොඳින් ප්‍රමිතිගත විභාගයක්. එනම් standardized test එකක්. ඒ කියන්නේ අපිට මේ විභාගයට මොනවාද එන්නේ කියලා හොඳ සැළැස්මක් සාදා ගත හැකි වගේම පූර්වකථනය කරන්නත් හැකියාව තියෙනවා. ඔබට ETS වෙබ් අඩවියට යාමෙන් මේ පිළිබඳ හොඳ අවබෝධයක් ලබා ගත හැකියි.
GRE වල කොටස් කීයක් තිබෙනවද?

ප්‍රධාන වශයෙන් GRE කොටස් දෙකකට බෙදෙනවා. ඒ තමයි Computer-delivered Test හා Paper-delivered Test. නමුත් ලංකාවේදී ඔබට පෙනී සිටිය හැක්කේ පරිගණකය ආශ්‍රිත පරීක්ෂණය (Computer-delivered Test) සඳහා පමණක් බැවින් Paper-delivered Test එක ගැන මෙහිදී අප කථා කරන්නේ නෑ. කෙසේ වෙතත් මේ දෙකේම සමාන ව්‍යුහයක් තිබෙන්නේ. මෙය කොටස් දෙකකට බෙදෙනවා. එකක් තමයි GRE General කියන්නේ, අනික් එක GRE Subject ලෙස හැඳින්වෙනවා. මූලික වශයෙන් විදේශ විශ්වවිද්‍යාලයකට අයදුම් කරද්දි GRE General පමණක් කර තිබීම හොඳටම ප්‍රමාණවත්. නමුත් විශේෂ අවස්ථා වලදී එම අදාල විශ්වවිද්‍යාලයේ ඇතුලත් කර ගැනීමේ අවම සුදුකම් (Minimum Requirements of Admission) වලට GRE Subjects කර තිබීම අවශ්‍ය බව දන්වනවා. එවිට ඔබට GRE General ද සමඟ GRE Subject එක ද කර අයදුම් කිරීම අවශ්‍ය වෙනවා. සමහර විට බොහෝ අය GRE General එකත් සමඟ Subject Test එකත් කරන්නේ අධික තරඟකාරීත්වයට මුහුණ දෙන්න. සමහර විට ඔබ Subject Test එක ද කර තිබීම තෝරා ගැනීමේ දී වැඩි රුකුලක් ගෙන දෙන්න පුළුවන් විය හැකියි. නමුත් මගේ අදහස නම් පමණක් General Test එක කර තිබීම ප්‍රමාණවත් බවත් අවශ්‍ය නම් පමණක් Subject test එක කිරීම යෝග්‍ය බවත් ය. මෙහිදී ඔබ උසස් අධ්‍යාපනය හැදෑරීමට බලාපොරොත්තු වන විවිධ අංශ වලින් Subject Test එකට පෙනී සිටිය හැකියි. උදාහරණයක් ලෙස ඔබ භෞතික විද්‍යාව හැදෑරීමට බලාපොරොත්තු වන්නේ නම් GRE Physics Subject Test ලෙස අදාල විෂයට අදාල වන ලෙස subject test එකක් තිබෙනවා. මෙහිදී ඔබට විෂය කරුණු පිළිබඳ හොඳ අවබෝධයක් තිබිය යුතු වෙනවා. බොහෝ විට Subject test එක GRE General එකට වඩා අමාරු බව ඒ සඳහා පෙනී සිටින්නන්ගේ පොදු අදහසයි. මේ ලෙස විවිධ විෂයන් වලට විවිධ subjects tests තිබෙනවා. ඔබට අදාල විෂය ඔබගේ රුචිය අනුව තෝරා ගත හැකියි.
GRE General වල ව්‍යුහය කොහොමද?

ඒ පිලිබඳ මේ වෙබ් අඩවිය පරිහරණය කිරීමෙන් තොරතුරු දැන ගත හැකියි.
https://www.ets.org/gre/institutions/about/general/
GRE වල මොනවාද අහන්නේ?

GRE General ගැන කථා කරන විට එය කොටස් තුනකින් යුක්තයි. එනම් analytical writing, verbal reasoning, හා quantitative reasoning ලෙසයි. මේවා ගැන එකිනෙකින් විස්තර කිරීමට බොහෝ කරුණු තිබෙන නමුත් ඔබ ඒ සඳහා සූදානම් වන විට මේ කරුණු සියල්ලම පිළිබඳ හොඳ අවබෝධයක් ලැබෙන නිසා ඉතා කෙටි හැඳින්වීමක් පමණක් ලබා දෙන්නම්. නමුත් අන්තර්ජාලය ඔස්සේ මා කියවූ සමහර වැදගත් ලිපි කිහිපයක යොමු ඔබට ලබා දෙන්නම්. ඒවා කියවීමෙන් ද හොඳ අවබෝධයක් ලබා ගත හැකියි. මූලික වශයෙන් analytical writing කොටසේ දී ඔබට Analysis of an Issue සහ Analysis of an Argument ලෙස රචනා දෙකක් ලිවීමට ලැබෙනවා.

