බැඩ්මින්ටන් සමඟ උණුසුම් වු නවකයන්ගේ ක්‍රීඩා උළෙල.

Share

මැයි මස හයවන දින කොළඹ විශ්වවිද්‍යාලයීය ගෘහස්ථ ක්‍රීඩාංගනය සිසුන්ගේ ඔල්වරසන් හඬින් දෙදෙරා ගියේ මන්ද? ඒ එදින පැවැත්වුණු නවකයින්ගේ ක්‍රීඩා උළෙලේ බැඩ්මින්ටන් තරඟාවලියේ උද්වේගකාරී හැඟුමෙනි. මෙම තරඟාවලිය සඳහා විද්‍යා පීඨය, වෛද්‍ය පීඨය, නීති පීඨය, කළමනාකරණ හා මූල්‍ය පීඨය,ශාස්ත්‍ර පීඨය, තාක්ෂණ පීඨය, හෙද පීඨය හා කොළඹ විශ්වවිද්‍යාලයීය පරිගණක අධ්‍යයන ආයතනය නියෝජනය කරමින් ක්‍රීඩක ක්‍රීඩිකාවෝ රැසක් සහභාගී වූහ.

තම පීඨය සඳහා කුසලානය රැගෙන ඒමට බාලක, බාලිකා යන දෙ අංශයේම තරඟකරුවන් අතර තිබූ උද්‍යෝගය හා කැපවීම මෙහිදී කැපී පෙනෙන්නට විය. ඒ මෙය ශිෂ්‍ය ශිෂ්‍යාවන්ට නැවුම් අත්දැකීමක් වූ හෙයිනි. බාලක අංශය සඳහා විද්‍යා පීඨය නියෝජනය කරමින් කණ්ඩායම් ද්විත්වයක් ද, බාලිකා අංශය සඳහා එක් කණ්ඩායමක් ද තරඟ වැදුණි.

කරට කර පැවති තියුණු තරඟ වට කිහිපයකින් පසුව මෙහි කාන්තා අංශයේ ප්‍රථම ස්ථානය විද්‍යා පීඨයට හිමි වූ අතර එහි දෙවන හා තෙවන ස්ථාන පිළිවෙලීන් කොළඹ විශ්වවිද්‍යාලයීය පරිගණක අධ්‍යයන ආයතනය හා ශාස්ත්‍ර පීඨය විසින් දිනා ගන්නා ලදී. පිරිමි අංශයේ ප්‍රථම ස්ථානය කළමනාකරණ හා මූල්‍ය පීඨයත්, දෙවන ස්ථනය කොළඹ විශ්වවිද්‍යාලයීය පරිගණක අධ්‍යයන ආයතනයත්, තෙවන ස්ථානය  විද්‍යා පීඨ A කණ්ඩායමත් ලබා ගත්හ.

බැඩ්මින්ටන් තරඟාවලියේ සමස්ත ශූරතාවය විද්‍යා පීඨයත්, කොළඹ විශ්වවිද්‍යාලයීය පරිගණක අධ්‍යනායතනයත් අතර සමව බෙදී යමින් තවත් එක් උද්වේගකාරී දවසක් මෙලෙස නිමාවට පත්විය.

Image Courtesy : FOS Media

 
Tagged :