කොළඹ සරසවියේ වසරේ ශිෂ්‍යයා, හසානි පතිරණ

Anjali, Blog Team 1 Comment

2017,අගෝස්තු මස දෙවන දින කොළඹ බණ්ඩාරණායක අනුස්මරණ ශාලා පරිශ්‍රයේ පැවති කොළඹ විශ්වවිද්‍යාලයීය 2016 වර්ෂය සඳහා වූ උපාධි ප්‍රදානෝත්සවයේ දී කොළඹ විශ්වවිද්‍යාලයේ වසරේ ශිෂ්‍යයා සඳහා වූ සම්මානය දිනගනු ලැබූයේ හසානි පතිරණ සොයුරියයි. ඇයත් සමඟින් FoS Media අප කළ සොඳුරු කතාබහයි මේ.

අපි අපේ කතාව පාසල් කාලයෙන් ආරම්භ කළොත්, පාසල් කාලයේදී වැඩිපුරම කැමති විෂය වුණේ?

ගණිතය විෂයට මම ගොඩක් කැමැත්තෙන් හිටියා.

ගණිතය කැමතිම විෂය වෙන්න විශේෂ හේතුවක් තිබුණාද?

පොඩිකාලේ අපේ ගෙදර පරිසරය ඒකට ගොඩාක් බලපෑවා. අපිව ගණිතයට හුරු කරන්න තාත්තා විශේෂ උපක්‍රම භාවිතා කළා. අපි පොඩි කාලේ ගමන් යද්දි තාත්තා අපිට අංක තහඩු වල ඉලක්කම් එකතු කරන්න පුරුදු කළා. අක්කයි මායි තරඟෙට එකතු කළා. ඒ වගේම මට ඉක්මනට ගණන් එකතු කරන්න, අඩු කරන්න හැකියාවත් තිබුණා. ඒ නිසාම පොඩි කාලේ ඉඳලම ගණිතයට විශේෂ කැමැත්තක් සහ උනන්දුවක් ඇති වුණා.

Campus එන්න කලින් Campus එක ගැන තිබුණු අදහස මොනවගේ ද?

එන්න ලොකු ආසාවක් තිබුණා. ඇවිත් මොකද කරන්නෙ කියලා විශේෂ අදහසක් නොතිබුණත් ඇවිත් කරන දේ හරියට කරන්න අරමුණක් තිබුණා.

Campus ආවට පස්සේ මොකද හිතුණේ?

මම කොළඹ කෙනෙක් නොවුන නිසා මට පොඩි කුතුහලයක් තිබුණත්, කොළඹ පරිසරයේ ජීවත් වන අභියෝගයට මුහුණ දෙන්න ආසාවක් තිබුණා.

පළමු වසරේ සිට අවසන් වසර දක්වා Academic වැඩ සාර්ථකව කරගෙන ගියේ කොහොමද?

මම වැඩක් කරන විට ඒ දෙය කළ යුතුමයි කියල හිතලා අවසන් වන මහන්සිවෙලා නමුත් තුරුම ආසාවෙන් විනෝදයෙන් කළා. අදාළ මොහොතෙදි අදාළ දේ කළා මිසක් කරන්න පුළුවන්ද බැරිද කියලා හිතලා කාලය නාස්ති කළේ නැහැ.

අධ්‍යාපන කටයුතු සමඟ බාහිර වැඩත් ගොඩක් කළා නේද?

ඔව්. මම ක්‍රීඩා 3ක් කළා Athletics, Netball සහ Basketball . ඒ වගේම මම Inter-faculty Hockey Team එකත් නියෝජනය කළා.

ලබපු ක්‍රීඩා ජයග්‍රහණ අතුරින් වැඩිපුරම සතුටු වන අවස්ථාවක් ගැන මතක් කළොත්?

මම 2 nd year එකේදී ඔක්කොම Universities වලින් ළමයි තෝරගෙන Basketball team එකක් හැදුවා. 3rd year සහ 4 th year අක්කලා එක්ක තරඟ කරන්න වුණ නිසා ඒ team එකට select වෙයිද කියල චකිතයෙන් හිටියත් මායි අක්කයි දෙන්නම ඒ team එකට select වුණ දවස. ඒ වගේම Final year එකේදි Basketballවලින් Inter-University runners up වෙන්න ලැබීමත් අමතක කරන්න බැහැ. පහළට වැටිලා තිබුණු අපේ basketball team එක ඉහළට ගේන්න පුළුවන් වීම ගැනත් ගොඩාක් සතුටු වෙනවා.

