මර්ලින් කියපු ගමන් ඔබේ හිතේ මැවෙන්නේ එක රූපයයි.ඒ Colin Morgan ගේ රූපය.දැන් අහන්න එපා ඒ කව්ද?එයාගෙයි මර්ලින් ගෙයි සම්බන්ධය මොකක්ද කියලා.එක්කෝ ඒකත් කියන්නම්කෝ. Colin Morgan තමයි Merlin කථා මාලාවේ Merlin කියන තරුණ ඉන්ද්‍රජාලකයාගේ චරිතයට පණ පොවන්නේ.ඔහු උතුරු අයර්ලන්ත ජාතිකයෙක්.හැබැයි Merlin කථා මාලාවෙන් පස්සේ නම් ඔහුව අයර්ලන්තේ විතරක් නෙමෙයි මුළු ලෝකයම දන්න චරිතයක් බවට පත් වෙනවා.
ඒකට අඩිතාලම නම් දාන්නේ Julian Jones, Jake Michie, Johnny Capps සහ Julian Morphy යන හතර දෙනා එකතු වෙලා. ඔවුන් තමා Merlin කථා මාලාවේ නිර්මාණකරුවන්. 2008 වසරේදි තමයි මුලින්ම Merlin කථා මාලාව ප්‍රේක්ෂක අප ඉදිරියට පැමිණෙන්නේ. එතැන් පටන් දැඩි ප්‍රේක්ෂක ආකර්ෂණයට ලක් වන මේ කථා මාලාව season 5ක් දක්වා එළි දැක්වෙන්නේ, එය තිරගත වූ BBC මාධ්‍ය ජාලයටත් ප්‍රසිද්ධියක් හිමි කර දෙමින්.
Merlin කථා මාලාවට පාදක වන්නේ මහා බ්‍රිතාන්‍යයේ Camelot රාජධානියේ රජකම් කරපු යූතර් පෙන්ඩ්‍රැගන් ගේ සහ ඔහු පුත් ආතර් පෙන්ඩ්‍රැගන් ගේ පාලන සමයේ සිදුවුණු සිද්ධීන් පෙලක්. මර්ලින් කියන්නේ ආතර් ගේ මෙහෙකරුවා. ඒ වුනත් ආතර් සහ මර්ලින් අතර තිබුණේ සහෝදරකමකටත් එහා ගිය බැඳීමක්. එහා ගියා කිව්වහම වැරදියට හිතන්න එපා ඉතින්. (ඒ මොකක්ද කිව්වේ කියලා තේරුණේ නැත්නම් ඒ ගැන වැඩිය හිතන්න යන්න එපා) කෙල්ලොනේ…. මොනවා කරන්නද ඉතින්….
කොහොමහරි හැබැයි ඉතින් කථා මාලාවේ අන්තිම episodes ටිකට එනකන් ම ආතර්, මර්ලින් කියන්නේ ඇත්තටම කව්ද කියලා දැනගෙන හිටියේ නම් නැහැ. ඔබ ඒ කථා මාලාව බලපු කෙනෙක් නම් ඒ ගැන හොඳටම දන්නවා ඇති. කොහොමහරි ඉතින් යූතර් ගේ කාලේදී, ඒ කියන්නේ ආතර් ගේ තාත්තාගේ පාලන කාලේදී මායාකරුවන්ට කිසිම ඉඩක් ලබුණේ නෑ නිදහසේ ජීවත් වෙන්න. හැමෝටම වාගේ උරුම වුණේ මරණය විතරයි. ඒත් යූතර් දැනන් හිටියේ නැහැ තමන්ගේ පුතාගේ සේවකයාත් මායාකරුවෙක් කියලා. කොටින්ම කිව්වොත් යූතර්ගේ දුව, ඒ කියන්නේ මොගානා පෙන්ඩ්‍රැගන් කියන්නෙත් මායාකාරියක්. ඇය තමයි අවසානයේදී Camelot රාජධානියේ ප්‍රබලතම හතුරා බවට පත් වෙන්නේ. ඔය අතරේ යූතර් තම ජීවිතයෙන් සමුගන්නවා. ඒකට හේතු වෙන්නෙත් මොගානා ගේ මායාව තුල සැඟවුණු තම පියා කෙරෙහි වූ වෛරය. මේ අතරේ තවත් අපූරු සිද්ධියක් සිදු වෙනවා. ඒ තමයි ආතර්, රජ වාසලේ මෙහෙකාරියක් සමඟ ආදර පලහිලව්වක පැටලෙන්නේ සෑම දෙනාවම යම් මොහොතකට උන් හිටි තැන් අමතක කරවමින්. කොහොමහරි ඒ ආදරය අවසන් වෙන්නේ ඉතින් ඔවුන් දෙදෙනා ගේ විවාහයෙන්. ඔහු අතගත් ඇය නමින් ග්වෙන්.
