UCSC ටෙනිස් පිටියේ ජය කෙහෙළි නංවයි

Share

කොළඹ විශ්වවිද්‍යාලයීය කෝඩුකාරයන්ගේ ක්‍රීඩා කෞශල්‍යයයන් උරගා බලන 2019 වසරේ නවකයන්ගේ ක්‍රීඩා සටන මාර්තු මස 29 වන දින සැමගේම සිත් අමන්දානන්දයට පත්කරමින් ආරම්භය සනිටුහන් කරන ලදී. කිරුළ හිමිකර ගැනීමේ එකම අදිටනකින් නවකයන් උරෙන් උර ගැටෙන මෙම උද්වේගකාරී ක්‍රීඩා උළෙලේ තුන්වන දිනයේ තරඟ ලෙස ටෙනිස් තරඟ මාර්තු මස 31 වන දින කොළඹ විශ්වවිද්‍යාලයීය ටෙනිස් පිටියේ දී පැවත්විණි. ටෙනිස් ක්‍රීඩාවෙහි දක්ෂයන් බවට පත්ව සිටි නවක ක්‍රීඩක ක්‍රීඩිකාවන් ජයග්‍රහණයේ බලාපොරොත්තු රැගෙන සියලුම පීඨ නියෝජනය  කරමින් තරඟ  බිමට පිවිසියහ. ආරම්භක  මොහොතේ පටන්ම තරඟාවලිය උණුසුම් මුහුණුවරක් ගන්නා ලදී. ජය පැරදුම එකිනෙකා අතර දෝලනය  කරමින් සියලු දෙනාම මවිත කළ ඔවුන්ගේ ක්‍රීඩා විලාශය සැබැවින්ම ඔවුන් ක්‍රීඩාවෙහි අති දක්ෂයින් බව මනාවට පසක් කරන ලදී. එබැවින් නරඹන්නන්ගේ ආකර්ෂණය නිරායාසයෙන්ම දිනාගන්නට සියලුම තරඟකරුවන් සමත් විය.

පැවති උද්වේගකර තරඟ වට අවසානයේ, පිරිමි අංශයේ ප්‍රථම ස්ථානය තමන් සතු කර ගැනීමට  යූ.සී.එස්.සී කණ්ඩායම සමත් විය. ඔවුන් සමඟ  කරට කර තරඟ වැදුනු කළමනාකරණ හා මූල්‍ය පීඨ කණ්ඩායම දෙවන ස්ථානය තමන් සතු කර ගැනීමට සමත් වූ අතර එහි තෙවන ස්ථානය විද්‍යා පීඨ කණ්ඩායම විසින් තමන් සතු කරගන්නා ලදී.

ඉතාමත් තරඟකාරී මුහුණුවරක් ගත් කාන්තා අංශයේ තරඟ වට සියල්ල අවසානයේ, එහි ප්‍රථම ස්ථානය හිමිකර ගැනීමට යූ.සී.එස්.සී කණ්ඩායම සමත් විය.  කළමනාකරණ හා මූල්‍ය පීඨ කණ්ඩායම එහි දෙවන ස්ථනයට හිමිකම් කියනු ලැබූ අතර එම අංශයේ තෙවන ස්ථානය ලබා ගැනීමට විද්‍යා පීඨ කණ්ඩායම සමත් විය.

ටෙනිස් තරඟාවලියේ සමස්ත ප්‍රතිඵල අනුව ටෙනිස් කිරුළ තම හිස මත පැළඳවීමට යූ.සී.එස්.සී කණ්ඩායම සමත් වූ අතර  එම අංශයේ දෙවන ස්ථානය කළමනාකරණ හා මූල්‍ය පීඨ කණ්ඩායම විසින් හිමි කරගන්නා ලදී. එහි තෙවන ස්ථානය  ලබාගැනීමට විද්‍යා පීඨ කණ්ඩායමට හැකිවිය.

මෙතෙක් පැවති සියලු තරඟ ඉසව් මෙන්ම එළැඹෙන දින පුරාවට පැවැත්වීමට නියමිත තරඟ ඉසව් ද ඉතාමත් උණුසුම් මුහුණුවරක් ගන්නා බවට කිසිදු සැකයක් නැත. යහළු යෙහෙළියන්ගේ ඔල්වරසන් මැද තම ක්‍රීඩා දක්ෂතාවයන් විදහා පාන්නට තරඟ බිමට පිවිසෙන නවකයන් එකිනෙකාට නොදෙවෙනිව කටයුතු කරනු නොඅනුමානය.

එලෙස උද්වේගකාරී වන කෝඩුකාරයන්ගේ ක්‍රීඩා සටනේ දිනෙන් දින උණුසුම් වන තරඟ ප්‍රතිඵල FOS Media වෙතින් බලාපොරොත්තු වන්න…

Image Courtesy – https://bit.ly/2WyoHFp

 
Tagged : / /