එයාර්බස් යනු වාණිජ හා යුධමය ගුවන්යානා හා ඒ ආශ‍්‍රිත මෙවලම් නිෂ්පාදනය කරන යුරෝපීය බහුජාතික සමාගමකි. 1970 දෙසැම්බර් මස 18 වෙනිදා Roger Beteille, Felix Kracht, Henri Ziegier සහ Franz Josef Strauss නම් පුද්ගලයන් සතර දෙනා විසින් Airbus Industrie GIE නමින් ආරම්භ කරනු ලැබූ මෙම සමාගම අද වන විට ලෝකයේ දෙවැනියට විශාල ගුවන් සමාගම වේ. අද දක්වා මෙම සමාගමෙහි නම කිහිප වරක්ම වෙනස් වී ඇති අතර දැනට Airbus Group SE නමින් හදුන්වන අතර 133,782 කින් සමන්විත් ලොව පුරා විසිරුණු ශ‍්‍රමබලකායකින් සමන්විත වේ. මෙම සමාගමෙහි මූලස්ථානය නෙදර්ලන්තයේ Leiden නම් නගරයෙහි පිහිටා ඇති අතර ප්රධාන කාර්යාලය පිහිටා ඇත්තේ ප‍්‍රංශයේ Blagnac නම් නගරයෙහිය.
Airbus Group SE හි ප්රධාන චරිත දෙක වන්නේ එහි ප්රධාන විධායක නිලධාරී Tom Enders හා එහි සභාපති Denis Ranque නම් පුද්ගලයන් දෙදෙනාය. ලෝකයේ දෙවෙනියට විශාල මෙම සමාගමෙහි 2016 වසර අවසාන වන විට දී ආදායම යූරෝ බිලියන 66.6 ක් වන අතර මේ වන විට මෙම සමාගම සතුව ලොව පුරා patent බලපත‍්‍ර 37,000 ක් ඇත. Airbus හි ප්රධාන ව්‍යාපාරය වාණිජ ගුවන්යානා නිෂ්පාදනය වන අතර ඊට අමතරව මෙය සතුව කොට්ඨාශ 2කින් සමන්විත වූ වෙනත් නිෂ්පාදන හා සේවා අංශයක් ඇත. මෙම කොට්ඨාශ දෙක Defence and Space සහ Helicopter නම් වේ.
Defence and Space
Defence and Space කොට්ඨාශය මගින් ආරක්ෂාව සඳහා වූ මෙවලම් හා අභ්‍යවකාශය හා සමගාමී මෙවලම් නිෂ්පාදනය කෙරේ. මෙම කොට්ඨාශය ආරම්භ වුයේ, 2014 ජනවාරි මස යුරෝපීය ගගනගාමී ආරක්ෂක හා අභ්‍යවකාශ කටයුතු සමාගම (EADS) සමග සිදු වූ සංගත ප්‍රතිව්‍යහකරණයෙහි ප‍්‍රතිපලයක් වශයෙනි. මෙහි මූලස්ථානය ප‍්‍රංශයේ Toulouse නම් නගරයෙහි පිහිටා ඇති අතර මෙහි ප්රධාන විධායක නිලධාරී වන්නේ Dink Hoke නැමැත්තායි. මෙම කොට්ඨාශය තුළ Military Aircraft, Space System සහ Communication Intelligence Security නම් අංශ තුනක් ඇති අතර විවිධ ජාතීන් (Nationalities) 86 කට අයත් සේවකයින් 40,000 ක් පමණ සේවය කරයි. Airbus සමාගමෙහි ආදායමෙන් 21% කට මෙම කොට්ඨාශය මගින් දායකත්වය දක්වයි. Airbus A330 MRTT, Airbus A400M Atlas, CN(235M)100, Eurofighter Typhoon, Euro Hawk, Airbus Zephyr මෙම කොට්ඨාශයේ නිෂ්පාදනයන් කිහිපයක් වේ.
Helicopters
1992 දී Eurocopter Group නමින් ආරම්භ කරන ලද Helicopters කොට්ඨාශය මගින් සිදු කරනුයේ Helicopters නිෂ්පාදනය වන අතර 2014 ජනවාරි 2 වන දිනෙන් පසු මෙහි නම Airbus Helicopters ලෙස වෙනස් විය. මෙහි ප්රධාන විධායක නිලධාරී ලෙස Guillaume Faury ක‍්‍රියාකරන අතර සේවකයන් 23,000 ක් මෙහි සේවය කරයි. ලොව helicopter නිෂ්පාදනයේ ප‍්‍රමුඛයෝ වන Airbus Helicopter හි ප්රධාන කාර්යාලය ප‍්‍රංශයේ Marseille Provence Airport හිි පිහිටා ඇත. AS332 Super Puma, NH90 Tactical Transport Helicopter (TTH), EC145, Tiger ARH යනු මෙහි නිෂ්පාදිතයන්ගෙන් අතලොස්සකි.
Airbus හි ප්රධාන ව්‍යාපාරය වන වාණිජ ගුවන්යානා නිෂ්පාදනය ප‍්‍රංශයේ Toulouse නගරය මුල් කරගෙන ක‍්‍රියාත්මක වන අතර නිෂ්පාදන කර්මාන්තශාලා ප‍්‍රංශය, ජර්මනිය, ස්පාඤ්ඤය, චීනය, එක්සත් රාජධානිය, එක්සත් ජනපදය වැනි රට වල පිහිට ඇති අතර අවසාන එකලස් කිරීම් ප‍්‍රංශය, ජර්මනිය, ස්පාඤ්ඤය, චීනය, එක්සත් ජනපදය වැනි රට වල සිදු කෙරේ. Airbus හි පළමු ගුවන්යානය වන A300 මාදලියේ ගුවන්යානය 1972 ඔක්තෝම්බර් මස 28 වන එහි මංගල පියාසර කිරීම සිදු කල අතර අයින් නොනැවතුන Airbus සමාගම අද වන විට A310, A320, A340, A330, A321, A319, A318, A380, A350 වැනි මාදලි වලින් ගුවන්යානා 10,344 පමණ නිෂ්පාදනය කර අවසන්ය. මෙම මාදලි අතුරින් ලොව විශාලතම මගී ගුවන් යානා මාදලිය වන A380 මාදලිය ද fly-by-wire තාක්ෂණය සහිත සහිත මුල්ම ගුවන්යානා මාදිලිය වන A320 මාදලිය ද සුවිශේෂ තැනක් හිමිකරගනී. 2016 ඔක්තෝම්බර් 14 වන දින තම 10,000 වන ගුවන් යානය ලෙස A350(XWB) මාදලියේ ගුවන්යානයක් සිංගප්පූරු ගුවන් සේවයට ලබා දුන් Airbus සමාගම, තව දුරටත් නව ගුවන්යානා මාදිලි නිෂ්පාදනය කරමින් නොනැවතී ඉදිරියට යමින් ලොව අංක එකේ ගුවන් සමාගම වන Boeing සමාගමට අහියෝගයක් එල්ල කිරීමට සමත් වී ඇත.
විශේෂ ස්තුතිය නිපුන දොඩන්තැන්න සර්
උපුටාගැනීම්