නියම මාත්‍රාව එවෙලේම කඩදාසි තීරුවකින් මැන ගන්න

Share

කොළඹ විශ්ව විද්‍යාලයේ ආචාර්ය M.N. කෞමාල් මහතා සමග කළ සාකච්ඡාවක් ඇසුරෙන්

බොහෝ විට නියමිත ප්‍රමාණයට වඩා පොහොර භාවිතය විවිධ පාරිසරික ගැටළු ඇති කරව යි. එමෙන්ම ආර්ථික වශයෙන් ද හානිදායක ය. කෘෂිකාර්මික වගාවන් වල පොහොර යෙදීමේ දී ඒවාට අනුරූප ව පසට එක් කළ යුතු මාත්‍රාව සඳහන් කර ඇති මුත්  විවිධ පාරිසරික හා මානව ක්‍රියාකාරකම් මත, පොදුවේ ලබා දෙන අගයට වඩා පසේ අඩංගු ප්‍රමාණය මත එකතු කළ යුතු පොහොර ප්‍රමාණය නිර්ණය කිරීම වඩාත් සාර්ථක ක්‍රමවේදය යි. විශේෂයෙන් ම NPK පොහොර යෙදීමේ දී ෆොස්ෆේට් අයන ප්‍රමාණය ගැන සැලකිලිමත් විය යුතු ය. නැතහොත් වගාවට මෙන්ම පාරිසරික වශයෙන් ද එය හානිකාරක විය හැකි ය. වගා ක්ෂේත්‍රයේ අඩංගු ෆොස්ෆේට් ප්‍රමාණය නිර්ණය කිරීම සඳහා වගා බිමෙන් පස් සාම්පලයක් ලබා ගෙන එය පරික්ෂණාගාරවලට යවා දත්ත ලබාගැනීම කළ හැකිවුවත් ඒ සදහා විශාල කාලයක්, ශ්‍රමයක් හා පිරිවැයක් වැයවන බැවින් ප්‍රයෝගික ව සිදු කළ නොහැක.
සාමාන්‍යයෙන් මේ සඳහා කෙරෙන පර්යේෂණාගාර පරීක්ෂණවල දී වර්ණාවලීක්ෂ ක්‍රම යොදා ගන්නා අතර එය සාමාන්‍ය පුද්ගලයකු සඳහා සංකීර්ණ ක්‍රියාවලියක් වේ.මෙම කරුණු සැලකිල්ලට ගනිමින් කොළඹ විශ්ව විද්‍යාලයේ, රසායන විද්‍යා අංශයේ ආචාර්ය M.N. කෞමාල් මහතා ඇතුළු පර්යේෂණ කණ්ඩායම පහසුවෙන් එහෙ මෙහෙ ගෙන යා හැකි පරිදි වර්ණලේඛ ශිල්ප කඩදාසි (chromatography paper) පාදක කර ගත් ඉතා ලාභදායි සරල සකසුරුවම් උපකරණයක් නිපදවීමට සමත් වී ඇත. මේ පිළිබඳව කොළඹ විශ්ව විද්‍යාලයේ රසායන විද්‍යා අංශයෙහි ජ්‍යෙෂ්ඨ කථිකාචාර්ය M. N. කෞමාල් මහතා අදහස් දැක්වීය.

රුපය: වර්ණලේඛශිල්ප කඩදාසි (chromatography paper) නිෂ්පාදනය කරනුලැබූ උපකරණයක්
රුපය: වර්ණලේඛ ශිල්ප කඩදාසි (chromatography paper) නිෂ්පාදනය කරනුලැබූ උපකරණයක්

මෙය 2 cm x 2 cm ප්‍රමාණයේ පමණ වර්ණලේඛ ශිල්ප කඩදාසි කැබැල්ලක් වන අතර ඉතාමත් සැහැල්ලු ය. වගා බිමෙන් ස්වල්ප ප්‍රමාණයේ පස් නියැඳි කිහිපයක් රැගෙන ඒවා නිශ්චිත ජල පරිමාවක දිය කර ඉන් බිඳිති ප්‍රමාණයක් කඩදාසි තීරුවෙහි නියමිත ස්ථානයේ තැන්පත් කළ පසු අයන කඩදාසිය මතින් ගමන්කොට එහි ඇති වර්ණක සංයෝග සමග ෆොස්ෆේට් සදහා අවේණික වර්ණ විපර්යාස නිරීක්ෂණය කළ හැකි ය. මෙම උපාංගයෙහි නිරීක්ෂණය කළ හැකි භෞතික පරාමිතිය වර්ණ විපර්යාසය වන අතර, එහි තීව්‍රතාවය ෆොස්ෆේට් සාන්ද්‍රණයට සමානුපාතික වේ.

මේ ක්‍රියාවලියේ දී සරල පරිගණක මෘදුකාංගයක් (photo shop වැනි) මගින් වර්ණ තීව්‍රතා අගයන් මිනිය හැකි හැකි අතර ම, මෙය තව දුරටත් දියුණු කිරීමෙන් ස්මාර්ට් ජංගම දුරකථන (smart phone) වල යෙදවුමක් ලෙස සකස් කර ගත හැකි අතර එයින් පරීක්ෂණාගාර වාර්තාවන් සමග අන්තර්ජාලය ඔස්සේ එවෙලේම අගයන් පිළිබද දත්ත ලබා ගැනීමට හැකිවන බව M. N. කෞමාල් මහතා තවදුරටත් පැවසීය.

මෙවැනි උපාංග දැනටමත් ජලයේ කඨිනත්වය, ක්ෂාරීය බව, ලෝහ අයන ප්‍රමාණය මැනීම සදහා පරික්ෂණාගාර තත්ත්ව යටතේ දී ආචාර්ය M.N. කෞමාල් මහතා ඇතුළු පර්යේෂණ කණ්ඩායම විසින් නිෂ්පාදනය කර ඇත. තව ද කෘෂිකර්මාන්තය, පාරිසරික විද්‍යාව, වෛද්‍ය විද්‍යාව ආදී වූ ක්ෂේත්‍ර රැසකට ප්‍රයෝජනවත් වන පරිදි භාවිතයට ගත හැකි පරිදි මෙවැනි උපාංග නිෂ්පාදනය කිරීම මගින් පරීක්ෂණ සදහා වැයවෙන රසායනික ද්‍රව්‍ය අවම වීම, අඩු කාලයක් ගත වීම, අඩු පිරිවැයක් වැයවීම වැනි වාසි ලබාගත ගත හැකි බව ඒ මහතා වැඩි දුරටත් හුවා දැක්වීය.

ඡායාරූප ලබාදීම සහ සෝදු පත් සැකසීම : ආචාර්ය M.N. කෞමාල් මහතා, රසායන විද්‍යා අංශය, කොළඹ විශ්ව විද්‍යාලය

සටහන: ගීත් හෙට්ටිආරච්චි