මේ පිළිබඳ පහත වෙබ් අඩවි පරිහරණය කිරීමෙන් වැඩි දුර දැනුම ලබා ගත හැකියි.
https://crunchprep.com/gre-analytical-writing-guide
http://www.kaptest.com/study/gre/how-to-structure-the-gre-argument-essay/
https://www.ets.org/gre/revised_general/prepare/analytical_writing/
http://magoosh.com/gre/ultimate-gre-guide/gre-analytical-writing-essay/

Quantitative reasoning සඳහා ඔබට අවශ්‍ය වන්නේ සාමාන්‍ය පෙළදී භාවිතා වූ ගණිත දැනුමයි. ඉතා අසීරු නොවන මේ ගැටළු විසඳීමේ දී වඩාත් සැළකිලිමත් විය යුත්තේ කාලය පිළිබඳවයි. එම නිසා මේ ගණිත ගැටළු විසඳන කෙටි ක්‍රම පිළිබඳ අධ්‍යනය කිරීම ඉතා වැදගත්. පුහුණු වීම මඟින් මේ හැකියාව ලබා ගත හැකියි. කෙටි ක්‍රම සහ විභාගයේදී උපකාරී වන ප්‍රයෝග (Strategies) තිබෙනවා මේවා හොඳින් අධ්‍යනය කිරීමෙන් ඉගෙන ගත හැකියි.

https://www.quora.com/Whats-the-best-preparation-method-to-get-an-170-GRE-Quant-score

Verbal reasoning වලදී ඔබගේ ඉංග්‍රීසි භාෂාව පිලිබඳ දැනුම පරීක්ෂා කෙරේ. මෙය IELTS හෝ TOEFL වලට වඩා වෙනස් ස්වභාවයක් ගනු ලබයි. මෙහිදී ඔවුන් විසින් ලබා දෙන ඉංග්‍රිසි පද මාලාව (Vocabulary) පිළිබඳ හොඳ අවබෝධයක් ලබා තිබීම ඉතා වැදගත්. ඒවා භාවිත වන ආකාරය, වාක්‍යයක යොදන ආකාරය, සමාන පද හා ඒවායේ තේරුම් මෙහිදී පරීක්ෂා කරනු ලබයි. ඉංග්‍රීසි ඉක්මනින් කියවා තේරුම් ගැනීමට මනා පළපුරුද්දක් තිබීමෙන් හා මෙම පද මාලාව ප්‍රගුණ කිරීමෙන් මෙම කොටස සඳහා හොඳ ලකුණක් ගත හැකි වේ. මෙම පද මාලාවේ වචන වලින් නිතර භාවිතා වන වචන 1000 පමණ ඇති අතර ඒවා විවිධ වෙබ් අඩවි මඟින් විස්තර කර තිබෙනවා. පහත යොමු පරිහරණය කිරීමෙන් ඔබට මේ පිළිබඳ වැඩි දුර දැන ගත හැකියි.

http://magoosh.com/gre/ultimate-gre-guide/gre-verbal-reasoning/
http://magoosh.com/gre/2013/gre-verbal-reasoning-five-tips-for-doing-well/
http://magoosh.com/gre/verbal/
http://www.huffingtonpost.com/chuck-cohn/how-to-prep-for-the-gre_b_4091080.html
http://www.majortests.com/gre/verbal_skills.php
https://ironline.american.edu/cracking-the-gre-verbal-reasoning-2/

ඔබට Verbal Reasoning පද මාලාව පිළිබඳ අවබෝධයක් ලබා ගැනීමට අවශ්‍ය නම් හා ඔබගේ දැනුම වැඩි දියුණු කර ගැනීමට අවශ්‍ය නම් පහත වෙබ් අඩවි පරිශීලනය කළ හැකියි.

https://www.vocabulary.com/lists/194479
http://magoosh.resources.s3.amazonaws.com/Magoosh-GRE-Vocab-eBook.pdf
http://www.majortests.com/gre/wordlist.php

මේ සඳහා GRE Flashcards නමින් හඳුන්වන කාඩ්පත් වර්ගයක් භාවිතා වනවා. ඒවා පහත යොමු ඔස්සේ ලබා ගත හැකියි. ඒ සඳහා ස්මාට් ජංගම දුරකථන මෘදුකාංග පවා නිර්මාණය කර තිබෙනවා. ඇන්ඩ්‍රොයිඩ් හා ඇපල් දුරකථන සඳහා වන මෘදුකාංගය පහත යොමුව ඔස්සේ බාගත කර ගත හැකියි.

https://gre.magoosh.com/flashcards/vocabulary

මේ සඳහා විවිධ ක්‍රීඩා ද නිර්මාණය කර තිබෙනවා විවිධ ක්‍රම භාවිතා කර ඔබගේ දැනුම දියුණු කර ගැනීමෙන් හොඳ ලකුණක් කර යොමු විය හැකියි.

