නිදහස පසුපස…

Share

නිදහස යනු කුමක්ද? නිදහස අප හට වැදගත් වන්නේ ඇයි?

නිවසක කූඩුවක ඇති කරන ගිරවකු සොයන්නේත්, සත්ව උද්‍යානයක කූඩුවක ඇති කරන සතෙකු සොයන්නේත් නිදහස යි .

එනම් සරලව කිවහොත් තමා කැමති ආකාරයට, තමා කැමති ලෙසකට ජීවත් වීමට ඇති හැකියාව යි.

අප මාතෘ භූමියේ නිදහස් දිනය යෙදී ඇත්තේ පෙබරවාරි මස 04 වන දිනට ය. මෙම දිනය එක් දිනයක් ලෙස සමරනු ලැබුවද මෙම නිදහස එක් දිනකින් ලබා ගත්තක් නොව වසර ගණනක් අප මාතෘභූමිය මත රුධිරය හෙලමින් අප හට දායාද කරන ලද්දකි. මේ ප්‍රෞඪ ඉතිහාසය පිලිබදව අප යම් තරමක් හෝ දැනුවත්ව සිටිය යුතුය. අතීතය නොදැන වර්තමානය තුලින් යහපත් අනාගතයක් ගොඩ නැගිය නොහැක.

එදා ක්‍රි.පූ.551 දී මෙරටට සංක්‍රමණය වූ විජය කුමරු ඇතුළු පිරිස සමඟ මෙරට එවකට වාසය කළ යක්ෂ ගෝත්‍රිකයින් ඔවුන් සමඟ සටන් කරන ලද්දේ තම මාතෘභූමියේ නිදහස උදෙසා ය.

විජය රජුගෙන් ආරම්භ වුනු හෙළ රජපෙළපතට මුළින් ම  එල්ල වන විදේශ ආක්‍රමණය වන්නේ සුරතිස්ස රජු දවස එල්ල වූ සේන හා ගුත්තික නම් වෙළෙන්දන් ලෙස පැමිණ සිදු කරන ලද ආක්‍රමණය යි. එතැන් සිට පැමිණි එළාර, කාලිංඝ මාඝ ආදී එකී නොකී ආක්‍රමණිකයන්ගෙන් අප මාතෘභූමිය මුදවා තුන් හෙළය එක්සේසත් කිරීමට වීර දුටුගැමුණු, මහා විජයබාහු, මහා පරාක්‍රමභාහු වැනි යුග පුරුශයන් බිහිවිණි. ඔවුන්ගේ නම් ඉතිහාසය තුළ රන් අකුරින් ලියවී ඇත්තේ ඔවුන් එම වකවානුවල දී ආක්‍රමණිකයන්ගෙන් අප මවුබිම මුදවා තුන් හෙළයම එක්සේසත් කර නිදහස් නිවහල් දේශයක් උරුම කර වූ නිසා ය. එළාර රජුට එරෙහිව දුටුගැමුණු රජු කරන ලද විමුක්ති සංග්‍රාමයේ තේමා පාඨය වූයේ “මාගේ මේ ව්‍යායාමය හුදෙක් රජ සැප පිණිස නොව සම්බුද්ධ ශාසනයේ තිර පැවත්මත්, මහජනයාට නිදහසේ ජීවත් වීමට ඇති අයිතියත් සුරැකීම සඳහා” යන්න යි.

නමුත් ක්‍රි.ව.1505 දී පෘතුගීසීන් මෙරටට පැමිණීමත් සමඟ පිළිවෙළින් ලන්දේසී, ඉංග්‍රීසින්ගේ ආක්‍රමණවලට ලක් වීමට සිදු විය. මෙහි අවසානය සනිටුහන් වූයේ ක්‍රි.ව. 1815 දී අප මාතෘ භූමිය බ්‍රිතාන්‍ය එක්සත් රාජධානියේ යටත් විජිතයක් වීමත් සමඟ ය.

ඉන්පසුව නැවත මාතෘ භූමියට නිදහස උදාකර දීම සඳහා විවිධ යුගපුරුෂයන් තම දිවිහිමියෙන් කටයුතු කරන ලදී. ක්‍රි.ව. 1817, ක්‍රි.ව.1848 වර්ෂවල ඇති වූ නිදහස් සටන්වලදී දහස් ගණන් ශ්‍රී ලාංකිකයන් හට තම ජීවිත අහිමි විය. මෙසේ ඔවුන් තම ජීවිත පරිත්‍යාගයෙන් කටයුතු කළේ තම පටු අරමුණු වෙනුවෙන් නොව අනාගත පරපුර සඳහා නිදහස් නිවහල් මාතෘ භූමියක් ලබා දීම සඳහා ය .

කෙසේ වෙතත් බොහො කැප කිරීම් පරිත්‍යාගවලට පසුව ක්‍රි.ව.1948 පෙබරවාරි මස 04 වන දින අප හට අර්ධ නිදහසක් ලැබුණ අතර ක්‍රි.ව. 1972 දී පූර්ණ නිදහසකට හිමිකම් කීමට හැකි විණි .

නමුත් 1977 වර්ෂයේදී ආරම්භ වුණු දෙමළ ඊළාම් විමුක්ති කොටි සංවිධානය හා රජයේ හමුදා අතර පුරා වසර 30 කට අධික කාලයක් පැවති බෙදුම්වාදී අරගලය නිමාවට පත් වූයේ දෙපාර්ෂවයේම ලක්ෂ ගණනකට ජීවිත අහිමි කරමින් හා ඊටත් වඩා අතිවිශාල ගණනකගේ ජීවිත සදාකාලික ආබාධිත තත්ත්වයට පත් කරමින් ය.

වීර කැප්පෙටිපොළ, වාරියපොල ශ්‍රී සුමංගල හිමිපාණන්, වීර පුරන් අප්පු, කුඩාපොළ වහන්සේ ඇතුලු හෙළ විරුවන් විසින් තනන්නට වෙර දැරූ දේශය දැන් අපිට ලැබී ඇත. එම නිදහස අප හට ලබා දීම උදෙසා ලක්ෂ ගණනක් මෙම මාතෘභූමිය මත තම රුධිරය හෙලා තම දිවි පරිත්‍යාග කොට ඇත. ඒ අපේ හෙට දවස වෙනුවෙනි.

ඔවුන් තම දිවිපුදා අප හට ලබාදුන් නිදහස අපේ අනාගත පරපුර වෙනුවෙන් රැක ගැනීම අප සතු යුතුකමකි. එබැවින් සියලු ජාති භේද අතහැර සිංහල, දෙමළ, මුස්ලීම්, බර්ගර් වැනි සියලු ශ්‍රී ලාංකිකයින් එක් ධජයක් යටතේ පෙළ ගැසී උදා වී ඇති නිදහස මතු අනාගත පරපුර වෙනුවෙන් රැක ගැනීම අප සතු පරම යුතුකමක් බව උදාවූ 69 වැනි නිදහස් උළෙලේ අපි අධිෂ්ටාන කරගනිමු.

69th independance

Image source : www.asienreisender.de