සිරිලක ඔසු වරුණ- 1

Share

තුරු ලතා ගැවසුණු අතිශය අලංකාර සහ වටිනා ස්වභාව සෞන්දර්යයකට හිමිකම් කියන්නා වූ දේශයක ඉපදීමට ඔබ මෙන්ම මම ද වාසනාවන්ත වී ඇත්තෙමු. මේ උතුම් භූමිය පුරාවටම ඇති ගස් වැල් විවිධාකාරයෙන් අපට වැදගත් වන බව ඔබත් මමත් දන්නා කාරණයකි.

ශ්‍රී ලංකාවේ වැවෙන සෑම පැළෑටියක්ම ඖෂධයක් බව ද පැවසේ. අතීත හෙළ වෙදකම සම්පූර්ණයෙන්ම පාහේ මෙම තුරු ලතා මත යැපෙන්නක් වූ බව නම් නොරහසකි. මෙම ලිපියෙන් ඔබ වෙත ගෙන ඒමට බලාපොරොත්තු වන්නේ මෙසිරිලක ඖෂධ ගුණයෙන් අනූන පැළෑටි කිහිපයක් පිළිබඳ ඔබව දැනුවත් කිරීමටයි.

අරළු (Terminalia chebula)

ශ්‍රී ලංකාවේ කුරුණෑගල, අනුරාධපුරය ආදී ප්‍රදේශවල වනගතව වැඩෙන මෙම පැළෑටියට සියලු රෝග නැසීමේ ගුණයක් ඇතැයි විශ්වාස කෙරේ. මෙය විෂ්ණු දෙවියන්ගේ උයනෙහි උපත ලැබූ බැවින් එහි ‘විෂ්ණු දෙවියන්ගේ ස්වභාවය දක්නට ඇතැ’යි  තව විශ්වාසයක් පවතී. අරළු ඖෂධයක් ලෙස යොදාගැනීමේදී, එහි ඇට සහ ගෙඩියේ පිට පොත්ත ඉවත් කරයි.

මෙහි ඇති ඖෂධීය ගුණ කිහිපයක් පහත ආකාරයෙන් වේ.

  • ධාරණ ශක්තිය ඇති කරයි
  • ආහාර හොඳින් ජීර්ණය කරයි
  • ශරීර ශක්තිය වඩවයි
  • කුසගිනි වඩවයි
  • මළ බද්ධය, උදර රෝග, වමනය, ඉක්කාව, පණු රෝග, මුත්‍ර රෝග  සුව කරයි
  • ආයුෂ වඩවයි

බුළු (Terminalia bellirica)

ශ්‍රී ලංකාවේ වනාන්තරවල වැවෙන අළු පැහැති ගෙඩි වලින් යුත් තරමක් විශාල ශාකයකි. ඖෂධ ලෙස, බුළු පොතු, ඇට සහ මදය භාවිතා කරයි.

මෙහි ඇති ඖෂධීය ගුණ වලින් බිඳක් පහත ආකාරයෙන් වේ.

  • ආහාර දිරවයි
  • මුත්‍රා සහ මළපහ කිරීම පහසු කරයි.
  • අකලට හිසකෙස් පැසීම වළකයි.
  • හෘද රෝග සහ පණු රෝග නසයි
  • ඇසේ සුද ඇති වීම වළකයි
  • ශුක්‍ර ධාතු ඇති කරයි

තිප්පිලි (Piper longum)

මගධ දේශයේ උපන් “වගපුල්” ලෙස ද ව්‍යවහාර වන තිප්පිලි ,වැල් ආකාරයෙන් පවතින ඉතාම මහාර්ඝ ඖෂධයකි. වර්තමානය වන විට අප රට තුළ කෙමෙන් අභාවයට යන මෙම වටිනා ඔසු පැළය, මෑත කාලයේ සිට ඉන්දියවෙන් ගෙන්වා ගැනීමට සිදුවීම කණගාටුවට කාරණයකි.

1. වාත සහ සෙම් රෝග නැසීම
2. ආහාර දිරවීම පහසු කිරීම
3. කැස්ස, උණ, ආමවාත, අර්ශස් ආදී රෝග නැසීම  තිප්පිලි ශාකය මගින් ලැබිය හැකි ඔසු ගුණ වේ.

කටුවැල් බටු (Solanum jacquini)

අනුරාධපුරය, පොළොන්නරුව මෙන්ම මුහුදු බඩ ප්‍රදේශවල ද බහුලව වැඩෙන, උල් කටු සහිත ශාකයකි.

1.  කැස්ස , සෙම, වාත, පීනස සුව කිරීම
2.  හෘද රෝග සහ පණු රෝග සුව කිරීම මෙම පැළෑටිය සතු ඖෂධීය ගුණාංග වේ.

 

වත්මන් පරපුර හෙළ වෙදකම පිලිබඳ මෙන්ම අප අවට වැවෙන මේ ඔසු පැළෑටි  පිලිබඳ දක්වන්නේ අල්ප ඇල්මක් මෙන්ම ඔවුන් බොහෝ දෙනෙක් ඒ පිළිබඳ අවධානයක් යොමු නොකරයි. එම නිසාවෙන්ම මෙම ලිපියෙන් මෙන්ම තවත් ලිපියකින් අප භූමියේ තුරු ලතාවන් කෙතරම් ඖෂධීය ගුණයෙන් යුතුදැයි විමසා බලමු.

References: ශ්‍රී ලංකාවේ ඖෂධ පැළෑටි- 1- කරුණාරත්න දසනායක

Image Courtesy:

Featured image- https://bit.ly/3ba4ihJ

Content image 1- https://bit.ly/3ce2ofW

Content image 2-https://bit.ly/3bfLOws

Content image 3-https://bit.ly/2K940vq

Content image 4-https://bit.ly/2V6af9Q

 
Tagged : /