කොළඹ විශ්වවිද්‍යාලය යනු කවදත් අධ්‍යාපනයට පමණක් නොව ක්‍රීඩාවට ද අතිශයින්ම ජනප්‍රිය විශ්වවිද්‍යාලයකි. කුමාර් සංගක්කාර , ජෙහාන් මුබාරක්, සුනිල් ගුණවර්ධන වැනි ශ්‍රේෂ්ඨ ක්‍රීඩකයන් ඊට නිදසුන් සපයයි. අද දිනයේ අපේ කථා නායකයා ද යම් දිනක එම තරු අතර ම පායනවා නියත ය. ජාතික බේස්බෝල් කණ්ඩායමේ නිත්‍ය ක්‍රීඩකයෙකුවන මොහු විශ්වවිද්‍යාල කණ්ඩායමේ නායකත්වය ද හෙබ විය. එපමණක් නොව විශ්වවිද්‍යාල එල්ලේ කණ්ඩායමේ ද කැපී පෙනෙන අයුරින් දක්ෂතා දැක්වීමට සහ බේස්බෝල් ක්‍රීඩාවෙන් මෙන් ම එල්ලේ ක්‍රීඩාවෙන් ද විශ්වවිද්‍යාල වර්ණ දිනා ඇති මොහු, 2014 වර්ශයේ කොළඹ විශ්වවිද්‍යාලයේ වසරේ ක්‍රීඩකයාට හිමි සම්මානය ද දිනා ගත්තේ ය. මේ අන් කවරෙකුවත් නොව, “සාලි” යන නාමයෙන් විශ්වවිදයාලයේ සැවොම අතර ජනප්‍රිය සාලිය අනුරාධ යි.
- ඉතින් සාලිය කොහොමද? හොදින් ඉන්නවා. 2014 බේස්බොල් ලීග් එක සදහා සුදානම් වෙනවා.
- තමන් ගැන විස්තරයක් කරොත්… මම සාලිය අනුරාධ විජේසිංහ, ඉපදුනේ 1990/5/27, පදිංචිය මිනුවන්ගොඩ
- ක්‍රීඩා ජීවිතය පටන් ගත්ත විදිහ ගැන පොඩි විස්තරයක්… මිනුවන්ගොඩ නාලන්ද විද්‍යාලයේ Athletics කරා. ඊට පස්සේ කොළඹ රාජකීය විද්‍යාලයට ආවා. ක්‍රිකට් ගහන්න ආසාවක් තිබ්බත්, පුහුණුවීම් ඉවරවෙලා ගෙදර යන්න තිබ්බ අපහසුතා හින්දා ක්‍රීඩා කරෙ නෑ. නමුත් sport meet එකේදි hurdles කරා. 2003දි John Tarbet ගියා.පස්සේ University ඇවිත් බේස්බෝල් සහ එල්ලේ කරා.
- බේස්බෝල් ගැන කියනවනන්…. මම බේස්බෝල් ක්‍රීඩාව ආරම්භ කරේ 2011දි. එ වෙනකන් ම බේස්බෝල් ගැන කිසිම දෙයක් දැනගෙන හිටියෙ නැහැ. නමුත් ටීම් එකේ අයියලා මට කියලා දුන්නා. විශේෂයෙන් ම පීරිස් අයියා,දම්පිය අයියා සහ චමල් අයියල ව මතක් කරන්න ඕන.ටීම් එකක් විදිහට හැමෝම කට්ට කාගෙන practice කරා. එ හින්දම මට 2012 කණ්ඩායමට තේරෙන්න පුලුවන් උනා.ඊට පස්සේ ORBC කණ්ඩායමට සෙල්ලං කරන්න chance එක හම්බුනා. ඒ විදිහට තමයි ක්‍රීඩාව ආරම්භ කරේ. අද මම මෙතන ඉන්නේ මගේ විශ්ව විද්‍යාලය හින්ද යි.මට එ ගැන ආඩම්බරයි. Club එකෙන් මගේ අඩුපාඩු හදලා, මාව national එකට සුදුසුකම් ලබන තත්වෙට පත් කරා. මම 2013 දි ජාතික කණ්ඩායමට සුදුසුකම් ලැබුවා. 2013 11th west Asia baseball championship එකේ Runners up වෙන්න අපේ ජාතික කණ්ඩායමට හැකියාව ලැබුනා.
- එල්ලේ ක්‍රීඩාව ගැන කිව්වොත්….. බේස්බෝල් වගේ ම හුගක් කට්ට කාගෙන කරන්න ඕන සෙල්ලමක් තමයි එල්ලේ කියන්නෙ.මම 2013 තමයි මුලින් ම එල්ලේ පටන් ගත්තේ.එල්ලේ ක්‍රීඩාවත් ගොඩක් උපකාර උනා මට බේස්බෝල් වලට තිබෙන දක්ෂතාව වැඩි දියුනු කරගන්න.බේස්බෝල් සහ එල්ලේ කියන ක්‍රීඩා දෙකට ම කට්ටකාගෙන practice කරපු හින්දා අපිට පුලුවන් උනා ජයග්‍රහණ රාශියක් ලබාගන්න.විශේෂයෙන් කියන්න ඕන මම අද මේ ඉන්න තැන ඉන්නේ අපේ විශ්ව විද්‍යාලය හින්දා. හුගක් කැපකිරීම් කරා මම මෙතනට එන්න.මට මගේ මිත්‍රයන්ගෙන් අසීමිත ලෙස උදව් උපකාර ලැබුනා.එ හැමෝමට ම මම ස්තූතිවන්ත වෙනවා.
