බැලූ බැල්මට මෙය යෝධ ඇසක් මෙන් පෙනෙනු ඇත. නමුත් මෙය හබල් දුරේක්ෂය මගින් ගන්නා ලද HD 181327 නම් තාරකාවේ ඡායාරූපයක් බව පැවසුවහොත් ඔබ එය විශ්වාස කරනවාද? විද්‍යා ප්‍රබන්ධ කථාවක සිතුවමක් මෙන් පෙනුනද මෙය ඔක්තෝබර් පලමු වන දා Astronomical Journal හි පල කරන ලද සමීක්ෂණයක අන්තර්ගත වූ එක් ඡායාරුවක් පමණි. මෙයට වසර බිලියන 4.6 කට පෙර අප සෞරග්‍රහ මණ්ඩලය බිහි වූයේ කෙසේද යන්න වටහා ගැනීමට මෙම අධ්‍යනය සහාය වනු ඇති බව අධ්‍යනය මෙහෙයවූ ඇරිසෝනා සරසවියේ ආචාර්ය ග්ලෙන් ස්නයිඩර් මහතා මාධ්‍යට සඳහන් කර ඇත.
තව දුරටත් ඒ පිලිබඳ කරුණු සඳහන් කරන ඔහු පවසනුයේ සැබවින්ම මෙම ව්‍යුහයන් අතිශය සංකීර්ණ ත්‍රිමාණ ව්‍යුහයන් බවත් ඇතැම් උප කොටස් හඳුනා ගත නොහැකි වූවද ග්‍රහලෝක විමේ හැකියාවක්ද පවතින බවයි. කෙසේ වෙතත් මෙහි උපතට නිශ්චිත හේතුවක් සඳහන් නොවන අතර පද්ධතියේ බාහිර සීමාව තුල ආගන්තුක වස්තූන් දෙකක් ගැටීම මෙයට හේතු වන්නට ඇතැයි විද්‍යාඥයන් විශ්වාස කරයි.

මෙම ඡායාරූපය ගැනීමේදී හබල් දුරේක්ෂය සතු අනවශ්‍ය සූර්ය කිරණ වල බාධාව මග හරිමින් අනෙකුත් වස්තූන්හි දුබල ආලෝකය ඡායාරූපයට නැගීමේ හැකියාවද වැදගත් වී ඇත. 1995 වර්ෂයේ සිට මේ දක්වා මෙයට සමාන වස්තූන් 4000 පමණ හඳුනාගෙන ඇතත් මෙසේ පැහැදිලිව ඡායාරූපයට නගා ඇත්තේ ඒ අතරින් අතලොස්සක් පමණි.

Reference – www.dailymail.co.uk