අළුත් ලොවකට අළුත් ගමනක්

Share

කොළඹ විශ්ව විද්‍යාලයේ විද්යා පීඨයේ තොරතුරු තාක්ෂණ ඒකකය පසුගිය මාස කිහිපයක් තුල අති විශාල කාර්යයන් රාශියකට අත ගැහුවා. විද්‍යා පීඨය සඳහා නව වෙබ් අඩවියක්ද නිර්මාණය කරන්නට යෙදුණු ඔවුන් විද්‍යා පීඨය මෙන්ම කොළඹ විශ්ව විද්‍යාලයද නියෝජනය කරමින් ප්‍රථම වතාවට රාජකාරී මට්ටමින් සිසුන් සඳහාම වෙන් වුනු නව බ්ලොග් අඩවියක්ද නිර්මාණය කිරීම ආරම්භ කලා. නව තාක්ෂණය, දැනුම වින්දනය වපුරවමින් නව ලොව හා ගැටෙන්නට ගත් කුඩා වෑයමක සාර්ථක ප්‍රතිපලයක් ලෙස මෙම අඩවිය හඳුන්වන්න පුළුවන්.සිසු නිර්මාණ සඳහා මහඟු තෝතැන්නක් වන මේ අඩවිය කඩදාසි කොළයට නිමාවක් තබමින් නිර්මාණ කරණය ඩිජිටල් කරනයට ලක් වූ පාරාදීසයක් ලෙස සැලකිය හැකි. එමෙන්ම මෙතෙක් ඇගයීමකට ලක් නොවුණු විශේෂ දක්ෂතා සපිරි සිසුන්ගේ නිර්මාණ කළ එළි දක්වන්නට ද මෙන්ම එම සිසුන්ට දිරි දීමක් වශයෙන් ද මෙම වෑයම සැලකිය හැකි. විද්‍යා පීඨයේ සිදු වු සහ සිදු වන විශේෂ සිදු වීම් විශේෂ ඇසකින් විමර්ශණය කරන්නට ද මෙම අඩවිය යොදා ගැනීමද සුවිශේෂත්වයක්. ඒ වගේම තමයි ඡායාරූපකරණය සඳහාම වෙන් වූ කළාපයක් මෙම අඩවියේ තිබීම මඟින් වෘත්තීය ඡායාරූපකරුවන්ට තම නිර්මාණ ප්‍රදර්ශනය කරන්නට ද ආධුනික ඡායාරූප ශිල්පීන්ට ද ඒ ඇසුර ලබා ගනිමින් ඉදිරියට යන්නට මහඟු අත්වැලක් මෙමඟින් සපයනු ලබනවා..

ඉතින් මේ කටයුත්ත පිටිපස්සෙ විශාල පිරිසක් ඉන්නවා. නම් වශයෙන් කියන්න අමාරු වුනත් ඒ හැම දෙනාගෙම දාඩිය මහන්සියෙන් විද්‍යා පීඨයේ බ්ලොග් අඩවිය තම මූලික වැඩ කටයුතු අවසන් කරලා සයිබර් අවකාශයට නිදහස් උනා. අඩවියේ තාක්ෂණික කටයුතු තාමත් අවසන් නෑ. ඒ වගේම දැනට අපිත් සමඟ එකතු වෙලා ඉන්න නංගිලා මල්ලිලාට ස්තුතිය පුද කරනවා. පළමු වසර නංගිලා මල්ලිලාගෙන් මේ සඳහා ලැබුණේ ඉහල ප්‍රතිචාරයක්. ඒ වගේම තවත් තමන්ට හිතෙන දේ සයිබර් අවකාශයේ තමන්ටම වෙන් වූ ඉඩක පළ කර ගන්නට කැමති අය ඉන්නවා නම් අපිත් සමඟ එකතු වෙන්න එන්න. ඔබ නොදන්නා ඉහල වටිනාකමක් මේ හරහා ඔබට ලැබිය හැකියි. සරසවි දිවිය වඩාත් අර්ථවත් කර ගන්නට මහඟු අවස්ථාවක් ලෙස මෙය සලකන්නට පුළුවන්. ඔබ සරසවියෙන් පිටතට ගිය කලෙක මෙවැනි අඩවියක සාමාජිකයෙක් වී තිබීම මහත් පිළිගැනීමකට ලක්වන කරුණක් වෙන්නට පුළුවන්.

පුබුදු නවරත්න