දානය කියන්නේ මනුෂ්‍ය චිත්තය තුළ පහළවන උත්තරීතර හැඟීමක්. දානයෙන් අදහස් වන්නේ දීම හෙවත් අත්හැරීම යි. දෙයක් කෙනෙකුට පරිත්‍යාග කරලා අපි ලබන සතුට, වෙන කිසිම දේකින් ලබා ගන්න බැරි, මිනිසත්කම සමග මුහුවුණු අපූරු හැඟීමක්. අපි හැමදෙනා ම ජීවිතයේ එක් වතාවක් හරි, ඒ අපූර් ව හැඟීම අත්විඳ ඇතුවාට සැකයක් නැහැ.
තමන්ගේ ශරීරයේ කොටසක්, වෙනත් අයෙකුගේ සුව පිණිස දානය කිරීම තුළ තියෙන්නේ උදාර මනුෂ්‍යත්වයක්. ඒ මිනිසත්කමට ඉඩ දෙමින්, පහුගිය වසරවල මෙන් ම මේ වසරේදීත් කොළඹ විශ්වවිද්‍යාලයීය විද්‍යා පීඨයේ, ප්‍රථම වසර ශිෂ්‍ය එකමුතුව විසින්, ලේ දන් දීමේ කඳවුරක් සංවිධානය කිරීමට කටයුතු සූදානම් කර තිබෙනවා. ලේ දන් දීමේ කඳවුර, ජුනි මස 9වන අඟහරුවාදා, පෙරවරු 9.00 සිට පස්වරු 4.00 දක්වා, කොළඹ විශ්වවිද්‍යාලයේ BLT 2 හා 3 ශාලාවලදී පැවැත්වීමට නියමිත ව තිබෙනවා.
මනුෂ්‍ය රුධිරය කෘතිම ව නිපදවිය නොහැකි දෙයක්. ඒ වගේ ම මිනිස් රුධිරයට කිසිඳු ආදේශකයක් ද නැහැ. රුධිර අවශ්‍යතාවයක් ඇති අයෙකුට, වෙනත් කිසිවකින් ඒ අවශ්‍යතාවය සපුරා ගන්නටත් බැහැ. හදිසි අනතුරුවලට ලක් වූවන්ට, ශල්‍යකර්මවලට භාජනය වූවන්ට, පිළිකා ඇතුළු වෙනත් බොහෝ රෝගවලින් පීඩා විඳින රෝගීනට රුධිරය අත්‍යවශ්‍ය වනවා. ඔවුන්ගේ ජීවිතයේ පැවැත්ම තීරණය වන්නේ, ඔබේ පරිත්‍යාගශීලීත්වය මත යි. ජීවිතය යදින එවැනි දහසක් මිනිසුන් හට ශක්තියක් වන්නට, මිනිස් ජීවිතයක් බේරා ගැනීමට දායක වන්නට, මිනිස් ජීවිතයක වටිනාකම හඳුනන රුධිර ත්‍යාගශීලී ඔබ සියලු දෙනා අපත් සමග එක් වේ වි කියා අප බලාපොරොත්තු වනවා.
කොළඹ විශ්වවිද්‍යාලයේ, විද්‍යා පීඨ ප්‍රථම වසර ශිෂ්‍ය එකමුතුවේ මේ සම්මා වායාමය මුදුන් පමුණුවා ගැනීම සඳහා, පරිත්‍යාගශීලී ඔබ සැමට, ජුනි මස 9වන දා කොළඹ විශ්වවිද්‍යාල පරිශ්‍රයට පැමිණෙන මෙන් ආරාධනා කරනවා.