පොදු වශයෙන් ETS වෙබ් අඩවිය විසින් නිකුත් කර ඇති මෙම පොත් හා මෘදුකාංග යොදා ගැනීමෙන් ද පහත යොමුවේ දක්වා ඇති පොත් පරිහරණය කිරීමෙන්ද GRE විභාගය කෙරෙහි හොඳ අවබෝධයක් ලබා ගත හැකි වනවා මෙන්ම ඉතාම ඉහල ළකුණු මට්ටමකට ළඟ විය හැකියි.
http://gre.graduateshotline.com/top-4-books-for-gre-prep.html#.V6wj-Pl97IU

මීට අමතරව මෙම study materials මා ළඟ ඇති අතර අවශ්‍ය කෙනෙකුට ඒවා ලබා දිය හැකියි.
GRE සමත් වෙන්න ළකුණු කීයක් ගන්න ඕනෙ ද?

Quantitative Reasoning වල හා Verbal Reasoning වල ළකුණු එකතු කොට එකට ලබා දෙන අතර Analytical Writing වල ලකුණු ලබා දෙන්නේ මුළු ලකුණු 6න් ය. එය 0ත් 6ත් අතර විචලනය විය හැකියි. Quantitative Reasoning සඳහා මුළු ළකුණු 170ක් ද Verbal Reasoning සඳහා මුළු ළකුණු 170ක ද වශයෙන් දෙකේම එකතුව වශයෙන් ළකුණු 340 ලබා ගත හැකියි. GRE සඳහා සමත් අසමත් ළකුණු මට්ටමක් නොමැති අතර ඔබ ඒ සඳහා පෙනී සිටින විටම ඔබට ළකුණු 260 හිමි වේ. එයට හේතුව Quantitative හා Verbal Reasoning වල ලකුණු මට්ටම විචලනය වන්නේ 130 හා 170 අතර බැවිනි.

කෙසේ නමුත් සම්මතය වන්නේ දෙකේම එකතුව වශයෙන් අවම වශයෙන් ලකුණු 300 ගැනීමත් Analytical Writing සඳහා අවමය වශයෙන් ලකුණු 4.0 ගැනීමත් ය. සාමාන්‍යයෙන් 300ට වඩා වැඩි ළකුණක් ලැබී තිබීම ඔබගේ අයදුම් පත තෝරා ගැනීමට හොඳ සාධකයක් වේ. නමුත් 290ත් 300ත් අතර ළකුණු ලබා ගැනීමෙන් මඳ මහන්සියක් දරා විශ්වවිද්‍යාලයකට තේරී පත් වීමට හැකි වූ අයද අප අතර ඕනෑ තරම් සිටිති.
Analytical Writing පිළිබඳ අවධානයක් යොමු කරන්න ඕනේ නැද්ද?

බොහෝ දෙනෙක් Analytical Writing සඳහා දක්වන්නේ කුඩම්මාගේ සැළකිලි. නමුත් සමස්ථයක් වශයෙන් එයට ළකුණු 4.0 වත් ලබා තිබීම ඔබගේ අයදුම්පත සාර්ථක වීමට වැදගත් සුදුසුකමක් දරනවා. අනෙක් කොටස් දෙක ඉතාම අත්‍යවශ්‍ය අතර බොහෝ විශ්වවිද්‍යාල අවශ්‍ය අවම ළකුණු ඔවුන්ගේ වෙබ් අඩවියේ දක්වා තිබෙනවා. මේ සඳහා ETS ආයතනය මඟින් Percentile Value යනුවෙන් ලකුණු standardised කිරීමේ ක්‍රමයක් භාවිතා කරනවා. විවිධ දින වලදී විභාගය සඳහා පෙනී සිටින සිසුන්ට අසාධාරණයක් නොවන්නටයි මෙය ඉදිරිපත් කර තිබෙන්නේ. බොහෝ විට මෙම Percentile අගයෙන් 50% කට වඩා කොටස් තුනට වෙන වෙනම ලබා තිබීම බොහෝ විශ්වවිද්‍යාල වල අවම සුදුසුකමක්. මෙහි අවම අගයද අවම ලකුණු සමඟ ඔවුන්ගේ වෙබ් අඩවි වල දක්වා තිබෙනවා. ඒ නිසා කොටස් තුනට අවධානය යොමු කිරීම නුවණට හුරුයි. සමහර භාෂාව මත පදනම් වී උසස් අධ්‍යාපනය කරන පාඨමාලාවන් සඳහා සඳහා අවම වශයෙන් 5.5 තිබීම අවශ්‍ය විය හැකියි. මේ සියළු විස්තර අදාල පාඨමාලාවට අදාල වෙබ් අඩවියේ දක්වා තිබෙනවා.
GRE වලට ලියාපදිංචි වෙන්නේ කොහොමද?

