නව ශූරයින් බිහිකළ නවකයන්ගෙ වොලිබෝල් ශූරතාවය

Share

කොළඹ සරසවි කෝඩුකාරයින්ගේ නවක කෙළි වසන්තය දිනෙන් දින උණුසුම් වෙමින් පවතින අතර ඒ අනුව ගෙවුණු අප්‍රේල් 02, 03 දෙදින දැයේ ක්‍රීඩාව වෙනුවෙන් වෙන් වී තිබුණි. විශ්වවිද්‍යාලයීය ක්‍රීඩාගාරයේ දී පැවති නවක වොලිබෝල් තරගාවලියේ දී පසුගිය වර පිරිමි අංශයේ ශූරයින් වූ කළමනාකරණ හා මූල්‍ය පීඨයත්, කාන්තා අංශයේ ශූරියන් වූ නීති පීඨයත් මෙවර අවසන් පූර්ව වටයටත් පෙර තරගාවලියෙන් ඉවත් වීම කැපී පෙනුණ සිදුවීමක් විය.

පිරිමි අංශය

ආරම්භයේ පටන්ම ඉතා තියුණු මුහුණුවරක් ගත් පිරිමි අංශයේ තරගාවලිය අනාගත වොලිබෝල් පෞරුෂත්වයන් සොයා යන්නට අනගි තෝතැන්නක් විය. අප්‍රේල් මස 02 දා දවස පුරා පැවති තරගාවලියට පීඨ හතක් හා අනුබද්ධිත ආයතන දෙකක් නියෝජනය කරමින් කණ්ඩායම් දහතුනක් එක් වූයේ කොළඹ සරසවියේ නවකයින්ගේ වොලිබෝල් කිරුළ තමන් වෙත නතු කර ගැනීමේ අභිලාෂයෙනි.
මූලික වටය තරග හයකින් පැවැත්වීමට නියමිත ව තිබුණත් දේශීය වෛද්‍ය විද්‍යා ආයතන කණ්ඩායමේ නොපැමිණීම නිසා විද්‍යා පීඨ කණ්ඩායම නිතරගයෙන් අර්ධ අවසන් පූර්ව වටයට සුදුසුකම් ලැබූ අතර තරග සටහනේ වාසියෙන් කළමනාකරණ හා මූල්‍ය පීඨ-B කණ්ඩායම හා UCSC කණ්ඩායම ද අර්ධ අවසන් පූර්ව වටයට නිතරගයෙන් සුදුසුකම් ලැබී ය. මූලික වටයේ තරගවල දී නීති පීඨ කණ්ඩායම අභිබවමින් ශාස්ත්‍ර පීඨ-A කණ්ඩායමත්, කළමනාකරණ හා මූල්‍ය පීඨ-A කණ්ඩායම අභිබවමින් වෛද්‍ය පීඨ-A කණ්ඩායමත්, වෛද්‍ය පීඨ-B කණ්ඩායම අභිබවමින් තාක්ෂණික පීඨ-A කණ්ඩායමත්, ශ්‍රීපාලි මණ්ඩප කණ්ඩායම අභිබවමින් හෙද පීඨ කණ්ඩායමත්, ශාස්ත්‍ර පීඨ-B කණ්ඩායම අභිබවමින් තාක්ෂණික පීඨ-B කණ්ඩායමත් අර්ධ අවසන් පූර්ව වටයේ සිය ස්ථාන වෙන් කර ගැනීමට සමත් විය. එකිනෙකා පරයා ජයග්‍රහණය වෙනුවෙන් සටන් වැදුණු අර්ධ අවසන් පූර්ව වටයේ තරගවල දී කළමනාකරණ හා මූල්‍ය පීඨ-B කණ්ඩායම පරදා ශාස්ත්‍ර පීඨ-A කණ්ඩායමත්, වෛද්‍ය පීඨ-A කණ්ඩායම පරදා විද්‍යා පීඨ කණ්ඩායමත්, හෙද පීඨ කණ්ඩායම පරදා තාක්ෂණික පීඨ-A කණ්ඩායමත්, තාක්ෂණික පීඨ-B කණ්ඩායම පරදා UCSC කණ්ඩායමත් සුපිරි කණ්ඩායම් හතර අතරට සුදුසුකම් ලැබී ය. පසුගිය වර ශූරයින් වූ කළමනාකරණ හා මූල්‍ය පීඨ කණ්ඩායම් එලෙස තරගාවලිය ආරම්භයේ දීම ඉවත් වීම බොහෝ දෙනාගේ අවධානය දිනා ගැනීමට සමත් විය.

