සහෝදරත්වයේ දෑගිලි බැදුණු නවකයන්ගේ ජයඝෝෂාවේ සමාප්ති සනිටුහන

Share

සෑම ආරම්භයක්ම සනිටුහන් වනුයේ අවසානයකිනි. සහෝදරත්වයේ ගිනිසිලු දල්වමින්, උත්සාහයේ ප්‍රාර්ථනා නංවමින්, 2018 මාර්තු මස 2වන දින ආරම්භ වුණු කොළඹ විශ්වවිද්‍යාලයීය නවකයන්ගේ ක්‍රීඩා උළෙල 2018 මැයි මස 17 දිනයේදී අවසානය සනිටුහන් කළේ කැපවීම, අධිෂ්ඨානය, ධෛර්යය මෙන්ම සමගිය සහෝදරත්වය මතින් ගොඩනැගුණු විශ්වාසයේ මහා දෝංකාරය විශ්වවිද්‍යාලයීය වා තලයට මුසුකරමිනි.

පුරා මාස 2කට අධික කාලයක් මුළුල්ලේ විශ්වවිද්‍යාලයීය ක්‍රීඩා අඹරේ ක්‍රීඩා ඉසව් 22 ඔස්සේ පීඨයන් 11ක් අතර තීව්‍ර ජයකෙහෙලි නැංවු නවකයන්ගේ ක්‍රීඩා උළෙලේ සමාප්ති උත්සවය පැවැත්වූයේ විද්‍යා පීඨයේ පීඨාධිපති සහ විශ්වවිද්‍යාලයීය ක්‍රීඩා මණ්ඩලයේ මූලාසනය හොබවන මහාචාර්ය K.R.R මහානාම මහතාගේ ප්‍රධානත්වයෙනි.

ලකුණු 177ක් ලබාගනිමින් වැඩි ලකුණු 28ක විශිෂ්ට ජයග්‍රහනයක් සමග කාන්තා අංශයේ සමස්ථ ශූරතාවයත් පිරිමි අංශයේ සමස්ථ ශූරතාවයත් ලබාගනිමින් අඛණ්ඩව තෙවන වරට තරගාවලියේ සමස්ත ශූරතාවය ලබාගනිමින් තරග සටහනේ ඉදිරියෙන්ම රැදී සිටින්නට විද්‍යා පීඨය සමත් වූයේ විද්‍යා පීඨය අධ්‍යාපනය, කලාව ක්‍රීඩාව ආදී සකලවිධ හැකියාවන්ගෙන් පරිපූර්ණ පීඨයක් බවට පසක් කරමිනි.

ටෙනිස්, පැසි පන්දු, කැරම්, බැඩ්මින්ටන්, එල්ලේ, ටයික්වොන්ඩෝ ආදී ක්‍රීඩා අංශයන් 13ක සමස්ථ ශූරතාවය තමන්ගේ සතුකර ගැනීමට විද්‍යා පීඨ සිසුන්ට සමත් වන විට, පිහිණුම්, රග්බි, හොකී, දැල් පන්දු ඇතුළු ක්‍රීඩා ඉසව් 13කම සමස්ථ ශූරතාවය ලබාගනිමින්, විද්‍යා පීඨ සිසුන්ට ආරම්භක මොහොතේ පටන්ම කරට කර තරගයක් ලබාදීමට ලකුණු 149ක් ලබා තරගාවලියේ දෙවන ස්ථානයට පත් වූ කළමනාකරණ හා මූල්‍ය පීඨයේ සිසුන් සමත් විය.

ආරම්භයේ පටන්ම දැඩි උද්යෝගයකින් තරග කළ කොළඹ විශ්වවිද්‍යාලයීය පරිගණක ආයතනයේ සිසුන් සමස්ථ තරගාවලියේ තෙවන ස්ථානය හිමි කරගනු ලැබුවේ ලකුණු 115ක් ලබාගනිමින් ක්‍රීඩා ඉසව් 7ක ජයග්‍රහණයන් තහවුරු කරගනිමිනි.

නවකයන්ගේ ක්‍රීඩා උළෙලේ බර කරට ගනිමින් නවකයන්ට ශක්තියක් වෙමින් ඔවුන් පසුපස නිබඳව සිටිමින් දෙවන වසර සිසුන් ලබාදුන් සහයෝගයත්, එකාවන්ව වැටෙමින් නැගිටිමින් ජයග්‍රහණය කරා පියනැගීමින් ප්‍රථම වසර සිසුන් එක පවුලක් ලෙසින් කළ කැපවීමත් හැර කොළඹ විශ්ව විශ්වවිද්‍යාලයීය සහෝදරත්වය කියාපෑමට තවත් කිනම් උදාහරණද?

ජයග්‍රහණයේ සතුටත් නවකයන්ගේ ජයගෝෂාවත් මැදින් 2018 නවකයන්ගේ ක්‍රීඩා උළෙල නිමාව දුටුවේ ඉතා උත්කර්ෂවත් අන්දමිනි.

2018 නවකයන්ගේ ක්‍රීඩා තරගාවලියේ තතු ඔබ වෙතට ගෙනහැර පෑ විද්‍යා පීඨ නිල මාධ්‍ය ඒකකය වන FOS Media අපගේ මාධ්‍ය මෙහෙවරේ අවසානයයි මේ. පුරා මාස 2කට අධික කාලයක පැවති සියලු නවකයිනේ තරගවල තතු ප්‍රථමයෙන්, නිවැරදිව ඔබ වෙතට ගෙන ඒමට අපට හැකිවුණා. ජවසම්පන්න වූ කෙළිබිමේ මෙවැනිම වූ සුවිශේෂි මාධ්‍ය ක්‍රියාන්විතයක යෙදෙන්නට බලාපොරොත්තුවෙන් අදින් අප ඔබගෙන් සමුගන්නවා.

 
Tagged : /