මේ සඳහා ETS වෙබ් අඩවියේ ගිණුමක් ආරම්භ කල යුතු අතර ඒ පිළිබඳව විස්තරාත්මකව විමසා බලමු. මුලින්ම මෙම යොමුව ඔස්සේ ලියාපදිංචි වීම සඳහා වෙබ් පිටුවට පිවිසෙන්න.
පහත රූපයේ දක්වා ඇති පරිදි ඔබගේ විස්තර ඇතුල් කිරීමට ෆෝරමයක් මුලින්ම ලැබේ.

මෙහිදී First or Given Name, Middle Name හා Last or Family Name දැමීම මෙම ලියාපදිංචි වීමේ දී ඉතාම වැදගත් පියවර ලෙස සැළකිය හැකිය. ඔබගේ නම වැරදුනහොත් අකුරු වැරදීමක් හැරෙන්නට කිසිම ආකාරයකින් නමේ වෙනස් කමක් කල නොහැකි වේ. ඔබ විභාගයට යන විට ඔබගේ ගමන් බලපත්‍රයේ සඳහන් පරිදි මෙහි නම නොමැති නම් සමහර විට ඔබගේ අයදුම්පත ප්‍රතික්ෂේප වීමට ඉඩ ඇත. එසේ වුවහොත් ඔබට ගෙවූ මුළු මුදලම අහිමි වේ. යම් හෙයකින් ඔබගේ නම වැරදුනහොත් ඔබට කිරීමට ඇති එකම දේ වන්නේ විභාගය අවලංගු කිරීමයි. එසේ කර නැවත වෙන email ලිපිනයකින් වෙනත් ගිණුමක් සාදා නිවැරදි ලෙස නම දැමීම කල හැකිය. නමුත් විභාගය අවලංගු වීමේ දී ඔබට නැවත ලැබෙන්නේ (Refund) මුළු මුදලින් භාගයක් පමණි එනම් ආසන්න වශයෙන් Rs. 14914 පමණි. මෙසේ විභාගය අවලංගු කිරීමේ දී ලැබෙන මුදල ලබා ගැනීමට නම් විභාගය පැවැත්වීමට අවම වශයෙන් දින 4කට වත් පෙර එය අවලංගු කල යුතු වේ. ඒ පිළිබඳ වැඩි විස්තර මෙම යොමුවෙන් ලබා ගත හැක.

කෙසේ නමුත් මෙම ලියාපදිංචි වීම යනු කෙළින්ම විභාගයට ලියාපදිංචි වීම නොවන අතර පසුව වෙනම මුදල් ගෙවා විභාගය සඳහා ලියාපදිංචි විය යුතු වේ. එම මුදල් ගෙවීමකින් පසුව ඔබට ඔබගේ නම වෙනස් කිරීමට අවශ්‍ය වුවහොත් එය කිරීම කල නොහැකි අතර ඉහත සඳහන් උපදෙස් අනුගමනය කිරීමට සිදු වේ. කෙසේ නමුත් ඔබ දැනටමත් ගිණුමක් සාදා ඇත්නම් මුදල් ගෙවීමට පෙර නම ඉතාම සැළකිල්ලෙන් පරීක්ෂා කර බලන්න. නම වැරදි නම් වෙන email ලිපිනයක් යොදා ගෙන නිවැරදිව නම යොදා නැවත අළුතින්ම ගිණුමක් ආරම්භ කරන්න. මන්ද යත් මෙහි නම හැර අන් සියළු දේම ඔබට පසුව වෙනස් කළ හැකි බැවිනි.

නම යෙදීමේදී ඔබගේ නමේ සියළු කොටස් මෙහි ඇතුලත් විය යුතු අතර ඔබගේ ගමන් බලපත්‍රයේ සඳහන් පරිදි නම යෙදීම යෝග්‍ය වේ. කෙසේ නමුත් මෙහි එක් text field එකකට ඇතුළත් කළ හැකි උපරිම අකුරු ගණන 24කි. ඔබගේ නම අකුරු 24කට වඩා දිග නම් එක් එක් නමේ මුල අකුර හා – (hyphen) යොදා ගෙන නමේ සියළුම නම් කොටස් මේ සඳහා ඇතුලත් කිරීමට වග බලා ගන්න. මේ සඳහා උපදෙස් අවශ්‍ය නම් ඔබට Fulbright අයතනය ඇමතීමෙන් ලබා ගත හැක.

