විදේශ විශ්වවිද්‍යාලයකට උසස් අධ්‍යාපනය සඳහා අයදුම් කරන්නේ කොහොමද? (How to apply for Higher studies – prepare your passport)

Share

ලංකාවේ කිනම් හෝ විශ්වවිද්‍යාලයක අවුරුදු 3ක් හෝ 4ක් අධ්‍යාපනය හදාරා ඉන්පසු අප ප්‍රධාන වශයෙන් බලාපොරොත්තු වන්නේ හොඳ රැකියාවක් ලබා ගැනීම හෝ උසස් අධ්‍යාපන වරප්‍රසාදයක් ලබා ගැනීමයි. මගේ පෙර ලිපියේ සඳහන් කර ඇති ආකාරයට (එහි දෙවන කොටස මෙය නොවන බව සලකන්න ) මේ දෙකින් කුමක් ඔබ අරමුණු කරගත්තත් එය මේ අවුරුදු 3 හෝ 4 අවසාන වීමට පෙර සැළසුම් කර තිබීම ඉතා ඉක්මන් හා හොඳ තනතුරක් කරා ළඟා වීමට මූලික හේතුවක් වනු ඇති. එමෙන්ම මේ ලිපි පෙළ එම ක්ෂේත්‍රයන්ට අදාල පුද්ගලයින්ගේ උපදෙස් හා ප්‍රතිචාර අනුව නිරන්තරයෙන්ම යාවත්කාලීන කිරීමටද බලාපොරොත්තු වෙන බැවින් මෙහි තිබෙන දෝෂ හා ඔබේ අදහස් මා හට යොමු කිරීමට කාරුණික වන්න. දැනට මේ ලිපිය මගේ අත්දැකීම අනුව පෙළ ගස්වන්නට සිතනවා.

පළමුව ඔබ උපාධි පාඨමාලාව අවසන් කර ඇතත් නැතත් ඔබගේ අරමුණ උසස් අධ්‍යාපනය විදේශයක දී හැදෑරීම නම් ඔබට සිදු කිරීමට අවශ්‍ය කාර්ය්‍යයන් ලැයිස්තුවක් ලෙස ඉදිරිපත් කිරීමට හැකියි. මේ එකිනෙකක් ඉතාම විස්තරාත්මකව ඉදිරිපත් කිරීමට මා බලාපොරොත්තු වන බැවින් ඒ සඳහා ලිපි කිහිපයක් දක්වා මේ ලිපිය දිග හැරීමට මා බලාපොරොත්තු වෙනවා. ඉඩ තිබෙන අයුරින් ඒ ලිපි ඔබ හමුවේ තබන්නම්.

  1. විදේශ ගමන් බලපත්‍රය (passport) සෑදීම.
  2. Transcript එක සහ තාවකාලික උපාධි සහතිකය හෝ නිළ උපාධි සහතිකය ලබා ගැනීම.
  3. GRE සඳහා සූදානම් වීම හා ලියාපදිංචි වීම  (සමහර විට මෙය අවශ්‍ය නොවේ).
  4. TOEFL හෝ IELTS සඳහා සූදානම් වීම හා ලියාපදිංචි වීම  (සමහර විට මෙය අවශ්‍ය නොවේ).
  5. සුදුසු විශ්වවිද්‍යාලයක් (prefered University) හා කැමති විෂය ක්ෂේත්‍රයක් (Preferred course/ research area or program) සොයා ගැනීම.
  6. SoP, LoM, CV, SoCO වැනි ලියකියවිළි සකස් කිරීම.
  7. Supervisor (Prospective principal investigator) කෙනෙකු සොයා ගැනීම  (සමහර විට මෙය අවශ්‍ය නොවේ).
  8. අයදුම් පත සම්පූර්ණ කිරීම සහ අයදුම් ගාස්තු ගෙවීම
  9. නිළ ලියකියවිළි විශ්වවිද්‍යාලයට යැවීම (සමහර විට මෙය අවශ්‍ය නොවේ).
  10. උප්පැන්න ඉංග්‍රීසි භාෂාවට පරිවර්තනය කර ගැනීම.
  11. උසස් පෙළ හා සාමාන්‍ය පෙළ සහතික පත් වීදේශ සේවා කාර්යාලයෙන් සහතික කර ගැනීම  (සමහර විට මෙය අවශ්‍ය නොවේ).
  12. උපාධි සහතිකය විදේශ සේවා කාර්යාලයෙන් සහතික කර ගැනීම  (සමහර විට මෙය අවශ්‍ය නොවේ).
  13. ස්කයිප් සම්මුඛ සාකච්ඡාවකට මුහුණ දීම (සමහර විට මෙය අවශ්‍ය නොවේ).
  14. Recommendations යැවීම.
  15. Financial Documents සකස් කිරීම  (සමහර විට මෙය අවශ්‍ය නොවේ).
  16. වීසා ලබා ගැනීම (අදාල විශ්වවිද්‍යාලයෙන් තෝරා ගත් පසු).

