අද දිනය වන විට ඔබ මා නිදහසේ මේ ලක්දිව ජීවත් වනුයේ අතීතයේ අප රටේ ජීවත් වූ අභිමානවත් ශ්‍රී ලාංකිකයන් නිසා බව අපට මතක් කර දෙන නිදහස් දිනය අදයි.බ්‍රිතාන්‍යය පාලනයෙන් මිදී 1948 වර්ෂයේ පෙබරවාරි මස 4 වන දින අප ලබාගත් නිදහස අපේම මිනිසුන්ගේ නිදහස් අරගල රැසක ප්‍රතිඵලයකි.නමුත් අපට 1948 වර්ෂයේ දී ලැබුණ නිදහස අංග සම්පූර්ණ නිදසක් නොවූ අතර 1972 වර්ෂයේ දී ශ්‍රී ලංකාව සම්පූර්ණයෙන්ම නිදහස ලැබුවේ ජනරජයක් බවට පත්වීමෙනි. 1978 ආණ්ඩුක්‍රම ව්‍යවස්ථාවට අනුව ශ්‍රී ලංකා ප්‍රජාතාන්ත්‍රික සමාජවාදී ජනරජය ලෙස හැඳින්වෙන ඒකීය රාජ්‍යයක් වන ශ්‍රී ලංකාව සංවර්ධනය වෙමින් පවතින රටකි. ක්‍රි.ව.1505 දී පෘතුගීසීන්ගේ ආක්රමණයත් ක්‍රි.ව.1602 ලන්දේසී ආක්රමණයත් සිදු වූ අතර අප රට සම්පූර්ණයෙන්ම යටත් කරගැනීමට හැකියාවක් නොලද ඔවුන් ලංකාවේ වෙරළබඩ කලාපයේ පාලනය අත්පත් කරගෙන සිටි බව ඉතිහාසයේ සඳහන් වේ. නමුත් ක්‍රි.ව.1815 දී ඉංග්‍රීසීන් ලංකාව ඔවුන්ගේ යටත් විජිතයක් බවට පත්කර ගන්නා ලදී.
අප රට බ්‍රිතාන්‍යය යටත් විජිතයක් බවට පත්වීමෙන් පසු ක්‍රි.ව.1818 දී සහ 1848 දී නිදහස වෙනුවෙන් ඇති වූ සටන් අසාර්ථක විය. එම නිදහස් සටන් වලදී මාතෘ භූමිය වෙනුවෙන් දිවි පිදූ ජාතික වීරයන් අදටත් අපි සිහි කරනුයේ ඉමහත් ගෞරවයකිනි. වාරියපොළ ශ්‍රී සුමංගල හිමි, වීර කැප්පෙටිපොළ, වීර පුරන් අප්පු, හඟුරන්කෙත ඩිංගිරාළ ඇතුළු ජාතික වීරයන් රැසක් අපේ රටේ නිදහස වෙනුවෙන් තම ජීවිතය කැපකර ඇති බව අප අමතක නොකළ යුතුය.බ්‍රිතාන්‍යය පාලනයෙන් වසර 133කට පසු ශ්‍රී ලංකාවට නිදහස ලබාදීම වෙනුවෙන් පුරෝගාමී වූ ඩී.එස්.සේනානායක මහතා නිදහසේ පියා ලෙස විරුදාවලිය ලැබීය. මාතෘ භූමියට සැබවින්ම ප්‍රේම කළ සැබෑ ජාත්‍යාලයෙන් පිරි උදාර ශ්‍රී ලාංකිකයන්ගේ ප්‍රයත්නයක් ලෙස 1948 වර්ෂයේ දී අපි ලබාගත් නිදහස නිවැරදිව භුක්ති විදීම ශ්‍රී ලාංකිකයන් ලෙස අපගේ යුතුකම සහ වගකීමකි.
ප්‍රෞඪ ඉතිහාසයක සාඩම්බර හිමිකරුවන් ලෙස ශ්‍රී ලාංකිකයන් වන ඔබ සතුව රටේ අනාගතය ඇති බව සිහියේ තබාගන්න. ආනන්ද සමරකෝන් ශූරීන්ට අනුව ශ්‍රී ලංකාව රමණීය ජය භූමියකි. සීරුවෙන් සිටගෙන ජාතික ගීය ඔබේ මුවින් මුමුණන හැම මොහොතක එහි වදන් වල අරුත සිතා බලන්න. ඔබේ සිත තුල ශ්‍රී ලංකා මාතාව කෙරෙහි ඇති අභිමානය ආදරය මුසු කොට ගායනා කරන්න අපේ ජාතික ගීය.ජාති,ආගම්,කුල භේද අමතක කර අභිමානවත් ශ්‍රී ලාංකිකයකු ලෙස ජීවත් වන්න.අප ලබා ඇති නිදහස ඵලදායීව යොදා ගත්තා නම් අපි තවමත් සංවර්ධනය වෙමින් පවතින රටක් නොවනු ඇති යැයි මාගේ විශ්වාසය යි. අපි රටක් වශයෙන් නිදහස ලබා ඇතත් ආකල්පමය වශයෙන් ලබා ඇති දියුණුව අල්පය. මාතෘ භූමියට ආදරය කරන්න අපි අපේ මතු පරපුරට උගන්වනවා ද ? රටට ආදරය කරන මිනිසුන් වෙනුවට ආත්මාර්ථය වපුරන මිනිසුන් බහුල වර්තමාන සමාජය තුළ නිදහස් දිනය දවසට පමණක් සීමා වූ ජාත්‍යාලයක් දකිමි.
අධ්‍යාපනය ලැබීමේ අරමුණ තම මාතෘ භූමියේ සංවර්ධනය වෙනුවෙන් යොදා ගන්න හිතන පතන ශ්‍රී ලාංකිකයන් පිරිසක් අපේ අධ්‍යාපන රටාව තුළින් බිහි වෙනවා ද? සමාජ මාධ්‍යය තුළින් රට හදන පිරිසක් දකිමි. නමුත් ඒවා බහුතරයක් ලිපි සහ අදහස් වලට පමණක් සීමා වනු ඇත. රටට ආදරය ඇති දරුවන් නිර්මාණය කිරීම ජාතික වගකීමක් ලෙස දකින මවකු හෝ පියකු වන්නට, ගුරුවරයකු වන්නට ඔබ අද දිනයේ සිතුවා නම් ප්‍රමාණවත්ය. මාගේ ලිපියට රට වෙනස් කිරීමට නොහැකි බව දනිමි. නමුත් රටේ අනාගතය වෙනුවෙන් එක් පුද්ගලයෙකු හෝ රට වෙනුවෙන් තම යුතුකම ඉටු කිරීමට තීරණය කළා නම් ප්‍රමාණවත් ය. 73 වන අභිමානවත් නිදහස් දිනය සමරන අද දවසේ මගේ එකම ප්‍රාර්ථනය හදවතින්ම ශ්‍රී ලාංකික රටට ආදරය කරන පුරවැසියන්ගෙන් මේ පින්බිම සශ්‍රීක වේවා..! මගේ රටට දළදා හිමි සරණයි..!
Image Courtesy: https://wallpapercave.com/w/wp4215005