උදාහරණයක් ලෙස ඔබගේ නම අතුකෝරල ආරච්චිලාගේ මධුර අංජන අතුකෝරල (Athukorala Arachchilage Madhura Anjana Athukorala) යැයි සිතන්න.
ඔබට first name ලෙස Madhura-A-Athukotala ලෙස යෙදිය හැක. මන්ද යත් සම්පූර්ණ නම අකුරු 24කට වඩා දිග බැවිනි. Last Name ලෙස Athukorala-Arachchilage යෙදිය හැක. මෙහිදී මැද නමක් නොයෙදූ අතර එය ගැටළුවක් නොවනු ඇත. ඔබගේ නම පියුමි මධුෂා කරුණාරත්න (Piumi Madhusha Karunarathna) යැයි සිතන්න. ඔබට first Name ලෙස Piumi ද Middle Initial ලෙස M ද Last Name ලෙස Karunarathna ද යෙදිය හැක. නමුත් ශ්‍රි ලාංකිකකයෙකු වශයෙන් ඔබට ඉතා සංකීර්ණ නමක් තිබීමේ වැඩි සම්භාවිතායක් තිබෙන නිසා ඒ පිළිබඳ සැලකිලිමත් වන්න. ඉතිරි විස්තර අවශ්‍ය පරිදි ඇතුලත් කරන්න. රතු තරු ලකුණෙන් දක්වා ඇති විස්තර අනිවාර්යයෙන්ම ඇතුලත් කළ යුතු වේ. මෙහිදී ශ්‍රි ලංකාවේ Social Security Number එකක් භාවිතා නොවන නිසා එය හිස්ව තබන්න.

ඉන් පසු Continue Button එක click කරන්න. එවිට පහත වෙබ් පිටුවට යොමු වනු ඇත. මෙහිදී ඔබට අවශ්‍ය User Name එක ඇතුලත් කිරීමට අවස්ථාව ලබා දේ. ඔබ කැමති ආකාරයට එය ඇතුලත් කර ආරක්ෂිත password එකක් ද යොදන්න. Security Question එකක් ද ඇතුලත් කර continue කරන්න.

දැන් ඔබ ලියාපදිංචි වී අවසානයි. එය මේ වෙබ් පිටුවෙන් දැක්වේ.

Continue click කර පසු පහත වෙබ් පිටුවට පිවිසේ.

මෙහිදී ඔබට විභාගයකට ලියාපදිංවි වීම, එය අවලංගු කිරීම, ප්‍රතිඵල විශ්විවිද්‍යාල වලට යැවීම, ප්‍රතිඵල බැලීම වැනි විවිධ සේවාවන් ලබා දේ. අපි බලමු විභාගයකට ලියාපදිංචි වන්නේ කෙසේ ද කියා. Register for a general test click කරන්න. එවිට පහත වෙබ් පිටුවට යොමු වේ.

ලෙස තේරූ විට එය පහත වෙබ් පිටුවට ගමන් කරයි.

මෙහිදී ඔබට දෙහිවල, කොළඹ සහ කොළඹ 06 ලෙස තෝරා ගැනීම් 3 කළ හැක. ඔබගේ පහසුව පරිදි කැමති තැනක් තෝරා ගන්න. මෙම ස්ථාන ආයතන තුනක් මඟින් මෙහෙයවනු ලබයි. ඒවායේ නම් හා ලිපිනයන් පහත පරිදි වේ.

PATHE Academy–STN13616A
NO 07, RAJAGURU SRI SUBUTHI MAWATHA
COLOMBO Sri Lanka
Web site: http://www.patheacademy.org/course/official-tofel-gre-test-centre/
Telephone: +94 11 2 363112

COLOMBO, SRI LANKA #8824–APCU-8824
DLC Prometric Test Center,
2nd Floor, OpenArc Technology Complex,
120 Highlevel Road, Kirulapone
COLOMBO 6 Sri Lanka

Knowledge Merchandising Pvt Ltd–STN14760A
66-1-1, Galle Road
Dehiewella North
DEHIWELLA Sri Lanka
Web site: http://www.knowmat.com/
Telephone: +94 11 2 733088