- මොනවද සාලියට ක්‍රීඩා කරද්දි සිදුවුන අමතක නොවන සිදුවීම්??? හප්පා…ගොඩක් තියනව(සිනාසෙමින්)…බේස්බෝල් ප්‍රැක්ටිස් ගිය දෙවනි දවසෙ බෝලයක් වැදිලා නියපොත්තක් ගැලවුනා. 2013 SLUG(Sri Lankan University games) එකේ එල්ලේsemi final එකේදි මොරටුව University එකත් එක්ක තිබ්බ match එක draw උනාම ලැබුනු අමතර බෝල 5හේදි අපි ලකුණු 3ක් ලබාගත්තා. ඒකෙන් ලකුණු 2ක්ම ගැහුවෙ මම.ඒ අවුරුද්දේ අපි ශූරතාව දිනා ගත්තා. 2014 මම captaincy එක කරපු අවුරුද්දේ බේස්බෝල් චැම්පියන්ස්ලා වෙච්ච එක ජීවිතේට අමතක වෙන්නේ නෑ.
- ජාතික මට්ටමේ විශේෂ සිදුවීම් නැද්ද? 2013 පළමුවර National tour එක ගිය එක කවදාවත් අමතක වෙන්නේ නෑ. 2014 National Double Elimination Tournament එකේදි අපිට පුලුවන් උනා චැම්පියන්ස්ලා වෙන්න. ඒ Tournament එකෙ best pitcher සහ most valuable player වෙන්න මට පුලුවන්කම ලැබුනා.
- ජාතික වර්ණ(National Colors),විශ්ව විද්‍යාලීය වර්ණ(University colors) සහ කොළඹ විශ්ව විද්‍යාලීය(Colombo University Colors) වර්ණ ලාබියෙක් වීම ගැන මොකද හිතෙන්නේ?නිහතමාණී සතුටක් තියනවා. නමුත් මම මේ ක්‍රීඩා දෙකේ ඉදපු ක්‍රීඩකයන්ගෙන් ඉගන ගත්ත දෙයක් තමයි කවදාවත් colors බලාගෙන සෙල්ලං කරන්න එපා කියන එක.විශේෂයෙන් පීරිස් අයියා නිතර ම කියන එක දෙයක් තමයි, “දිනන එක නෙමේ වැදගත්,දිනන්න සූදානම් වෙන එක”. සෑම වර්ණයකට ම වඩා මට වැදගත් ඒ ක්‍රීඩකයන් එක්ක ක්‍රීඩා කරපු ඒ මතකයන්.විශ්ව විද්‍යාලය වෙනුවෙන් යමක් කරන්න ලැබීම ගැන මම ආඩම්බර වෙනවා.
- ක්‍රීඩා ජීවිතයට උදව් කරපු අය ගැන සටහනක් කරොත්… ගොඩක් අය ඉන්නවා.පවුලේ සියලු දෙනාට අමතරව ORBC එක, University Baseball team එක සහ University Elle team එකට.ඔවුන් නැත්නම් අද සාලිය මෙතන නැහැ කියන එක විශේෂයෙන් කියන්න ඕන.තව Physical Department එකේ සියලුම සර්ලා මිස්ල මට සහය දුන්නා.Inter Uni කාලෙට අපි ඉතින් සතියෙන් දවස් 6ක් විතර ඉන්නෙ Ground එකේ. එ කාලෙට ඉතින් යාලුවොන්ගෙ උදව්වෙන් තමයි exam ගොඩ දාගත්තේ. ඒ කාලෙදි මං වගේම ground එකට ඇවිත් මාත් එක්ක practice කරපු මගේ team mates ගැනත් විශේෂයෙන් මතක් කරන්න ඕන.
- ඉදිරියේදි ජාතික සංචාර එහෙම නැද්ද? 12th West Asia Tour එක තියනවා පකිස්ථානයේ පෙබරවාරි මාසයේ අග. නමුත් ආරක්ෂාව පිලිබද ප්‍රශ්න නිසා අපි එක සංචාරයට එක්වෙන්නේ නෑ.
- අවසන් වශයෙන් මොනවද සාලියට කියන්න තියෙන්නේ… විශේෂයෙන් University එන නංගිලා මල්ලිලාට කියන්න තියන්නේ අනිවාර්‍යයෙන් sport එකක් කරන්න. Degree එක කියන්නේ අධ්‍යාපනික සුදුසුකමක් විතරයි.Sports වලින් අපිට ගොඩක් දේවල් ඉගන ගන්න පුලුවන් සමාජයේ ජීවත් වෙන්න උදව් වෙන. අලුත් මිතුරු මිතුරියන් මුණගැහෙන්න පුලුවන්.ක්‍රීඩාව සහ අධ්‍යාපනය යන දෙකම තියන කෙනෙක්ට හුගක් ඉහලට යන්න පුලුවන්.එ හින්දා හැමොම තමන්ගේ දක්ෂතාව හදුනගෙන,ඊට ගැලපෙන ක්‍රීඩාවක යෙදෙන්න.කරන දේ කැපවීමෙන් සහ ආදරයෙන් කරන්න… එතකොට ලැබෙන දේවල් නිකංම ලැබෙයි.
