පිටිය සිසාරා තෙද බල සවි රැන්දූ නවකයන්ගෙ අභිමානය ඇල පන්දූ

Share

2019 නවකයන්ගේ කුළුඳුලේ හටනේ අට වැනි කෙළි අදියර ‘රගර්’, (සරසවි බසින් කිවතොත්, ඇල පන්දු) තරග ඉසව්ව අප්‍රේල් මස 02 වෙනිදා කොළඹ විශ්වවිද්‍යාලයීය ක්‍රීඩාංගණයේ දී ඉතාමත් සාර්ථක අන්දමින් පැවැත්විණි. පවතින දැඩි හිරු රශ්මියත්, වියළි කාලගුණයත් තරගයේ උණුසුම වඩාත් ඔප් නංවාලීමට හේතු විය. දින ගණනාවක් පුරාවට මනා ලෙස කායික මෙන්ම මානසික පුහුණුවක් ලබා, තම පීඨය වෙනුවෙන් ලකුණු පිපාසාවෙන් පෙළෙන සරසවි විද්‍යාර්ථයින් ස්වකීය හදවතේ එකම පැතුම මුදුන්පත් කර ගැනීමේ තිර අදිටනින්, සියලු බාධක නොසලකා, ලහි ලහියේ සංවිධානය වන අපූරුව කැපී පෙනෙන්නට විය.

ස්වකීය ක්‍රීඩක සොයුරන්ට හදවතින්ම සුබ පතමින්, ජය ගොස නගන්නට තම පීඨයේ අනන්‍යතාව පිළිඹිබු කෙරෙන ධජ රැගත් ශිෂ්‍ය ශිෂ්‍යාවෝ රගර් ක්‍රීඩා පිටිය අරා ගෙන සිටින අයුරු දැක ගත හැකි විය.හඳුන්වා දෙනු ලැබූ තරග නීති රීති අනුව විනාඩි දහතුනක කාලයක් වරකට ක්‍රීඩකයින් හතක් බැගින් ක්‍රීඩාවේ යෙදවීමට අවසර ලැබිණි. ඒ අනුව කළමනාකරණ හා මූල්‍ය පීඨ කණ්ඩායම, විද්‍යා පීඨ කණ්ඩායම, UCSC කණ්ඩායම, තාක්ෂණ පීඨ කණ්ඩායම, ශාස්ත්‍ර පීඨ කණ්ඩායම, නීති පීඨ කණ්ඩායම හා වෛද්‍ය පීඨ කණ්ඩායම ලෙසින් මනා සංවිධිත  කණ්ඩායම් හතක් ඇල පන්දු කිරුළ වෙනුවෙන් සිහින දල්වා ගත්හ.

ජවය, ශක්තිය, වේගය, දරාගැනීම, එකමුතුබව හදවත් වල තුරුලු කරගෙන, තරමක උද්වේගකර තරඟ වට කිහිපයකින් අනතුරුව, සහෝදර ක්‍රීඩක ක්‍රීඩිකාවන්ගේ ප්‍රීති ඝෝෂා සහ ඔල්වරසන් මධ්‍යයේ රගර් කිරුළ තම දෑතට ගැනීමට UCSC කණ්ඩායම සමත් වූ අතර, තියුණු තරගාවලියකින් අනතුරුව අනුශූරතාවය දිනා ගැනීමට කළමනාකරණ හා මූල්‍ය පීඨ කණ්ඩායම සමත් විය. වෛද්‍ය පීඨ කණ්ඩායම පරාජයට පත් කරමින්,  තුන් වන ස්ථානය දිනා ගැනීමට විද්‍යා පීඨ කණ්ඩායම උත්සුක විය.

නවක හටනේ රගර් ඉසව්වේ නවමු පියවරක් සනිටුහන් කරමින්, “කාන්තා කණ්ඩායම් රගර් තරග ඉසව්” පළමු වතාවට 2019 නවක හටනට ඇතුළත් කොට තිබිණි. කළමනාකරණ හා මූල්‍ය පීඨය, විද්‍යා පීඨය, ශාස්ත්‍ර පීඨය විසින් කණ්ඩායම බැගින් ද, නීති පීඨය මගින් කණ්ඩායම් දෙකක් ද යොදවා තිබිණි. කළමනාකරණ හා මූල්‍ය පීඨය සහ නීති පීඨය විසින් පිළිවෙලින් පළමු සහ දෙවෙනි ස්ථාන දිනා ගත්ත ද, එම ලකුණු  අවසාන ප්‍රතිඵලයට එකතු කිරීමක් සිදු නොකෙරෙන බවත් දැනුම් දෙනු ලැබිණි.

නොමැකෙන මතකයන් සමුදායකින් මතක පොත පුරවාලමින්, නවක හටනේ ප්‍රතාපවත් ඉසව්වක් මෙසේ නිමාව දකින ලදී.

Image Coutesy : FOS Media

 
Tagged : / /