ඔබ එක් ලිපිනයක් තේරූ විට පහත පරිදි ඔබට ඉඩ තිබෙන දිනයන් දැක්වෙන වගුවක් දිස් වේ. එයින් ඔබ කැමති දිනය තෝරා ගන්න.
එක් දිනයක register now මත click කළ විට ඔබගේ විස්තර දිස්වන වෙබ් පිටුවක් දිස් වේ. මෙහි ඔබගේ නම හැර අනෙක් සියළුම විස්තර වෙනස් කළ හැකි වේ. අවශ්‍ය වෙනස් කිරීම් සිදු කිරීමෙන් පසුව submit කරන්න,. නමුත් ඔබගේ නමේ යම් අඩුපාඩුවක් තිබේ නම් එය වෙනස් කිරිමට නොහැකි බැවින් වෙනත් ගිණුමක් සාදා ගන්න. මෙහිදී Educational Status at the time you take the GRE test: සඳහා Unenrolled (College Graduate) යෝග්‍ය වේ.ඉන්පසු දිස් වන වෙබ් පිටුවේ අදාල දිනයේ වේලාව මත click කරන්න. ඉන්පසු අදාල උපදෙස් කියවා එම අවශ්‍ය විස්තර ඇතුලත් කරන්න. මෙහිදී GRE Search Service ලෙස සේවාවක් ETS ආයතනය හඳුන්වා දෙනු ලබයි. එයට ඔබ එකඟ නම් ඔබගේ විස්තර විශ්වවිද්‍යාල යැවීම ETS ආයතනය විසින් සිදු කරයි. මෙහි ප්‍රතිඵලයක් ලෙස ඔබගේ ක්ෂේත්‍රයට අදාල විෂයන් වල පාඪමාලාවන් වල විස්තර එම විශ්වවිද්‍යාල මඟින් ඔබගේ email ලිපිනයට එවනු ලබයි. මේ සඳහා පසුවද ලියාපදිංචි විය හැකියි.

අවසාන පියවර වශයෙන් ඔබට විභාගය සඳහා මුදල් ගෙවීමට සිදු වේ. වර්ථමානයේ දී US $ 205 ක මුදලක් ඔබගෙන් අය කෙරේ. මේ සඳහා ඔබට ක්‍රෙඩිට් කාඩ් පතක් හෝ ඩෙබිට් වෙබ් කාඩ් පතක් තිබීම අවශ්‍ය වේ. මෙය ඔබගේම වීම අවශ්‍ය නැත. තිබෙන කෙනෙක්ගෙන් ඉල්ලා ගතහැක. නමුත් ක්‍රෙඩිට් කාඩ් පතකින් මුදල් ගෙවන්නේ නම් මේ මුදලට අමතරව රජයේ බදු ගාස්තු ගෙවිය යුතු වේ. ඒ පිළිබඳව ද සැළකිලිමත් වන්න. මුදල් ගෙවූ පසු ඔබ විභාගයට ලියාපදිංචි වී අවසාන වන අතර විභාගයට දින කිහිපයකට පෙර ඔබට මඟින් ඔබගේ Admission ලැබෙනු ඇත. එය print out 1 ගෙන විභාග මධ්‍යස්ථානයට රැගෙන යන්න.
මුදල් ගෙවන විට එය අතරමඟ stuck වූ විට කුමක් කළ හැකි ද?

මෙහි දී ඔබ දෙවරක් මුදල් ගෙවන button එක මත click නොකළ යුතුයි. මඳ වේලාවක් ගත වූ පසුත් confirmation message එකක් නොලැබෙන්නේ නම් වහාම ඔබගේ ක්‍රෙඩිට් හෝ ඩෙබිට් කාඩ් පත් ආයතනයට කථා කල මුදල් කැපී ඇද්දැයි සැක හැර දැන ගන්න. මුදල් කැපී නැත්නම් මේ ක්‍රියාවලිය මුල සිට කර නැවත මුදල් ගෙවන්න. නමුත් මුදල් කැපී ඇත්නම් ඔබට මඳ වේලාවකින් ETS ආයතනය මඟින් email එකක් එවනු ඇත. එය නොලැබුන හොත් හැකි ඉක්මනින් ETS ආයතනයට දුරකථන ඇමතුමක් දීම හෝ email එකක් යැවීම කළ හැක. එසේ කිරීමෙන් අදාල මුදල් ලැබුණු බවට සහතික කර ගත හැක. එසේත් නැතිනම් ඔබට නැවත මුදල් ලබා ගත හැක.

Contact Details: https://www.ets.org/gre/contact#general_inquiries
විභාගයට අදාල ගාස්තු දැන ගන්නේ කොහොමද?

මෙම වෙබ් අඩවියෙන් අදාල සියළුම ගාස්තු දැන ගත හැක.
ප්‍රතිඵල අවලංගු කල හැකි ද?

