මල්ලවපොර තරග සමඟ නැවත Freshers උණුසුම

Deshapriya , , 0 Comments

‘සරසවි කුළුදුල් විද්‍යාර්ථීන්ගේ’ ක්‍රීඩා කෞශල්‍යය උරගා බැලෙන, මහා කෙළි සංග්‍රාමය, ‘freshers 2019′, පසුගිය දිනවල රටේ ඇති වූ අනාරක්ෂිත තත්වය සහ විශ්වවිද්‍යාලයීය වැඩවර්ජන කටයුතු හේතුවෙන් දින නියමයකින් තොරව කල් දැමීමට සිදුවිය.

තරග ඉසව් විසිදෙකක් යටතේ සංවිධානය වූ ‘freshers 2019′  තරගාවලියේ ඒ වනවිට තරග ඉසව් දහහතක් සාර්ථකව අවසන් කර තිබුණි.

තුන්මසකටත් අධික කාලයක් පුරා පැවැති මහා ඉඩෝරයට සිහිල් නිල් වසන්තය කැන්දාලමින්, කොළඹ විශ්වවිද්‍යාලයීය ගෘහස්ථ ක්‍රීඩාංගණයේදී, නොවැම්බර් මස පළවෙනිදා පැවැත්වුණු ‘මල්ලවපොර ක්‍රීඩා ඉසව්වත්’ සමඟින් ‘freshers 2019′ යළිත් ආරම්භ විය.

ස්වකීය පීඨය දිනවීම අරමුණු කරගත් විද්‍යාර්ථීන්ගේ හදවත් උණුසුම් බලාපොරොත්තු වලින් පුරවාලමින්,මාස තුනක් පමණ අතීතය බලා නැවතත් පියමං කිරීමට සියල්ලෝම එක සේ අත්වැල් බැඳගත්හ.

තරග හා ලකුණු සම්බන්ධ විනිසුරුවරුන්,තරගකරුවන් සහ සුබපැතුම් සහ ආසිරි පැතීමට එකතු වුණු සහෝදර විද්‍යාර්ථීන්ගෙන් ගෘහස්ථ ක්‍රීඩාගාරය අතුරු සිදුරු නොමැතිව පිරී තිබුණි.

තරග නීතිරීති,කොන්දේසි සහ වැදගත් උපදෙස් සිහිපත් කර දී,ශාරීරික සුවතා  වැඩසටහන පවත්වා, පස්වරු දෙකයි තිහ පමණ වන විට ‘මල්ලවපොර ඉසව්ව’ ආරම්භ විය.

ශාස්ත්‍ර පීඨය, හෙද පීඨය, කළමනාකරණ පීඨය, UCSC, ආයුර්වේද පීඨය, විද්‍යා පීඨය හා තාක්ෂණ පීඨය නියෝජනය කරමින් ක්‍රීඩකයින් තිහකට ආසන්න සංඛ්‍යාවක් මල්ලවපොර ශූරතාවය සිය පීඨය වෙත දිනා දීම වෙනුවෙන් මහත් උද්යෝගයෙන් තරග බිමට පැමිණ සිටියහ.

කාන්තා අංශය යටතේ  මල්ලවපොර ඉසව්ව නොපැවැත්වුණු අතර සියලුම තරගවට පිරිමි අංශය යටතේ පැවැත්විණි.

ජයගෝසා සහ ඔල්වරසන් හඬ මැදින් ප්‍රතිමල්ලව තරගකරු හා පවත්වන ‘මිනිත්තු තුනේ පොරය’ ඉතාමත් උණුසුම් මුහුණුවරක් ගැනුණි.

ජයග්‍රහණය අපේක්ෂාවෙන් තරග වට පැවැත්වුණත්, ‘සහෘදත්වය’ සහ ‘මිතුරුකමින්’ යුතුව බොහොම ඉවසීමෙන්, සුහද සිතින් ක්‍රීඩා කරන බව පැහැදිලිවම දක්නට ලැබුණි.

රාත්‍රී අට පමණ වනවිට අවසන් වූ ඉසව්වේ, ‘සමස්ත ලකුණු පුවරුව’ පහත පරිදි විය.

ශාස්ත්‍ර පීඨය – 03
හෙද පීඨය – 06
කළමනාකරණ පීඨය – 0.5
UCSC – 33
ආයුර්වේද පීඨය – 10.5
විද්‍යා පීඨය – 11.5
තාක්ෂණ පීඨය – 18.5

ඒ අනුව මල්ලවපොර තුන්වනස්ථානය විද්‍යා පීඨය විසිනුත්, අනුශූරතාවය තාක්ෂණ පීඨය විසිනුත්, ශූරතාවය UCSC විසිනුත් ,දිනා ගන්නා ලදී .

දිගු විරාමයකට ‘ආයුබෝවන්’ කියමින්, යළිත් ආරම්භ වුණු ‘freshers 2019′, ‘මල්ලවපොර ක්‍රීඩා ඉසව්ව’ මෙලෙසින් නිමාව දක්නා ලදී.

‘freshers 2019′ උණුසුම විඳගන්න, තරග විස්තරත් එක්ක update වෙන්න, රැඳී ඉන්න FOS Media අපිත් එක්කම !!

Image Courtesy : FOS media