“ආදරය ” කියන අකුරු හතරෙ ඇත්ත තේරුම එක එක පුද්ගලයාට දැනෙන්නෙ වෙනස් විදිහට.
ඒක හැම චිත්තක්ෂනයක් ගානෙ ම ලේ රත් කරන හරිම පුදුම, සුන්දර, භයානක, අහින්සක, ගැඹුරු සිතුවිල්ලක්.
කර්ණිකාවක් හැකිලිලා කෝෂිකාවකට රුධිරය ගලන් යන මොහොතක් පාසා හදවත දිය කරලා යන හැඟීමක්. අඩ සඳ කපාට වැහෙන වාරයක් වාරයක් පාසා හිත කීරි ගැහෙන හැඟීමක්.
හදවතේ ගැඹුරුම තැන ස්පර්ෂ කරන ආත්මය නිරුවත් කරන හරිම සියුම් සිතුවිල්ලක්.
ඒත් මොකද්ද මේ ආදරය කියන්නෙ??
සමහරු ආදරේ වැඩි කමට ලං කරගන්නවා. සමහරු ආදරේ වැඩි කමට ලං වෙන්න බය වෙනවා. සමහරු ආදරේට සීමා දානවා. ඒත් සමහරුන්ගෙ ආදරේට මායිම් නෑ. සමහරු ආදරේ ප්‍රකාශ කරනවා. සමහරු ආදරේ හිතේ තියාගෙන් ඉන්නවා. සමහරු පිස්සුවෙන් ආදරේ කරලා ලොකු ආදරයක් බලාපොරොත්තු වෙනවා. ඒක ලැබුනෙ නැති උනාම ආදරේ වෛරයක් කරගන්නවා.සමහරු ආදරය වෙනුවෙන් මුළු ජීවිතයම කැප කරනවා.සමහරුන්ට ටික කාලෙකින් ආදරේ එපා වෙනවා.
සමහරු රූපයට ආදරය කරනවා. ආස කරනවා. ආසාව ආදරය කියලා රැවටෙනවා. සමහරු හිතට සිතුවිලි වලට ආදරය කරනවා. සිතුවිලි වෙනස් වුනාම එපා වෙනවා සමහරු මැරෙන මොහොත වෙනකන්ම ආදරේ කරනවා. සමහරු ආදරේට කියලා මැරෙනවා. සමහරු ආදරේ තද කරගෙන අනිත් කෙනාගෙ සතුටට ඉඩ හරිනවා.සමහරු ආදරෙයි රාගයයි එකක් කියලා කියනවා.සමහරු ආදරේ රාගයෙන් තොර සද එලිය වගේ අචින්ත්‍යයි කියලා කියනවා. මේ හැම විදිහෙන් ම පෙන්නන්නෙ එකිනෙකා ආදරය කරන විදි. ඒත් ආදරය කියන්නෙ මෙන්න මේකයි කිය්ලා හරි අර්ථ විග්‍රහයක් දෙන්න නං කාට වත් ම බැරි වෙයි. මොකද ඒක එක එක්කෙනාගෙන් එක එක්කෙනාට වෙනස්. ආදරය කරන්නෙ හිතින් ද කයින් ද එහෙම නැත්තන් වචනයෙන් ද ආදරය කියන්නෙ සිතුවිල්ලක් විතරද එහෙම නැත්තන් ක්‍රියාවක්ද දැනෙන දෙයක් ද හිතට දැනෙනවද මොලේට දැනෙනවද හදවතට් දැනෙනවද කියලා කියන්න කාටවත් ම බෑ.
ඒත් ආදරය කියන්නෙ මුලු ඇගම හිරි වට්ටලා යන දෙයක්. සමහර වෙලාවට ඒක මහ පිස්සුවක්. සමහර වෙලාවට ඒක හරි ලස්සන දෙයක්. සමහර වෙලාවට හරිම දුකක්. ඒත් මිනිස්සු ඒක පස්සෙ දුවන්නෙ ඒ රසයට වෙන මොන රසයකටවත් නැති විදිහට තදින් ඇබ්බැහි වෙච්ච නිසා.හැම සෛලයකින්ම ඒකෙ රස දැනෙන නිසා.හැම නහරයකටම ඒ සංවේදනය දැනෙන නිසා. ඒ රසය කොච්චරද කිව්වොත් ආදරය විතරක් නෙවෙයි විරහවත් වේදනාවක් වුනත් ඒකත් රස විඳිනවා. විරහ ගීත නැවත් නැවත් අස අස ඒ රසයට වහ වැටෙනවා. විරහව සිහි කර කර අත්දකිමින් විඳිනවා. ඇත්තම කිව්වොත්
“එකකට එකක් සම්බන්ද නැති , මෙන්න මේකයි කියලා කියන්න හේතුවක් නැති දේට මිනිස්සු කියන්නෙ ආදරය කියලා ”
-සමනල සංද්වනිය-
ආදරය – මිනිස්සුන්ව පිස්සු වට්ටවන, මිනිස්සුන්ව වෙනස් කරන මොකද්ද කියලා හිතා ගන්නවත් බැරි මේ ලෝකෙ තියෙන සංඛීර්නම සංවේදනය කිය්ලා කිව්වොත් මම හිතන්නෙ මම නිවැරදියි.