ඔබ විභාගයේ සෑම කොටසකටම මුහුණ දුන් පසුව ඔබෙන් ප්‍රතිඵල නිකුත් කිරීමට අවශ්‍ය දැයි අසනු ලබනවා. එහිදී ඔබට විභාගය හොඳින් කිරීමට නොහැකි වූවා යැයි 100% විශ්වාස නම් ප්‍රතිඵල නොබලා එය අවලංගු කල හැකියි. එවිට ප්‍රතිඵල ඔබගේ ගිණුම තුළට ඇතුලත් වන්නේ නෑ. කෙසේ වෙතත් මගේ අදහස ප්‍රතිඵල අවලංගු කිරීමෙන් මුදල් ද අපතේ යන නිසා එසේ නොකර සිටීම යෝග්‍ය බවය. ඔබ වරක් ප්‍රතිඵල බැලූ පසු නැවත අවලංගු කල නොහැකි ය.
විභාගයට කොතරම් කලක් මහන්සි විය යුතු ද?

මෙය ඔබගේ මට්ටම හා ඔබ දිනකට කෙතරම් කාලයක් පුහුණුවීමට වෙන් කරනවාද යන්න මත තීරණය වේ. සමහර විට මාසයක පමණ සිට වසරක වැනි කාලයක් දක්වා මෙය ව්‍යාප්ත විය හැකියි. කෙසේ නමුත් ඔබ හොඳින් ශක්තිමත් යැයි හැඟුණු පසුව විභාගයට ලියාපදිංචි විම ඉතා යෝග්‍ය වෙනවා. නමුත් එසේ කල හැකි වන්නේ ඉඩකඩ ප්‍රමාණවත් පරිදි තිබේ නම් පමණි. එම නිසා සැළැස්මකට අනුව කටයුතු කර ඔබට පාඩම් කර අවසන් කළ හැකි කාලය දළ ලෙස ගණන් බලා කලින්ම විභාගයට ලියාපදිංවි වීම සුභදායීය. කෙසේ නමුත් හැකි ඉක්මනින් පාඩම් කර විභාගයට පෙනී සිටීම ඉතා වැදගත්. මන්දයත් සිදු කිරීමට තවත් පියවර රාශියක් ඇති බැවිනි.
ප්‍රතිඵල විශ්වවිද්‍යාලයකට යැවීමට මුදල් අය කරනවාද?

ඔව්. ඒ සඳහා US $ 27 ක මුදලක් එක් ප්‍රතිඵල යැවීමක් සඳහා අය කරනවා. නමුත් විභාගය දිනයේ විභාගය අවසානයේ දී ඔබට නොමිලයේ විශ්වවිද්‍යාල 4කට ප්‍රතිඵල යැවීමට හැකියි. ඔබ විශ්වවිද්‍යාලයේ ප්‍රතිඵල යවන GRE කේත අංකය මතක තබා ගැනීම වැදගත් නොවන අතර එය සෙවුමක් යොදා සොයා ගත හැකියි. කෙසේ නමුත් ඔබ විභාගයට පෙර අයදුම් කිරීමට විශ්වවිද්‍යාල 4 තෝරා ගෙන තිබීම ඉතා වැදගත්. කෙසේ වෙතත් ඔබ අයදුම් කිරීමට පෙර ප්‍රතිඵල යැවීම හෝ ප්‍රතිඵල යැවීමෙන් පසු අයදුම් නොකර සිටීමෙන් කිසිදු හානියක් නොවන බැවින් මේ අවස්ථාවන් ප්‍රයෝජන ගැනීම ඔබට විශාල මුදලක් ඉතිරි කර ගැනීමට හේතු විය හැකියි.
ප්‍රතිඵල යවන්න දවස් කීයක් යනවද?

සාමාන්‍යයෙන් ඔබ විභාගය කළ පසු ප්‍රතිඵල ඔබගේ ගිණුම තුළින් බලා ගැනීමට දින 14ක කාලයක් ගත වෙනවා. නමුත් සාමාන්‍යයෙන් දින 12කින් පමණ පසුව ප්‍රතිඵල අදාල විශ්වවිද්‍යාලය වෙත යවනවා. ප්‍රතිඵල පැමිණි පසු සාමාන්‍යයෙන් දින 1 වැනි කාළයක් තුළ ඔබගේ ප්‍රතිඵල විශ්වවිද්‍යාලය වෙත යවනු ලබනවා.
විභාග දිනයේ කළ යුතු දේවල් මොනවාද?

ඔබගේ අනන්‍යතාවය ඔප්පු කළ හැකි ලියවිලි සහ Admission print out එක රැගෙන යන්න. බොහෝ විට ගමන් බලපත්‍රය යෝග්‍ය වේ. විභාග මධ්‍යස්ථානය CCTV මඟින් සුරක්ෂිත කර ඇති නිසා විභාග වංචා සිදු නොකිරීමට වග බලා ගන්න. අදාල වේලාවට කලින් මධ්‍යස්ථානය වෙත යන්න.
උසස් අධ්‍යාපනය සඳහා GRE අත්‍යවශ්‍ය ද?