සාමන්‍යයෙන් ඉතින් සතුරු බලවේග කියන්නේ සාමාන්‍ය දේවල් නේ රාජධානියකට. Camelot කියලත් වෙනසක් වුණේ නැහැ ඉතින්. Camelot රාජධානියට එරෙහිව එන සතුරු ආක්‍රමණ, කුමන්ත්‍රණ වලට ආතර්ට තනියම මුහුණ දෙන්න සිද්ධ වුණේ නම් නැහැ. ඔහුට හිටියා සුපිරි සගයෝ කිහිප දෙනෙක්. ඒ තමයි knights ලා. ලියෝන්, ග්වෙන්, පර්සිවෙල්, ලාන්ස්ලොට්, එලියොන් කියන්නේ ඒ සෙට් එක.
ඊට අමතරව බෙහෙත් කරන්නත් සුපිරි බුලට් එකක් හිටියා. ඒ තමයි ගයස්. ඔහු මහළු චරිතයක්. හැබැයි ඔහුටත් මායා බලයක් තිබුණා. ඔහු තමයි මර්ලින්ගේ හැම දෙයකටම උදව්වට හිටියේ.
කොහොමහරි කථාව අවසානයේදී ආතර්ට තම ජීවිතයෙන් සමුගන්න සිද්ධ වෙනවා. ඒ මර්ලින් තමන්ගේ රජුව… ඊටත් වඩා තමන්ට සහෝදරයෙක් වගේ හිටපු ආතර්ව බේරගන්න දරපු හැම උත්සාහයක්ම ව්‍යර්ථ කරමින්. ආතර්ගේ මරණයට හේතු වෙන්නේ මෝඩ්‍රඩ්. ඔහුත් මායාකරුවෙක්. ඔහු කලින් ආතර්ගේ උදව්වට හිටපු දක්ෂ knight කෙනෙක්. හැබැයි ඉතින් මොගානා ගේ මායාවන් නිසා ඔහු ආතර්ගෙන් වෙන් වෙලා මොගානා එක්ක එකතු වෙනවා. ඒකේ ප්‍රතිඵලයක් විදියට තමයි අවසානයේ ආතර්ට මරණය උරුම වෙන්නේ. ඒ scene එකේදි නම් බලන හැමෝගෙම ඇස් වලට කඳුලක් උනනවා. මොකද ඒ scene එක හදවතේ ගැඹුරුම තැනකට දනවන්නට නිර්මාණකරුවා ගත් උත්සහය 100% ක්ම සාර්ථක කරවමින්.
ඕක තමා ඉතින් කථාවේ සාරාංශය. හැමෝම වාගේ බලන්න ඕන කථාවක්. කලින් බලල නැත්තන් අනිවාර්යයෙන් හොයාගෙන බලන්න. එක පාරක් බැලුවොත් ආයෙ නොබලා ඉන්නෙත් නෑ ඉතින්.
Image Courtesy :
http://www.tokkoro.com/1486796-merlin.html
https://www.myentertainmentworld.ca/2013/01/the-other-british-boy-wizard/
http://fresoftlentainnovations.netlify.com/skachatj-igra-merlin-po-motivam-seriala-merlin.html