හිරු හිනැහී ලොවට වඩියි
සැම සිත් සොම්නස බෝවෙයි
මුලු රට සිරි අසිරි මැවෙයි
බක් මාසේ මංගල්ලෙයි
එරබදු මල් රත පොරවයි
කජු පුහුලන් පුසුඹ හමයි
බක් මී මනමාලිය වෙයි
සිරි ඉතිරෙන අවුරුද්දයි
අඹ තුරු පෙළ පලින් බරයි
ලෙහෙන් ගිරා තුටුව රඟයි
සියොත් සරින් කන් පිනවෙයි
සිරි ඉතිරෙන අවුරුද්දයි
ගොයම් කරල් රන් පැහැයයි
ගොවි සිත සොම්නස මෝරයි
අටු කොටු අස්වනු බරවෙයි
සිරි ඉතිරෙන අවුරුද්දයි
යොවුනන් සිත තුටු පහටුයි
කෙළි සෙල්ලම් සිනා හැඩයි
නොසතුටු සිත් සැම යාවෙයි
සිරි ඉතිරෙන අවුරුද්දයි
ඔන්චිලි වාරම් කියවෙයි
රබන් සුරල් හඬ රැවුදෙයි
කැවුම් කොකිස් රසය බෙදයි
සිරි ඉතිරෙන අවුරුද්දයි
නැවුම් හැඟුම් සිත් පුබුදයි
වසත් සිරින් කල එළියයි
මුළු රට සව් සිරිය ගෙනෙයි
කිරි ඉතිරෙන අවුරුද්දයි