කොහෙත්ම නෑ. ඔබට බොහෝ විට GRE අවශ්‍ය වන්නේ ඇමරිකාවේ අධ්‍යාපනය හැදරීමට බලාපොරොත්තුවක් තිබේ නම් පමණයි. මෙයට අමතරව සමහර රටවල සමහර විශ්විවිද්‍යාල එය මූලික අවශ්‍යතාවයක් ලෙස සලකනවා. එවැනි රටක් වන්නේ සිංගප්පූරුවයි (National University Singapore, Nanyang Technological University). නමුත් කැනඩාව, එංගලන්තය, ඕස්ට්‍රේලියාව, ජපානය, චීනය, ඕස්ට්‍රියාව, ජර්මනිය වැනි රටවල් වල උසස් අධ්‍යාපනය සඳහා GRE මූලික අවශ්‍යතාවයක් වන්නේ නෑ. කෙසේ නමුත් විෂය ක්ෂේත්‍රය හා විශ්වවිද්‍යාලය අනුව එය අවශ්‍යතාවයක් විය හැකියි. මේ පිළිබඳව විශ්ව විද්‍යාලයේ වෙබ් අඩවියේ දක්වා තිබෙනවා. සමහර විටෙක එකම විශ්ව විද්‍යාලයේ පාඪමාලාවන් දෙකක් සැලකූ විට එකකට GRE අවශ්‍ය වීමටත් අනෙකට අවශ්‍ය නොවීමටත් හැකි ය. ඇමෙරිකාවේ සමහර විශ්වවිද්‍යාල වලද GRE අත්‍යවශ්‍ය සාධකයක් නොවිය හැක. උදාහරණ වශයෙන් North Dakota State University, New Mexico State University, Nebraska University සැළකිය හැකිය. කෙසේ මේවායේ නමුත් ඇතැම් පාඨමාලාවන් සඳහා GRE අවශ්‍ය විය හැකිය.

පහත වෙබ් අඩවි තුළින් මේ පිළිබඳ වැඩිදුර තොරතුරු ලබා ගත හැකියි.

http://www.wayaftergre.com/2016/04/universities-without-gre/
http://www.mbacrystalball.com/blog/2016/04/06/masters-degree-without-gre/
https://ainsleydiduca.com/phd-programs-no-gre-required/
http://www.msinus.com/content/universities-without-gre-225/#.V6zekPl97IU
http://www.hotcoursesabroad.com/india/test-preparation/how-to-prepare-for-gre-exam/masters-in-usa-without-gre-gmat/

කෙසේ නමුත් මේ සඳහා අනෙක් සාධක ද බලපානව. ඔබට හොඳ GPA එකක් සහ ප්‍රබල Recommendations තිබේ නම් GRE යනු එක් සාධකයක් පමණක් විය හැකියි. නමුත් එසේ නොවන විට හොඳ GRE ලකුණක් කරා යෑම උසස් අධ්‍යාපන මඟ සුරක්ෂිත කර ගැනීමට හොඳ රුකුලක් වනු නොඅනුමානයි. මීට අමතරව හොඳ SOP එකක් ද CV එකක් ද තිබීම අවශ්‍ය වෙනවා.එමෙන්ම IELTS හෝ TOEFL ලකුණු ද මේ සඳහා බලපානවා.

GRE අවශ්‍ය නොවී ලොව ප්‍රමුඛ පෙළේ විශ්විවිද්‍යාල වලට තේරී පත් වූ අය අප අතර ඕනෑ තරම් සිටිනවා. ඇමරිකාව උසස් අධ්‍යාපනය හැදෑරීම සඳහා පහසුවෙන් යා හැකි යැයි මතයක් අප අතර තිබෙනවා. නමුත් එය එසේ නොවන බව මගේ අත්දැකීමයි. ඔබට GRE කිරීමට නොහැකි නම් පසුබට වන්න එපා. වෙනත් මාර්ග ඕනෑ තරම් තිබෙනවා. නමුත් ඒ සඳහා අවම වශයෙන් හොඳ GPA 1 තිබීම ප්‍රධාන අවශ්‍යතාවයක්.

කෙසේ නමුත් කරන්නන් වාලේ GRE නොකර හොඳ අවබෝධයකින් හා අත්‍යවශ්‍යම නම් පමණක් කිරීමෙන් කාළයත්, මහන්සියත් මුදලුත් ඉතිරි කර ගත හැකි වේ.