මේ දවස් වල හැමෝම කතා වෙනවා ඇහෙන්නේ චෝග්ම් ගැන. ඇත්තටම මොකක්ද මේ CHOGM කියන්නේ? Commonwealth Heads Of Government Meeting එහෙමත් නැතිනම් පොදුරාජ්‍ය මණ්ඩලීය රාජ්‍ය නායකයින්ගේ සමුළුව තමයි අපි CHOGM කියල කියන්නේ. වසර 2 කට වරක් පැවැත්වෙන මෙම සමුළුව 23 වන වරට පැවැත්වෙන්නේ ශ්‍රී ලංකාවෙදියි. මීට පෙර මෙම සමුළුව පැවැත්වුයේ 2011 වසරේ ඕස්ට්‍රේලියාවේ පර්ත් නගරයේදීයි. එවක ඕස්ට්‍රේලියානු අගමැතිනි ජුලියා ගිලාඩ් මහත්මිය එහි සභාපතිත්වය දැරුවා.

ඇත්තටම මොකක්ද මේ පොදුරාජ්‍ය මණ්ඩලය කියන්නේ? පෘතුගාලය, ඕලන්දය, ප්‍රංශය එමෙන්ම එක්සත් රාජධානිය ලෝකයේ විවිධ රටවල් තමන්ගේ යටත් විජිත ලෙස තබා ගත්තා. එම රටවල් අතරින් එක්සත් රාජධානියේ යටත් විජිත වූ රටවල් තමන්ගේ නිදහස ලැබූ පසු පිහිටුවාගත් සංගමය පොදුරාජ්‍ය සංගමයයි. මෙම සංගමය පිහිටුවීමේ අරමුණ මෙම රටවල් අතර අනොන්‍ය සම්බන්ධතාවයක් පවත්වාගෙන සුහදතාව වර්ධනය කරගැනීමයි. රටවල් 53 කින් සමන්විත මෙම දැවැන්ත සංගමයේ මංගල සමුළුව පැවැත්වුයේ 1971 වසරේදීයි. මෙම සමුළුවේ ප්‍රධානත්වය ගනු ලබන්නේ එක්සත් රාජධානියේ II එලිසබෙත් මහා රැජිනයි. ඇය 1973 වසරේ කැනඩාවේ ඔටාවා නගරයේ පැවති 2 වෙනි සමුළුවේ සිට ප්‍රධානත්වය ගනු ලැබුවා.

මෙවර එය අප රටේ පැවැත්වීම මහත් ආඩම්බරයක් වන්නේ විශේෂයෙන්ම ශ්‍රී ලංකාව තවමත් සංවර්ධනය වෙමින් පවත්නා තුන්වන ලෝකයේ රටක් බැවින් ශ්‍රී ලංකාවේ සංවර්ධනයට දායකත්වයක් ලබාගැනීමට හැකිවීමත්, ශ්‍රී ලංකාව කෙරෙහි රටවල් වල පවතින වැරදි ප්‍රතිරූපය ඉවත් කර සැබෑ තත්වය වටහා දීමටත් හැකිවන නිසාවෙනි.