අද මැයි මාසේ හය වෙනිදා. ලෝකවාසි බෞද්ධ ජනයා උත්සවශ්‍රීයෙන් සමරන වෙසක් පෝය හෙට. වෙනදාට අපි මේ වගේ දවසට කරන්නෙ ඉතින් ලහි ලහියේ වෙසක් කූඩු හදන එක තමයි. නැත්නම් දන්සැල් සංවිධානය කරන එක. තවත් අය රට පුරා වෙසක් තොරණ්, වෙසක් පහන්කූඩු හදනවා. නමුත්, මේ අවුරුද්දේ අපිට ඒ දේවල් කරන්න අවසර නැහැ. ඒ ලෝකේ පුරා පැතිර යන කොරෝනා වසංගතය නිසා කියල අපි හැමෝම දන්නවා. කොරෝනා කියන්නේ මොකද්ද කියල මං ඔයාලට අමුතුවෙන් කියල දෙන්න ඕනි නෑ. මොකද ඒ වෛරසය ගැන අද වෙද්දි අපි ගොඩක් දේවල් දන්නවා. ඉතින් මේ කියන්න යන්නේ කොරෝනාවලට බුද්ධ දේශනාවේ ඇති සම්බන්ධය මොකක්ද කියලයි.

අපි කොච්චර ජාති ආගම් කුල මල හේද උස් පහත්කම් නිසා ගහමරා ගන්නවද? ඒත්
පොඩ්ඩක් හිතල බලන්න හදිස්සියේ හරි අසනීප වෙලා ඉස්පිරිතාලෙකට ගියොත් අපිට
දැනෙන හැඟීම මොකක් වේවිද කියලා. එතනදි ජාති ආගම් භේද උස් පහත්කම් නෑ
නේද? බුදු රජාණන් වහන්සේ දේශනා කරල තියෙන විදියට ගිලන් වීම සහ මරණය අපි
කාටත් පොදුයි. ඒකට අපි කොච්චර උගත්ද , ධනවත්ද , බලවත්ද කියන එක අදාල නෑ.
බලන්න ඒකට හොදම උදාහරණය ලෝක බලවතා වන ඇමෙරිකාවට වෙලා තියෙන දේ.
කොච්චර ධනය, බලය තිබුණත්, කොච්චර තාක්ෂණය අතින් දියුණු වුණත්, කොච්චර
උගතුන් ඉන්න රටක් වුනත් එයාලට අද වෙලා තියෙන දේ. අනික් හොඳම උදාහරණය
තමයි බ්‍රිතාන්‍ය අගමැති බොරිස් ජොන්සන්. ලෝකේ දුප්පත්ම රටක මනුස්සයෙක්ට දැනුණ
රෝග බිය, මරණ බියම තමයි එයාටත් අසනීප වුණ වෙලේ දැනෙන්න ඇත්තේ. අන්න
ඒකයි ලෝක ධර්මතාවය.

ඉතින්, බුද්ධ දේශනාවත් තේරුම් අරන් මේ වෙලේ අපි කරන්න ඕනි මොනවද? වෙනදා
වගේ මේ පාර අපිට ගේ වටේටම වෙසක් කූඩු හදල එල්ලන්න බැහැ. වෙසක් පෝය
දවසෙ හවස පන්සල් යන්න බැහැ. ගමේ පන්සලේ වෙනදා වගේ පූජාවන් නැහැ. වෙස් මූණු
දාගෙන සිංදු කිය කියා වෙසක් බලන්න යන්න බැහැ. දන්සැල්වල කියව කියව වරු
ගණන් පෝලිම්වල ඉන්න බැහැ. ටවුන් එකේ වෙසක් තොරණ් හදල නැහැ. නමුත් හිතලා
බලන්න ඇත්තටම අපි වෙසක් කියල කරල තියෙන්නෙ මොනවද? ඒ කරපු දේවල් බුද්ධ
දේශනාවත් එක්ක යම්කිසි සම්බන්ධයක් තියෙනවද? නැහැ නේද?

එහෙනම් අපි මේ වෙසක් පෝයට ගෙදර ඉඳන් කරන්න ඕනි මොනවද? වෙනදා වගේ ගේ
වටේටම වෙසක් කූඩු, බල්බ් වැල් එල්ලන්න බැරි වුණත්, පවුලේ හැමෝම එකතු වෙලා
වෙසක් කූඩු කිහිපයක් හදලා එල්ලන්න පුළුවන්. ඒකත් හදන්නන් වාලෙ නෙමෙයි.
වෙසක් කූඩුවෙන් දෙන අර්ථය තේරුම් අරන්. ඒ කියන්නෙ ජීවිතේ අනිත්‍ය බව තේරුම්
අරන්. ඒ වගේම කොරෝනා වසංගතය නිසා පන්සල් යන්න බැරි වුණත්, ගෙදර ඉඳන්
අපිට අට සිල් සමාදන් වෙන්න පුළුවන්. සිල්පද අට රකින්න පන්සල් යන්න ඕනිම නැහැ
නේ. ගෙදර මල් පහන් තියලා බුද්ධ පූජාව පූජා කරන්න පුළුවන්. ගමේ ඉන්න අසරණ
මිනිස්සුන්ට කෑම වේලක් හදල ගිහින් දෙන්න පුළුවන්. ගෙවල් ළඟ ඉන්න අසරණ
සත්තුන්ට කෑම ටිකක් හදලා දාන්න පුළුවන්. ඉතින් අන්න ඒ විදිහට මෙදා පාර වෙසක්
උත්සවය ගෙදර ඉඳන් බොරු ශෝභන නැතිව, වෙනදාට වඩා අර්ථවත්ව, බුද්ධ දේශනාවෙන් කියවෙන ලෝක ධර්මතාවය අවබෝධ කරගෙන සමරන්න පුළුවන් කියලයි
මගේ විශ්වාසය.

Image courtesy :

https://bit.ly/2W9GoOr
https://bit.ly/2SFC7jB
https://bit.ly/35IBUkP