කඳුළකට දිය නොවන
මිදුණ සිත රිදුම් දෙන කල
හාත්පස එකක් සේ නැගෙන
රැහැයි අඬහැරියාව
දෙසවනින් මකාලන්නට
සිහින කවුළුවෙන් සිත අයා බැලුවෙම්…
සුසුම් බරින් අවමන් ලද පවන
කළු පාට තුරුපත් හා කියන
නෝක්කාඩු සර සරය මැද
එක සේ හඬ තලන
මිහිරි ම නිහඬ බව අසා සිටියෙම්…
හිත හීන අද්දර ලතැවෙන
සඳ එළිය නැති රැයේ
මං සොයා කරක් ගසන
කණාමැදිරි එළි තිත්
තැනින් තැන මතුව මවනා
එකට පැටලී ගිය රටා
සිතුවම් වෙන්න ඉඩ හැරියෙම්… දෙනෙත් තුළ
කඩින් කඩ වැටෙන
රෑ පොද මල්
කටු ඉත්තෙන් රූටා යද්දී
අවසන, නල රැලි හා වෙළී ආ
පිවිතුරු යෙහෙළි
සේපාලිකා සුවඳකට ලොබින් බැඳුණෙම්…
Written By Nipuni Kadupitiya
Image Credits: Nipuni Kadupitiya