ඉහත ලැයිස්තුවේ සඳහන් කරුණු එකිනෙක විමසා බලමු.

1. විදේශ ගමන් බලපත්‍රය (passport) සකසා ගැනීම

විදේශයක අධ්‍යාපනය ලැබීමට සැළසුම් කර ඇතත් නැතත් මේ පියවර සිදුකර තිබීම ඔබගේ වැඩ කටයුතු වලට පහසුවක් වනු ඇති. විදේශ ගමන් බලපත්‍රයක් සකසා ගැනීමට ක්‍රම දෙකක් ඇති අතර ඒවා සාමාන්‍ය සේවාව හා එක් දින සේවාව වේ. සාමාන්‍ය සේවාවේදී ගාස්තුව අඩු අතර (රුපියල් 3000.00 පමණ ) ඒ සඳහා අවම වශයෙන් සති දෙකක් කාල සීමාවක් ගත වේ. සකස් කරන ලද විදේශ ගමන් බලපත්‍රය තැපැල් මඟින් ඔබ නිවසටම ලැබෙනු ඇත. එක් දින සේවාවේදී ගාස්තුව රුපියල් 10000.00 පමණ වන අතර එක දිනකින් ගමන් බලපත්‍රය සකස් කර ගත හැක.

විදේශ ගමන් බලපත්‍රයක් සකස් කර ගැනීම සඳහා අවශ්‍ය ලියවිලි

  1. නිසි ලෙස පුරවාගන්නා ලද k-35 අයදුම් පත්‍රයක් (මෙය පිරවීමට පෙර මෙම උපදෙස් පත්‍රිකාව ඉතා විමසිල්ලෙන් කියවන්න).
  2.  උප්පැන්න සහතිකයේ මුල් පිටපත හා එහි ඡායා පිටපතක්.
  3. ජාතික හැඳුනුම් පතෙහි මුල් පිටපත හා එහි ඡායා පිටපතක්.
    *වැදගත් – අවශ්‍ය ලියවිලි පිළිබඳ හා අයදුම් පත ඉදිරිපත් කරන ආකාරය ගැන සවිස්තරව ඉහත උපදෙස් පත්‍රිකාවේ සඳහන් වේ.
  4. ඔබගේ රැකියා තත්ත්වය සඳහන් කිරීමට අවශ්‍ය නම් එය තහවුරු කිරීමට අවශ්‍ය ලිපි හා ඒවායේ ඡායා පිටපත්.
  5. බලයලත් චිත්‍රාගාරයකින් (Authorized digital Studio/Colour Lab) ඩිජිටල් ඡායාරූපයක් ලබා ගෙන ඔවුන් විසින් ලබා දෙන කුවිතාන්සිය (acknowledgement note).  (ඔබට මුද්‍රිත ඡායාරුපයක් ලබා නොදෙන අතර ඩිජිටල් ඡායාරූපය කෙළින්ම ආගමන විගමන කාර්යාලය වෙත යොමු කෙරේ). බලයලත් චිත්‍රාගාර වල විස්තර මෙම යොමුවෙන් ලබා ගත හැක.
  6. ඔබගේ ඇඟිලි සලකුණ (මෙය ආගමන විගමන ප්‍රධාන කාර්යාලයේදී හෝ ප්‍රදේශීය කාර්යාල වලදී ඔබට ලබා දිය හැක).

ඉහත සියළු ලිපි ලේඛණ හා අවශ්‍ය මුදල් රැගෙන අයදුම්කරු විසින්ම අනිවාර්යෙන් ප්‍රධාන කාර්යාලයට හෝ ප්‍රදේශීය කාර්යලයකට පැමිණිය යුතුය. මන්දයත් එහිදී ඔබගේ ඇඟිලි සළකුණ ලබාගත යුතු බැවිනි. ආගමන විගමන ප්‍රධාන කාර්යාලය පුංචි බොරැල්ලේ පිහිටා ඇති අතර 103,176,104,171,193,166 යන බස් අංක සහිත බස් රථ මඟින් එහි ළඟා විය හැක. එය නො 41, ආනන්ද රාජකරුණා මාවත, පුංචි බොරැල්ල යන ලිපිනයේ පිහිටා ඇත.