බාහිර වැඩත් එක්ක Academic වැඩ සමබර කර ගත්තේ කොහොමද?

මට ඒක ලොකු අභියෝගයක් වුණා. මම Sports තුනක් කරපු නිසා මට දවස් පහම practise යන්න වුණා. ඒත් මම Lectures cut කළේ නැහැ. මම අසනීප වුණත් Lectures ගියා. Lectures හොඳට අහගෙන ඉඳලා එවෙලේම තේරුම් අරන් මගේම note එකක් හදා ගත්තා. ඒ
වගේම මම tough time-table එකක් හදා ගෙන හිටියේ. මම Matches අතරතුරේදි පාඩම් කරපු අවස්ථාත් තිබුණා.

ජීවිතේ අමතක කරන්න බැරි සිදුවීම් වෙලා ඇතිනේ ද?

ඔව්, රසබර සිදුවීම් නම් ගොඩාක් වෙලා තියනවා.

ඒවායින් එකක් මතක් කළොත්?

අපිට Netball පවුලත් Basketball පවුලත් ඒවගේම Athletics පවුලත් තිබුණා. ඒවා එක්ක බැදුණු රසවත් සිදුවීම් ගොඩාක් තියනවා.
ඒ වගේම මගේ නිවුන් සහෝදරිය මගෙත් එක්කමයි Campus එකේ ඉගෙන ගත්තෙ. අපි එකම විදිහටමයි අදින්නෙත්. ඉතින් අපේ යාළුවන්ට අපිව වෙන් කරළා අඳුර ගන්න බැරිවුණ නිසා සිදුවන සිදුවීම් මතක් වෙද්දි අදටත් හරිම රසවත්.

ඔබේ නිවුන් සහෝදරිය ගැන විශේෂයෙන් මතක් කළොත්?

ඇය ගැන විශේෂයෙන් මතක් කරන්න ඕනි. මගේ වැඩ සමබරව කරගන්න අක්කා මට ගොඩාක් උදව් කළා. මගේ අම්මා තාත්තා ළඟ ඉන්නව වගේ සහයෝගයක් අක්කා දුන්නා. ඇත්තටම මේ ජයග්‍රහණ්යේ නියම උරුමකාරිය අක්කා තමයි.

Campus එකේ ඉන්න අයට සහ Campus එන්න බලාපොරොත්තුවෙන් ඉන්න අයට දෙන්න තිබෙන පණිවුඩය මොකක්ද?

මට මුලින්ම කියන්න ඕනි හොඳ මිනිසෙක් වෙන්න කියන එක. තමන් ළඟ තිබෙන මානුෂීය ගතිගුණ වැඩි දියුණු කරගෙන සමාජයට දෙයක් ලබා දෙන්න. ඒ වගේම යම් දෙයක් පටන් ගනිද්දි තමන් තමන් ගැනම ආත්ම විශ්වාසයක් ඇති කරගන්න. අභියෝග වලට අසාවෙන්,විනෝදයෙන් මුහුණ දෙන්න. මොනම වෙලාවකදිවත් තමන්ව තව කෙනෙක් එක්ක සන්සන්ඳනය කරන්න එපා. වෙනත් අය දෙන Negative Comments බාර ගන්නත් එපා. Campus එකේදි මම Academic වගේම Sports ගොඩාක් කළා. ඒ නිසා මම අද උපරිම
තෘප්තියකින් තමයි Campus එකෙන් out වෙන්නෙ. යමක් කරද්දි කාලය මදි කියලා පසුතැවෙන්න එපා. ලැබෙන හැම මොහොතක්ම ප්‍රයෝජනයට ගන්න. ඔබට උවමනාව තියනවනම් ඒ දෙය කරන්න අමාරු වෙන්නෙ නැහැ.

ඉදිරි බලාපොරොත්තු මොනවාද?

මෙතනින් එහාටත් වැඩිදුර ඉගෙන ගන්න තමා බලාපොරොත්තු වෙන්නෙ.

 

හසානි සොයුරියගේ අනාගතයට FOS Media අපද සුබ පැතුම් එක් කරන්නෙමු.

පිළිවිසීම: අංජලී හේෂානි සහ ගමිත සේනානායක.