නවක ක්‍රීඩා පිටියේ පැසිපන්දු අසිරිය

Blog Team , 0 Comments

2019 – නවකයන්ගේ මහා ක්‍රීඩා මංගල්‍යයයේ අවසන් දින කිහිපය ගෙවෙමින් පවතී. කුමන පීඨය ජය කිරුළ තමා සතු කර ගැනීමට සමත් වේදැයි කීම ඉතා අපහසුය. ජය පරාජය දෝලනය වන අති උද්වේගකාරී සතියක ආරම්භයත් සමඟ නවකයන්ගේ පැසිපන්දු හටන නොවැම්බර් 05 වන අඟහරුවාදා දින පැවැත්විය. ඒ කොළඹ විශ්වවිද්‍යාලයීය පැසිපන්දු ක්‍රීඩා පිටියේදී ය.

එකිනෙකට නොදෙවෙනි ලෙස ක්‍රීඩා කරන කණ්ඩායම් රැසක් එකිනෙකාට අභියෝග කරගනිමින්, එසේම ක්‍රීඩාවේ ජීව ගුණය නිසි ලෙස පවත්වා ගනිමින් ක්‍රීඩා කරන අපූරු පැසිපන්දු තරගයක චමත්කාරය අත් විඳීමට ක්‍රීඩාලෝලී සරසවි සිසුන්ට අවස්ථාව මේ හරහා උදා විය.

තරගාවලිය සඳහා කාන්තා සහ පිරිමි අංශ නියෝජනය කරමින් කණ්ඩායම් හතර බැගින් සහභාගී විය. ඒ විද්‍යා පීඨය, කලා පීඨය, කළමනාකරණ හා මූල්‍ය පීඨය සහ කොළඹ විශ්වවිද්‍යාලයීය පරිගණක අධ්‍යයනාංශය නියෝජනය කරමිනි.

මෙවර පැසිපන්දු තරගාවලිය පවත්වන ලද්දේ ලීග් ආකාරයට ය. සෑම කණ්ඩායමටම තරග වට තුන බැගින් ක්‍රීඩා කිරීමට අවකාශය හිමි වූ අ‍තර වැඩිම තරග වට ගණනාවක් ජයග්‍රහණය කළ කණ්ඩායම ජය කිරුළේ හිමිකරුවන් ලෙස අබිසෙස් ගැන්වුනි.

විදුලියක් සේ පැසිපන්දුව ලුහුබඳිමින් ,විටෙක ප්‍රතිවාදීන් සමඟ පොරබඳිමින් තම කණ්ඩායම් සගයන්ගේ දෑතට නොවරදින ලෙස යොමුකර අවසානයේ නොවරදින ඉලක්කයෙන් යුතුව පැසිපන්දු දැල වෙත යොමු කිරීම ක්‍රීඩාලෝලීන් හට ඉතා උද්වේගකර අත්දැකීමක් ලබා දීමට සමත් විය. දැඩි කැපවීමෙන්, මනා පුහුණුවෙන් ලද දැනුමින් යුතුව ක්‍රීඩක ක්‍රීඩිකාවෝ තම ක්‍රීඩා උපායයන් සියල්ල පැසිපන්දු පිටියේ මුදා හැරියේ තම ක්‍රීඩා කෞශල්‍යය මනාව ප්‍රදර්ශනය කරමිනි.

තරග වට සියල්ල අවසානයේ නවකයන්ගේ මහා ක්‍රීඩා මංගල්‍යයේ පැසිපන්දු තරගාවලියේ කාන්තා අංශයේ ජයග්‍රාහිකාවන් ලෙස කලා පීඨ ක්‍රීඩිකාවෝ කිරුළු පැළදියහ තරගාවලියේ දෙවන ස්ථානයට කළමණාකරණ හා මූල්‍ය පීඨ ක්‍රීඩිකාවන් පත් වූ අතර තෙවන ස්ථානය විද්‍යා පීඨ ක්‍රීඩිකාවෝ දිනා ගත්හ.

පිරිමි අංශයේ ශූරයින් ලෙස කොළඹ විශ්ව විද්‍යාලයීය පරිගණක අධ්‍යයනාංශයේ කණ්ඩායමේ ක්‍රීඩකයින් අබිසෙස් ලැබීය. අනුශූරතාවය කළමනාකරණ හා මූල්‍ය පීඨ ක්‍රීඩකයන් දිනා ගත් අතර තෙවන ස්ථානය තමා සතු කර ගැනීමට විද්‍යා පීඨ පැසිපන්දු ක්‍රීඩකයෝ සමත් වූහ.

නවකයන්ගේ ක්‍රීඩා හටනේ නිමාව සනිටුහන් වූයේ සමස්ත ශූරතාවය කළමනාකරණ හා මූල්‍ය පීඨයටත්, සමස්ත අනුශූරතාවය කොළඹ විශ්වවිද්‍යාලයීය පරිගණක අධ්‍යයනාංශයටත් තෙවන ස්ථානය කලා පීඨයටත් හිමි කර දෙමිනි.

කොළඹ විශ්වවිද්‍යාලයීය නවක විද්‍යාර්ථීන්ගේ මහා ක්‍රීඩා සැණකෙළියේ පැසිපන්දු තරගාවලියේ ජයග්‍රාහී කණ්ඩායම් සියල්ලෙහිම ක්‍රීඩක ක්‍රීඩිකාවන් සැමට FOS Media අපගේ උණුසුම් සුභ පැතුම්

Author – Sajini Vindula

Image Courtesy – FOS Media