පාසලම ලස්සනයි හරි හොඳට සරසලා

ස්පීකරුත් ගමේ හැම තැනම එල්ලලා

හැමෝමත් ලස්සනට ඇඳ පැළඳ හැඩවෙලා

පාසලට පිය නගයි ප්‍රසංගය අද තමා

පෝඩියම් නෑ එහේ ලස්සනට සරසන්න

මයික් එක රඳවලා දිරපු රැඳවුමක් උඩ

ප්‍රසංගය ඇරඹෙන්න සුළුම මොහොතයි ඔන්න

සිසුවියක් දිව ඇවිත් පිළිගත්තා අපි සැවොම

විරිඳුවක් කියන්නයි යන්නෙ දැන් ඊළඟට

සිසුවො දෙන්නෙක් ඇවිත් සිට ගත්තා සබා මැද

එක්කෙනෙක් ඇඳ පැළඳ ගෙන හිටිය හරි හොඳට

කැඩුණු පාවහන් දෙස නෙත ගියේ මීළඟට

එක් කෙනෙක් විරිඳුවක් කීවා හරි ලස්සනට

අනිත් එක්කෙනා ආවේ ඔහුගෙ අත් උදව්වට

වචන අමතක නොවී විරිඳුවම කියන්නට

කොළය අල්ලන්නටයි ඔහු ආවෙ සබ මැදට

සැවොම අත්පුඩි ගැහුවා ගැයුව ඒ විරිඳුවට

අවධානෙ ගියේ නම් ගැයුව දරුවට පමණ

අව්‍යාජ සිනහවක් දුටුවා අනෙකාගේ වත

ඔහු සෙමින් බැස ගියා වේදිකාවෙන් ඉවත

අනුන්ගේ සතුටෙ දී හදවතින් සතුටු වන

අනුන් හට ජය ගන්න හදවතින් දිරිය දෙන

බොහෝ විට කාගෙවත් නෙත ගැටීමක් නොවන

ඔහුත් වීරයෙක්මැ’යි මට සිතුණෙ ඒ ලෙසට

Image Link: https://bit.ly/3qwoeCf