දක්ෂයින් අතරින් අති දක්ෂයින් සොයා ගිය අවසන් පූර්ව වටයේ තරගවල දී ශාස්ත්‍ර පීඨ-A කණ්ඩායම තරග වට 2-0 ලෙස පරාජය කරමින් විද්‍යා පීඨ කණ්ඩායමත්, UCSC කණ්ඩායම තරග වට 2-1 ලෙස පරාජය කරමින් තාක්ෂණික පීඨ-A කණ්ඩායමත් අවසන් මහා තරගයට සුදුසුකම් ලැබී ය. සමස්ත ලකුණු පුවරුවට ලකුණු තුනක් එකතු කර ගන්නා බලාපොරොත්තුවෙන් ශාස්ත්‍ර පීඨ-A කණ්ඩායම හා UCSC කණ්ඩායම් තරග වැදුණ අතර එහි දී තරග වට 2-1 ලෙස තරඟය ජය ගත් UCSC කණ්ඩායම පිරිමි අංශයේ වොලිබෝල් තෙවන ස්ථානය දිනා ගැනීමට සමත් විය. පිරිමි අංශයේ වොලිබෝල් ශූරතාව තම පීඨය වෙත රැගෙන යන බලාපොරොත්තුවෙන් විද්‍යා පීඨ කණ්ඩායමත්, තාක්ෂණික පීඨ-A කණ්ඩායමත් තරගයට අවතීර්ණ වුවත් එකී බලාපොරොත්තුව යථාර්ථයක් කර ගත හැකි වූයේ තාක්ෂණික පීඨයට පමණයි. ඒ අනුව තරග වට 2-0 ලෙස අවසන් මහා තරගය ජයග්‍රහණය කරමින් කොළඹ සරසවියේ විශිෂ්ටතම නවක වොලිබෝල් කණ්ඩායම බවට පත් වන්නට තාක්ෂණික පීඨ-A කණ්ඩායම සමත් විය. පසුගිය වර සිව්වන ස්ථානයෙන් සෑහීමකට පත් වූ විද්‍යා පීඨය මෙවර අනුශූරයින් ලෙස අබිසෙස් ලැබී ය.

කාන්තා අංශය

පාසල් කරළියේ වොලිබෝල් ශූරියන් මෙන් ම, සරසවියේ දී සිය පීඨයේ හෝ අනුබද්ධිත ආයතනයේ ජයග්‍රහණය වෙනුවෙන් වොලිබෝලයට ජීවය දුන් කෝඩුකාරියන් එකට එක පොකුරට කණ්ඩායම් හැගීමෙන් තරග වැදුණ කාන්තා අංශයේ වොලිබෝල් තරගාවලිය දක්ෂ ක්‍රීඩා තාරකාවන් සොයා ඇදෙන්නට විය. පීඨ හතක් හා අනුබද්ධිත ආයතන දෙකක් නියෝජනය කරමින් කණ්ඩායම් දොළහක සහභාගීත්වයෙන් පැවැත්වුණු තරගාවලිය අප්‍රේල් මස 03 දා දවස පුරා පැවැත්විණි.
කාන්තා අංශයේ තරගය සඳහා ද දේශීය වෛද්‍ය විද්‍යා ආයතන කණ්ඩායමේ සහභාගී නොවීම නිසා කළමනාකරණ හා මූල්‍ය පීඨ කණ්ඩායම නිතරගයෙන් අර්ධ අවසන් පූර්ව වටයට සුදුසුකම් ලබද්දී තරග සටහනේ වාසියෙන් UCSC, නීති පීඨ-B හා ශාස්ත්‍ර පීඨ-B කණ්ඩායම් ද නිතරගයෙන් එම භාග්‍යය ලැබී ය. හෙද පීඨ කණ්ඩායම පරදා තාක්ෂණික පීඨ-A කණ්ඩායමත්, ශ්‍රීපාලි මණ්ඩප කණ්ඩායම පරදා විද්‍යා පීඨ කණ්ඩායමත්, තාක්ෂණික පීඨ-B කණ්ඩායම පරදා වෛද්‍ය පීඨ කණ්ඩායමත්, නීති පීඨ-A කණ්ඩායම පරදා කළමනාකරණ හා මූල්‍ය පීඨ කණ්ඩායමත් මූලික වටයේ ජයග්‍රහණ වාර්තා කරන්නට සමත් විය. අර්ධ අවසන් පූර්ව වටයේ තරඟවල දී UCSC කණ්ඩායම අභිබවමින් තාක්ෂණික පීඨ-A කණ්ඩායමත්, විද්‍යා පීඨ කණ්ඩායම අභිබවමින් ශාස්ත්‍ර පීඨ-A කණ්ඩායමත්, වෛද්‍ය පීඨ කණ්ඩායම අභිබවමින් කළමනාකරණ හා මූල්‍ය පීඨ කණ්ඩායමත්, නීති පීඨ-B කණ්ඩායම අභිබවමින් ශාස්ත්‍ර පීඨ-B කණ්ඩායමත් අවසන් පූර්ව වටයට සුදුසුකම් ලැබී ය. කෙසේ නමුත් විද්‍යා පීඨ කණ්ඩායම හා ශාස්ත්‍ර පීඨ-A කණ්ඩායම අතර තරගය අවසන් මහා තරගයකට නොදෙවෙනි වූ අතර තරග වට තුනක් පුරා ම ජයග්‍රාහී ලකුණත් ඉහළ නංවමින් දෙපසට ම දෝලනය වෙමින් පැවති තරගයක් වූ සේ ම සමස්ත තරගාවලිය පුරාවට එතරම් තියුණු වෙනත් තරගයක් නොවී ය. එලෙස ම පසුගිය වර ශූරියන් වූ නීති පීඨ කණ්ඩායම්වලට මෙවර තරගාවලිය ආරම්භයේ දී ම සිය බලාපොරොත්තු සුන් කර ගැනීමට සිදු වීම විශේෂ සිදුවීමක් විය.

