හරිම ලස්සන ආදරයක්. බලන්නකො, ඒ බැඳීම, ඒ ළෙංගතුකම කොයි තරම් නම් අපූරු ද !
කාසි නැතත් අත පිරෙන්න ඉතුරු වෙලා අපට
රණ්ඩු කරන් කාරිය කිම සෙතක් වේ ද හිතට
මොනව උනත් ආදරෙයිනෙ පණට වැඩිය උඹට
සල්ලි වලට ගත ඇහැකි ද ජීවිතයේ සතුට
මැඳුරු කවුළු ලොකු වාහන සැප පෙනුණත් දුරට
පිටට දැනෙන ළෙංගතුකම එහි නැතිනම් මොකට
වරෙන් මැණික තව ඩිංගක් ආයෙත් මගෙ ළඟට
සල්ලි වලට ගත ඇහැකි ද ජීවිතයේ සතුට
කඳුළු ගැහැට පිළිගමු අපි හිනාවෙවී එකට
ගියා වගෙයි කරවිල වැල පෙමින් කොහොඹ ගහට
තබන තබන හැම පියවර ආදරෙන්ම පෙරට
සල්ලි වලට ගත ඇහැකි ද ජීවිතයේ සතුට
එදා වගෙයි ඔය ලස්සන දිලිසි දිලිසි හැඩට
හම්බුණෙ මට උඹව මගේ පූරුවෙ කළ පිනට
හුස්ම වගේ මං එක්කල හැමදාමත් හොඳට
සල්ලි වලට ගත ඇහැකි ද ජීවිතයේ සතුට
හවස්වෙලා ඉර හැරුණම ගාටමු අද වැවට
කොස් ගෙඩියක් තැම්බුවාම වැඩි නෑ රෑ බතට
මැණිකක් මට හුස්ම දෙද්දි එළිය දිදී පැලට
සල්ලි වලට ගත ඇහැකි ද ජීවිතයේ සතුට
චුට්ටක් අත තද කරලා මිරිකන්න ද නිකට
වැඩ කරලම මහන්සියි ද උඹෙ හුරතල් ඇඟට
අද තියෙනව රහසක් මට කියන්න රෑ මැදට
සල්ලි වලට ගත ඇහැකිද ජීවිතයේ සතුට
Image link: https://bit.ly/3niiFZt