මෙය කියවන ඔබ සැම කිකිළි බිත්තරයක් දැක ඇති බවට නොඅනුමානය. නමුත් ඔබ කිසිවිටෙක සිතුවාද බිත්තරයේ හැඩය එසේ වීමට හේතුව? නැහැ නේද? එසේ නම් මේ ලිපිය කියවීම මඳකට නවතා හිතලා බලන්න ඒකට හේතුව. විනාඩියක් දෙකක් උත්සාහ කරලා ආයිමත් ලිපිය කියවන්න.
කුරුළු බිත්තරයක් අසමමිතික එක් කොනකින් උල්වූ ඕවලාකාර හැඩයක් ගන්නවා. ඉතින් මේ හැඩය පරිණාමීය වශයෙන් ප්‍රයෝජනවත් නිසා එවැනි ජීවින් ස්වභාවික වරණය තුළින් පරිසරය තුළ නොනැසී ඉතිරි වුණා. පහත රූපරාමුව තුළින් කුරුළු බිත්තරයක හැඩය ගණිතමය ලෙස ඉදිරිපත් කර ඇති ආකාරය දැක ගත හැකියි.
සාමාන්‍යයෙන් පක්ෂියෙක්ගේ කැදැල්ලක් තිබෙන්නේ ගසක අත්තක හෝ පොළොවෙන් මඳක් උස් ස්ථානයකයි. ඉතින් මෙසේ උස් ස්ථානයක කැදැල්ල සාදාගෙන එහි පක්ෂියා බිජුලෑම සිදු කරනවා. මෙම බිත්තර හැඩයෙන් ගෝලාකාර වුවහොත් ඒවා කැදැල්ල තුලින් පහලට රෝල් වී ගොස් බිමට වැටී බිඳී යාම සිදු වෙනවා. නමුත් වර්තමාන කුරුළු බිත්තරයක හැඩය ගෙන ඇති බිත්තරයක් ආනත තලයක් දිගේ පහලට වැටෙන විට ගෝලයක් මෙන් කෙලින්ම පහලට නොවැටී මඳ දුරක් ඕවලාකාර පථයක ගමන් කොට නිශ්චල වෙයි. බිත්තරය කුමන ආකරයට තැබුවත් එය තම ස්ථායි පිහිටීමට පැමිණේ. එය පහත රූප රාමු තුළින් පැහැදිලි කර ගත හැක.
බිත්තරය කේතුවක් ආකාරයෙන් සැලකීමෙන් ඉහත ස්ථායිතාවය පැහැදිලි කර ගත හැකි වේ.
ඉතින් පරිණාමයේදී ඉහත හැඩය අත්කර ගත් පක්ෂීන්ගේ බිත්තර ඉතිරි වූ අතර එම ලක්ෂණය දිගින් දිගටම පැවතීම තුළින් අනික් පක්ෂීන් අතරින් මේ පක්ෂීන් වරණයකට ලක් වීම සිදු වුණා.
දැන් ඔබ සිතනවා ඇති ඔච්චර මහන්සි වෙන්නේ නැතුව බිත්තරය ඝනකයක හැඩය ගත්තා නම් තලයේ ආනතිය බොහෝ වැඩි වුවත් එය පහළට නොවැටී නවත්වා ගත හැකි බව. ඔව් ඔබේ උත්සාහය අගය කල යුතු නමුත් එය එතරම් නිවැරදි නෑ. මක්නිසාද යත් ඝනකයක කොන් ඉතා ශක්තිමත් වූවත් එහි පෘෂ්ඨ එතරම් දෘඩව පවත්වා ගැනීම අසීරු වීමයි. එසේම වඩාත්ම වැදගත් කරුණ වන්නේ පක්ෂියාගේ යෝනි මාර්ගය (ඇත්තෙන්ම මෙය යෝනි මාර්ගය ලෙස හැඳින්වීම නිවැරදි නොවන නමුත් පැහැදිලි කිරීමේ පහසුව මත මේ නම යොදා ගන්න ලදී ) තුළින් ඝනක හැඩැති බිත්තර එළියට දැමීම අපහසු වීමයි. නමුත් ඕවලාකාර හැඩැති බිත්තර ඉතා පහසුවෙන් එළියට දැමිය හැකියි. ඒ සඳහා ගැලපෙන පරිදි ඔවුන්ගේ මාංශ පේශීන් පවා සකස් වී තිබෙනවා.
එමෙන්ම තවත් වැදගත් කරුණක් වන්නේ ඕවලාකර හැඩය ලබා ගැනීම තුළින් බිත්තර කූඩුව තුළ හොඳින් ඇසිරිය හැකි වීමයි. ඒවා අතර කුඩා ඉඩක් පමණක් ඇති ලෙස ඇසිරීම තුළින් උෂ්ණත්වය ඒකාකාරව පවත්වා ගැනීමටද ඉවහල් වේ. මේ හැඩය පිළිබඳ ගණිතමය පැහැදිලි කිරීමක් මෙම පර්යේෂණ පත්‍රිකාව තුළින් ලබා ගත හැකියි.
ඔබත් මෙවැනි වටිනා දේ දන්නේ නම් නොපමාව අපට එවන්න.
References