පුංචි හිතේ මැවෙන හීන කෙතරම් නම් සුන්දරයි ද?. අනාගතය ගැන සුභ සිහින දකින පුංචි හිත් යට බලාපොරොත්තු සිය ගණනින් ගොඩ ගැසී තියෙනවා. එහෙත් ඒ හීන සැබෑ කරන්න සෑම දරුවෙකුටම එක හා සමාන පහසුකම් තියෙනවා ද යන්න තවමත් ගැටළුවකි. එවැනි හිත් යට සැඟවුණු හෙට දවසේ සැබෑ වෙන හීන පාට කරනු වස් කොළඹ විශ්වවිද්‍යාලයීය විද්‍යා පීඨයේ විද්‍යාර්ථීන් විසින් ගනු ලැබූ ප්‍රයත්තය 2019ක් වූ ජුලි මස 29 වන දින දොඩංගොඩ නෑහින්න කනිෂ්ඨ විද්‍යාලයේදී මල් ඵල ගැන්වුණි.
“අභින” 2018 යනු අඩු පහසුකම් සහිත දරුවන්ගේ ජීවිත නඟා සිටුවීම යන අරමුණ පෙරදැරි කරගෙන විද්‍යා පීඨ සිසුන් විසින් අරඹන ලද ප්‍රජා සත්කාරයකි. විද්‍යා පීඨ ශිෂ්‍ය සංගමය හා තෙවන වසර සිසුන්ගේ මූලිකත්වය ද පීඨයේ සියළු සිසුන්ගේ දායකත්වය ද අභින 2018 ව්‍යාපෘතියේ සාර්ථකත්වය සඳහා ඉවහල් වුණි. මෙහි ප්‍රථම අදියර ලෙස ව්‍යාපෘතිය සඳහා ඔවුන් තෝරාගනු ලැබුවේ කළුතර දිස්ත්‍රික්කයේ අඩු පහසුකම් සහිත පාසලක් වන දොඩංගොඩ නෑහින්න කනිෂ්ඨ විද්‍යාලයයි. ළමුන් 130ක් පමණ ඉගෙනුම ලබන මෙම විද්‍යාලයේ එකල තිබූ විශාලතම අඩුපාඩුව වූ දිරාගිය පන්ති කාමර ගොඩනැගිල්ල යලි ප්‍රතිසංස්කරණය කර ගැනීම වෙනුවට පන්ති කාමර දෙකක් සහිත නව ගොඩනැගිල්ලක් දරුවන්ට තිළිණ කිරීම විද්‍යා පීඨ සිසුන්ගේ අරමුණ විය.
මෙම විශාල කර්තව්‍යය පිටුපස බොහෝ පිරිසක් සිටී. මාස කිහිපයක් වැනි කාලයක් තුළ ඉතා විශාල මුදලක් එකතු කර ගැනීමට පළමු වසරේ සිට අවසාන වසර දක්වා සියළුම සිසුන් එක සේ වෙහෙසුණි. අභින සමරු කළාපය ඇතුළු ‘අනාගතය’ නමින් පවත්වනු ලැබූ වායෝ සංගීත ප්‍රසංගය ද මෙකී කර්තව්‍යය මල් ඵල ගන්වනු වස් විද්‍යාර්ථීන් විසින් ගනු ලැබූ උත්සහයන් සාර්ථක වන්නට හේතු වන්නට වූයේ ඔවුන් අතරේ තිබෙන්නා වූ සහෝදරත්වය බව කිව යුතු මනාය.
මීට සමගාමීව 2018 වර්ෂයේ සාමාන්‍ය පෙලට මුහුණ දීමට සූදානම් වූ එම විද්‍යාලයේ සිසුන් හට සම්මන්ත්‍රණ මාලාවක් මගින් අත්වැලක් ලබා දෙන්නට ද විද්‍යා පීඨ සිසුන් තම දායකත්වය ලබා දුනි. බිඳෙන් බිඳ එකතු වී මහා සයුරක් සෑදෙන්නාක් මෙන් මෙය ද එක දවසින් ගොඩනැගුණු සිහිනයක් නොවේ. රුපියලෙන් රුපියල එකතු කර පුංචි හිතේ හෙට දවස වෙනුවෙන් මැවෙන සිහින පාට ගන්වන්නට අත්වැලක් වීමට කොළඹ සරසවියේ විද්‍යා පීඨ සිසුන් සමත් විය. විද්‍යා පීඨ සිසුන්ගේ දිරියෙන් හා එකමුතුකමින් දහසකුත් දුෂ්කරතා මධ්‍යයේ හෙට දවස ගැන දකින සුබ සිහින සියයකුත් ගණනක් ඊයේ දිනයේ මෙලෙස පාට වුණු වගයි.
Image Courtesy : FOS Media