එකම කිරුළක් වෙනුවෙන් බලාපොරොත්තු දල්වාලමින් කොළඹ සරසවි කෝඩුකාරයින්ගේ මහා කෙළි මංගල්‍යය පසුගිය දා (29) විශ්වවිද්‍යාලයීය ක්‍රීඩාංගණයේ දී සමාරම්භය සනිටුහන් කළේ ය. පීඨ නවයක් සහ අනුබද්ධිත ආයතන තුනක් එකිනෙකා පරයා තරඟ වදින මෙවර තරඟාවලියේ පළමු ක්‍රීඩා ඉසව්ව වූ හොකී ඉසව්වේ පිරිමි සහ කාන්තා අංශ දෙකේ ම අණසක පතුරවන්නට කළමනාකරණ හා මූල්‍ය පීඨය සමත් විය.

පිරිමි අංශය
පීඨ සහ අනුබද්ධිත ආයතන හතක් නියෝජනය කරමින් කණ්ඩායම් එකොළහක් සහභාගී වූ හොකී පිරිමි අංශයේ තරඟය ආරම්භයේ පටන් ඉතා තියුණු ස්වරූපයක් ප්‍රදර්ශනය කළේ ය. අතිරේක ක්‍රීඩකයින් දෙදෙනෙකු ද සමඟින් ක්‍රීඩකයින් නව දෙනෙකුගෙන් සමන්විත කණ්ඩායමක් හෝ දෙකක් තරඟය සඳහා ඉදිරිපත් කිරීමට සියලු පීඨ සහ අනුබද්ධිත ආයතනවලට අවස්ථාව හිමි වූ අතර එක් තරඟයක් මිනිත්තු අටකට සීමා විය.
ප්‍රධාන කාණ්ඩ හතරක් යටතේ දියත් වූ මූලික වටයේ තරඟවල ප්‍රතිඵල මත ඒ ඒ කාණ්ඩයේ මුල් ස්ථාන දෙකට හිමිකම් කී කණ්ඩායම් අර්ධ අවසන් පූර්ව වටයට සුදුසුකම් ලැබී ය. ඒ අනුව A කාණ්ඩයෙන් කළමනාකරණ පීඨ-A හා තාක්ෂණ පීඨ කණ්ඩායම් ද, B කාණ්ඩයෙන් කළමනාකරණ පීඨ-B හා යූ.සී.එස්.සී-A කණ්ඩායම් ද, C කාණ්ඩයෙන් වෛද්‍ය පීඨ-A හා විද්‍යා පීඨ-B කණ්ඩායම් ද, D කාණ්ඩයෙන් නීති පීඨ හා විද්‍යා පීඨ-A කණ්ඩායම් ද ඉදිරි වටයට සුදුසුකම් ලබද්දී යූ.සී.එස්.සී-B, වෛද්‍ය පීඨ-B හා හෙද පීඨ කණ්ඩායම්වලට මූලික වටයෙන් ම සිය බලාපොරොත්තු අත් හැර දමන්නට සිදු විය.
අර්ධ අවසන් පූර්ව වටයේ තරඟවල දී විද්‍යා පීඨ-B කණ්ඩායම පරදා කළමනාකරණ පීඨ-A කණ්ඩායමත්, තාක්ෂණ පීඨ කණ්ඩායම පරදා වෛද්‍ය පීඨ-A කණ්ඩායමත්, විද්‍යා පීඨ-A කණ්ඩායම පරදා කළමනාකරණ පීඨ-B කණ්ඩායමත්, නීති පීඨ කණ්ඩායම පරදා යූ.සී.එස්.සී-A කණ්ඩායමත් අවසන් පූර්ව වටයේ සිය ස්ථාන වෙන් කර ගැනීමට සමත් විය. ඒ අනුව කළමනාකරණ පීඨ-A හා කළමනාකරණ පීඨ-B කණ්ඩායම් පළමු අවසන් පූර්ව තරඟයේ දී එකිනෙකා මුණ ගැසුණු අතර 1-0 ලෙස තරඟය ජය ගත්තේ කළමනාකරණ පීඨ-B කණ්ඩායමයි. වෛද්‍ය පීඨ-A කණ්ඩායම සමඟ පැවති දෙවන අවසන් පූර්ව තරඟයේ ජය 1-0 ලෙස යූ.සී.එස්.සී-A කණ්ඩායම සතු විය.
කළමනාකරණ පීඨ-B හා යූ.සී.එස්.සී-A කණ්ඩායම් අවසන් වටය සඳහා එලෙස සුදුසුකම් ලබද්දී තෙවන ස්ථානය වෙනුවෙන් කළමනාකරණ පීඨ-A හා වෛද්‍ය පීඨ-A කණ්ඩායම් තරඟ වැදුණි. මිනිත්තු අටක තරඟයකින් තොර ව දඬුවම් පහර මත පමණක් තීරණය වූ එම තරඟය දඬුවම් පහර 2-0 ලෙස සාර්ථක කර ගනිමින් වෛද්‍ය පීඨ-A කණ්ඩායම හොකී පිරිමි අංශයේ තෙවන ස්ථානය තමන් සතු කර ගැනීමට සමත් විය. ඉතා තියුණු මුහුණුවරක් ගත් අවසන් මහා තරඟයේ සම්පූර්ණ කාලය නිමා වන තුරුත් කිසිදු කණ්ඩායමකට ගෝලයක් ලබා ගැනීමට අවස්ථාවක් නොලැබුණු අතර දඬුවම් පහර මත තීරණය වූ තරඟය දඬුවම් පහර 3-2 ලෙස සාර්ථක කර ගනිමින් අඛණ්ඩ ව දෙවන වරටත් හොකී පිරිමි අංශයේ ශූරතාවය දිනා ගැනීමට කළමනාකරණ පීඨ-B කණ්ඩායම සමත් විය. ‍යූ.සී.එස්.සී-A කණ්ඩායමත් දෙවන ස්ථානය අඛණ්ඩ ව දිනූ දෙවන අවස්ථාව මෙයයි.

