ජලයේ කෙළිලොල්ම ක්‍රීඩාව ලෙස
රුදුරු ජල කඳ තරණයේ
මතු කරනා මංමාවත් තුල
කිඳා බැස ජය ගොස නගයි රැස

නිල් රුධිර දහරා මත
පිවිසෙනා හැඟුම් අපමණ
සනසවයි සිත් විටෙක බියගුළු
කෙලෙස මතුවෙන් ද මෙතුවට

අප්‍රේල් මස 29 පටන් ගත්ත Freshers’ Meet එකේ තවත් එක් උද්වේගකාරී තරගාවලියක් තමයි අදත් තිබ්බේ. ඒ තමයි බොහෝ දෙනෙකුට නව අත්දැකීමක් වන ඔරු පැදීමේ තරගාවලිය. 2019 අප්‍රේල් මස 04 වන දින පස්වරු කොළඹ විශ්වවිද්‍යාලයීය ක්‍රීඩාගාරයේදී තමයි මෙය පැවැත්වුණේ. මේ සැරෙත් තුම්මුල්ලෙ දි තරගෙට ඔරු පදින්න ආවෙ පීඨ 7 සහ අනුබද්ධිත ආයතනයි.
2019 නවකයින්ගෙ හටන් ගොන්නේ 12 වෙනි කෙළි හටන වුනේ අපි කවුරුත් අසාවෙන් බලාගෙන ඉන්න ඔරු පැදීම තමයි. දින, සති, මාස පුරුදු පුහුණු වුනු අපේ යාළුවෝ faculty ය වෙනුවෙන් ඔරු පදින්න ලහි ලහියේ සැරසුණු අපූරුව මතකයි හොඳටම.
ඔරු පැදීම කිව්වම ඉතින් අපි බලන් ඉන්නෙ බේරෙ වෑව ගාවට ගිහින් තමන්ගෙ faculty ය වෙනුවෙන් කෑගහන්න වගේම සතුට බෙදා හදා ගන්න.ඒත් ඉතින් freshersල වෙච්ච අපි, පෙරළගන්නෙ නැතුව ඔරු පදින්න දන්නවද? නෑනේ…..ඉතින් අපේ තරගකරුවන්ගේ දක්ෂතාවය තීරණය කළේ, ඔරු පැදීමේ තාක්ෂණික උපක්‍රම පරීක්ෂා කරලා තමයි. ආරම්භයේ ඉදලම  ජය ගොස මැද තරග වැදුණු අප සහෝදර සහෝදරියෝ සැම දෙනාම අපිට ලොකු ශක්තියක් වගේම ආඩම්බරයක්. සිතාගත නොහැකි ලෙස ඔල්වරසන් නද මුළු ක්‍රීඩාංගණය පුරාම ඔරු පැදීම අවසන් වෙනකල්ම තිබුණා. හැම මුහුණකම තිබ්බේ අපි අද දිනනවාමයි කියන හැගීම විතරයි. නොඉවසිලිමත් බව ඔරු පැදීමෙදී කොහොමත් තියෙනවනෙ..

ඔරු පැදීම කාන්තා හා පිරිමි අංශ දෙකක් ලෙස පැවැත්වුනු අතර, පිරිමි අංශයේ පළමු ස්ථානය විතරක් නෙවෙයි දෙවන ස්ථානයත් දිනා ගත්තෙ කළමණාකරන හා මූල්‍ය පීඨයයි. තුන් වන ස්ථානය දිනා ගත්තෙ කොළඹ විශ්වවිද්‍යාලයීය පරිගණක අධ්‍යාපන ආයතනය ‍යි. ඒ විතරක් නෙවෙයි හතර වන ස්ථානය දින ගත්තේ තාක්ෂණ පීඨයයි. කාන්තා අංශයේ පළමු ස්ථානය නීති පීඨය දිනා ගනිද්දී දෙවන ස්ථානයට උරුමකම් කීවේ කොළඹ විශ්වවිද්‍යාලයීය පරිගණක අධ්‍යාපන ආයතනයයි. තෙවන ස්ථානය හෙද පීඨය දිනා ගත් අතර සිව් වන ස්ථානය නීති පීඨය දිනා ගත්තා.

බේරේ වැවේ පැද්දෙ නැති වුනත් ඔරු පැදීම අති උද්වේගකාරී තරගයක් වුණා. යාළුවොත් එක්ක එකට හිනා වුණු අඬපු මේ පුංචි කාලය අපි හැමෝටම මහ මෙරක් තරම්…. අලුත් යාළුවොත් එක්ක විනෝදයෙන් ගත කරපු, තව කාලයක් යනකල් හිනාවෙන්න පුළුවන් විදිහෙ මතකයන් ගොන්නක් එකතු කර ගත්තා අපි හැමෝම.
Freshers තරඟාවලියේ තවත් එක් උණුසුම් ඉසව්වක් වූ ඔරු පැදීම මෙලෙස අප්‍රේල් මස 04 වන දින සවස් යාමයේ අවසානය සනිටුහන් කළා.

Written By : Dilini Sandamali

Image Courtesy : https://bit.ly/2OSMnSf