කඳු නිම් වළලු අභියස
උඳුවප් සීතලට ගුලි වී
නෙක තුරු වදුලු අතරේ
තවත් සිටිනු කිම ?
යමු ද නත්තල් සෙයිලමට ?
දෙවිඳුන් රජිඳුන් දිළිඳුන් එක් කළ
සමිඳුගේ සිරිමත් උපත සමරන
නත්තලේ අරුත සොයා
ජනී ජනයා රැස් කකා – රැගෙන යන්නට සිත් යොමා
නත්තලත් ළඟ එන නිසා – වැඩි ලංසුවට මා ගෙන ගියා
නේක විදුලි බුබුළින් වට වී
තෑගි සැරසිලි දෝත දරන්
සාමයේ ඉරබටු තරුව හිස දරා
මැද සාලයේ
උජාරුවෙන් වැජඹුනා මම
මුලු ලොව එකලු කළ ඒ උතුම් දිනයේ
සාද සැණකෙළිවලින් ඔද වැඩී
පැළඳ සරුව පිත්තල
ගිල නේක රස බොජුන්
මත් වී සුරා සොඬුන් ලෙද
මෙය නොවෙයි සැබෑ නත්තල
මේ නම් කිනම් අරුතක් ද ?
සැණකෙළි නිම වී
දින දින ගත වී
සාද තෙපුල් බස් මැකී
ගීතිකා හඬ ද වියැකී
සැරසිලි පසෙකලා – උජාරුව බිම තබා
සාමයේ පණිවුඩය අතු පතර නිති දරන්
දැන් යන්නට වෙයි නැවත
වැඩි ලංසුවට විකිණුන
නත්තල් සෙයිලමට නොව
“කසල ගොඩට”
මේ වියළුණු කුණු කය රැගෙන
නත්තල අරුත්බරව සමරමු ! ඔබ සැමට සාමය සතුට රජයන සුබ නත්තලක් වේවා !
Image courtesy : http://2.bp.blogspot.com/-4i-t1pQzSHI/UL-GazflrfI/AAAAAAAACIA/iZW674Wb06o/s1600/tree_christmas2012_bleecker_2.JPG