කාන්තා අංශය
හොකී ක්‍රීඩාවේ පළපුරුදු ක්‍රීඩිකාවන් මෙන් ම විශ්වවිද්‍යාලයේ දී මුල් ම වරට හොකී පිත්තක් අතට ගත් ක්‍රීඩිකාවන් ද එක ම කණ්ඩායම් හැඟීමකින් තරඟ වැදුණ කාන්තා අංශයේ හොකී කිරුළ මෙවර දිනා ගත්තේ කළමනාකරණ පීඨයයි. තරඟය සඳහා යූ.සී.එස්.සී. හා විද්‍යා පීඨය කණ්ඩායම් දෙක බැගින් ඉදිරිපත් කළ අතර සහභාගී වූ මුළු කණ්ඩායම් ගණන නවයකි. කාන්තා අංශයේ තරඟ ද මිනිත්තු අටකට සීමා විය.
ප්‍රධාන කාණ්ඩ දෙකක් යටතේ සංවිධානය වූ මූලික වටයේ තරඟවල දී ඒ ඒ කාණ්ඩයේ සියලු කණ්ඩායම් හා තරඟ වැදීමට සිදු වූ අතර කාණ්ඩයේ පළමු හා දෙවන ස්ථාන හිමි කර ගත් කණ්ඩායම් අවසන් පූර්ව වටයට සුදුසුකම් ලැබී ය. ඒ අනුව තියුණු තරඟ ගණනාවකට පසු නීති පීඨ හා යූ.සී.එස්.සී-A කණ්ඩායම් A කාණ්ඩයෙනුත් කළමනාකරණ පීඨ හා විද්‍යා පීඨ-A කණ්ඩායම් B කාණ්ඩයෙනුත් අවසන් පූර්ව වටයේ සිය ස්ථාන වෙන් කර ගැනීමට සමත් විය.
‍යූ.සී.එස්.සී-A හා කළමනාකරණ පීඨ කණ්ඩායම් අතර පැවති පළමු අවසන් පූර්ව වටයේ තරඟයේ ජය සම්පූර්ණ කාලය තුළ තීරණය නොවුණු අතර දඬුවම් පහර 1-0 ලෙස සාර්ථක කර ගනිමින් කළමනාකරණ පීඨය එහි ජය තහවුරු කර ගන්නා ලදී. දෙවන අවසන් පූර්ව වටයේ තරඟයේ දී පසුගිය වර ශූරියන් වූ විද්‍යා පීඨ-A කණ්ඩායම 1-0 ලෙස පරාජය කරමින් නීති පීඨ කණ්ඩායම අවසන් මහා තරඟයට සුදුසුකම් ලැබී ය.
කාන්තා අංශයේ තෙවන ස්ථානය වෙනුවෙන් පැවති තරඟයත් දඬුවම් පහර මත තීරණය වූ අතර එහි දී යූ.සී.එස්.සී-A කණ්ඩායම 2-0 ලෙස පරාජය කරමින් විද්‍යා පීඨ-A කණ්ඩායම තෙවන ස්ථානය දිනා ගැනීමට සමත් විය. නීති පීඨයත් කළමනාකරණ පීඨයත් අවසන් මහා තරඟයේ දී එකිනෙකා මුණ ගැසුණු අතර 1-0 ලෙස තරඟය ජය ගනිමින් හොකී කාන්තා අංශයේ ශූරතාවයත් දිනා ගැනීමට කළමනාකරණ පීඨය සමත් විය. නීති පීඨයට දෙවන ස්ථානයෙන් සෑහීමකට පත් වීමට සිදු විය.
ඒ අනුව හොකී ක්‍රීඩා ඉසව්වේ සමස්ත ප්‍රතිඵල මත සම දෙවන ස්ථානය යූ.සී.එස්.සී හා නීති පීඨය දිනා ගනිද්දී හොකී සමස්ත ශූරතාවය තමන් සතු කර ගැනීමට කළමනාකරණ පීඨය සමත් විය. සිය පීඨයේ හෝ අනුබද්ධිත ආයතනයේ තමන්ගේ ම සොයුරු සොයුරියන් වෙනුවෙන් ඔල්වරසන් දෙන්නට, ඔවුන් ව දිනවන්නට, දිරි ගන්වන්නට, අභිප්‍රේරණය කරවන්නට විද්‍යාර්ථීන් විශාල පිරිසක් ක්‍රීඩාංගණයට එක් රොක් ව සිටි අයුරු දැක ගන්නට ලැබිණි.

Image Courtesy : FOS Media