අවසන් පූර්ව වටයේ තරගවල දී කළමනාකරණ හා මූල්‍ය පීඨ කණ්ඩායම තරග වට 2-0 ලෙස පරාජය කරමින් ශාස්ත්‍ර පීඨ-B කණ්ඩායමත්, තාක්ෂණික පීඨ-A කණ්ඩායම තරග වට 2-0 ලෙස පරාජය කරමින් ශාස්ත්‍ර පීඨ-A කණ්ඩායමත් පහසුවෙන් අවසන් මහා තරඟයට සුදුසුකම් ලැබී ය. තරග වට 2-0 ලෙස කළමනාකරණ හා මූල්‍ය පීඨ කණ්ඩායම පරාජය කරමින් තාක්ෂණික පීඨ-A කණ්ඩායම කාන්තා අංශයේ නවක වොලිබෝල් තෙවන ස්ථානය දිනා ගනු ලැබී ය. කෙසේ නමුත් අවසානයේ තරග වට 2-0 ලෙස ශාස්ත්‍ර පීඨ-B කණ්ඩායම පරාජය කරමින් ශාස්ත්‍ර පීඨ-A කණ්ඩායම කාන්තා අංශයේ නවක වොලිබෝල් ශූරියන් ලෙස අබිසෙස් ලැබී ය.
ඒ අනුව කාන්තා පිරිමි දෙඅංශයේ වොලිබෝල් සමස්ත ලකුණු සටහනට අනුව ප්‍රථම ස්ථානය තාක්ෂණික පීඨයටත්, දෙවන ස්ථානය ශාස්ත්‍ර පීඨයටත්, තෙවන ස්ථානය විද්‍යා පීඨයටත් හිමි විය. සිය පීඨයේ හෝ අනුබද්ධිත ආයතනයේ ජයග්‍රහණය වෙනුවෙන් ක්‍රීඩකයින් ක්‍රීඩා පිටියේ සිට තරග වදිද්දී ඔවුන්ට සවියක් වන්නට, දිරියක් දෙන්නට ප්‍රේක්ෂකාගාරය බල මුළු ගැන්වෙන අයුරු දකින්නට ලැබිණි. බොහෝ කැප කිරීම් මැද එලෙස එකම කිරුළක් වෙනුවෙන් දින, සති, මාස ගණන් වෙහෙසෙන, දිනුම පැරදුම සම සිතින් දරන උද්වේගකාරී වන කෝඩුකාරයන්ගේ ක්‍රීඩා සටනේ දිනෙන් දින උණුසුම් වන තරග ප්‍රතිඵල FOS Media වෙතින් බලාපොරොත්තු වන්න…

Image Courtesy : FOS Media

 
Tagged : / /