මේ… ආදරයක් නම් නෙමෙයි. හැබැයි, ඊටත් එහා ගියපු, හරි ලස්සන නිවීමක්. හිත සුවඳ කරපු පින්සාර විඳීමක් !!

පෝය දවස තවත් ලස්සන කරන, තවත් පින්වන්ත කරන ඒ අය වෙනුවෙන් ”පුංචි උපහාරයක් ” තමයි මේ !

වැව සරසන සුනිමල මනකල් තඹරු

විඳිනට පෙර මදයෙන් රොන් මත් බඹරු

දැහැනට රස සමඟින් විත් හිරු කුමරු

දුටුවෙමි නෙළනා යුරු පියකරු මියුරු

පන්සල වෙත පියවර මනිනා දෙපස

පිවිතුරු කරවා හරි කඩිසර විලස

දෝතින් ගත් මල්මිට සැදැහෙන් සතොස

දුටු නෙතු වින්දා නොදැනිම සිල් පහස

ජලය මතින් පුබුදන මුව නෙළුම් මලේ

අවිහිංසක හසරැලි රැඳි නිසංසලේ

මුකුලිත වෙන මුත් නෙළුමෙත් රුසිරි බලේ

සතුටයි සිහි වන විට රුව සෑම කලේ

පිය තෙපුලින් කරනා රස ඇමතුම

දම් රසයෙන් නහවා ලද සැනසුම

නිම් නොවෙනා සිතුවිලි කොට පබැඳුම

පින් කෙත වපුරන්නටදෝ ඇරයුම

සරලයි රිද්මය තාලය හරි රසවත්

විරලයි අද ඇති අය චරිතය ගුණවත්

එයමයි ළඳකට ආභරණය කවදත්

සුවඳයි ඔය හදවත නෙළුමින් සිප ගත්

ලස්සන මල් තියලා එක මිටකට

සිසිලස පොවනා ජීවන ගමනට

තුන් සිත පහදා සමිඳුන් පිදුමට

පැතුවෙමි ඔය අත හිමි කර ගැනුමට

Image Courtesy: https://bit.ly/2OOrtEH