සාමාන්‍යයෙන් ඉතා තදබදයක් පවතින බැවින් උදෑසන 6.30 පමණ වන විටවත් එම ස්ථානයට ලඟා වීමෙන් මුල් අංක කිහිපයෙන් එකක් ලබා ගත හැකිය. කෙසේ නමුත්  රාජකාරී ආරම්භ වන්නේ පෙරවරු 8.30ට බැවින් එතෙක් බලා සිටීමට ඔබට සිදු වේ. එසේ නොවේ නම් උදෑසන 10.30ට පමණ පසු තදබදය මදක් අඩු වූ පසු යෑමෙන් ද වැඩි පමාවකින් තොරව අදාල කටයුත්ත සිදු කර ගත හැකිය. කෙසේ නමුත් හැකි පමණ වේලාසන එහි ළඟා වීම නුවණට හුරුය. සාමාන්‍යයෙන් ඡායාපිටපත් පමණක් නිළධාරීන් ලබා ගන්නා අතර මුල් සහතිකයක් ලබා ගත්තේ නම් එය ගමන් බලපත්‍රය සමඟම තැපෑලෙන් ඔබට ලැබෙනු ඇති.

එසේම ඉතා නිරවද්‍ය ලෙස ඔබගේ විස්තර සඳහන් කිරීම මේ ක්‍රියාවලියේ ඉතාමත්ම වැදගත් කරුණකි. යම් හෙයකින් යම් අත්‍යවශ්‍ය තොරතුරක් වැරදී ගියහොත් එය නිවැරදි කර ගැනීමට ඔබට තවත් නිකරුනේ රස්තියාදු වීමටත් මුදල් වැය කිරීමටත් සිදු වේ. උදාහරණයක් ලෙස ඔබගේ නම ඉතාම සැලකිල්ලෙන් පිරවිය යුතු වේ. සාමාන්‍යයෙන් ශ්‍රී ලාංකිකයෙකුගේ නම ඉතාමත් දිගු බැවින් වාසගම (surname) (Last Name ලෙසද මේ නම හැඳින්වේ) සහ වෙනත් නම් (other names) (given names ලෙසද මේ නම හැඳින්වේ) යන කොටස් සඳහා ඔබගේ නම යොදන ආකාරය පිළිබඳ සැලකිලිමත් වන්න. මන්ද යත් ඉදිරියේදී ඔබගේ අනන්‍යතාවය පෙන්විය හැක්කේ විදේශ ගමන් බලපත්‍රයේ සඳහන් ආකාරයට පමණක් වන බැවිනි. සාමාන්‍යෙන් ලංකාවේදී වාසගම ලෙස යොදා ගැනෙන නම ඇමෙරිකාව වැනි රටක අවසාන නම ලෙස යොදා ගැනීම සිදු වේ. උදාහරණයක් ලෙස ඔබගේ  නම රත්නායක මුදියන්සේලාගේ නුවන් රන්දුල රත්නායක යැයි සිතන්න. එහිදී ඔබගේ වාසගම රත්නායක මුදියන්සේලාගේ ලෙසද වෙනත් නම් සඳහා නුවන් රන්දුල රත්නායක ලෙසද යොදා ගැනීම කළ හැක. නමුත් ඇමරිකාව වැනි රටකදී ඔබගේ නම නුවන් රන්දුල රත්නායක රත්නායක මුදියන්සේලාගේ බවට පත් වේ. එසේම එහිදි ඔබට මුදියන්සේලාගේ ලෙස ද ආමන්ත්‍රණය කිරීම සාමාන්‍ය දෙයකි. මේ පිළිබඳ කුඩා හෝ සැකයක් ඇත්නම් මෙම ආයතනයෙන් ඒ පිළිබඳ විමසිය හැකි යැයි මා සිතන අතර (hotline 1962 or telephone numbers 011 532 9120 / 001 532 9123 ) ඔබගේ නම යොදා ගන්නා ආකරය පිළිබඳ Fullbright ආයතනයෙන් ද පහත දුරකථනය ඔස්සේ සම්බන්ධ වී තොරතුරු දැනගත හැකිය. (0112564176). මෙම ක්‍රියාවලියේ නම ඇතුළත් කිරීම සුවිශේෂී කරුණක් වන අතර එය ඉතා සැළකිල්ලෙන් කළයුතු බවට නැවතත් මතක් කර සිටිනවා.

වසර 10 යනතෙක් ගමන් බලපත්‍රය සුරක්ෂිත කර ගැනීම ඔබගේ වගකීමක් වන අතර එය අස්ථාගනගත වූ විට රුපියල් 13000ක පමණ මුදලක් වැය කර නැවත ගමන් බලපත්‍රයක් ලබා ගත යුතු වේ. සියළු කටයුතු අවසන් කර අවශ්‍ය සියළු ලේඛන භාර දීමෙන් අනතුරුව ආසන්න වශයෙන් සති දෙකක පමණ කාලයක් ගත වන විට ගමන් බලපත්‍රය ඔබේ නිවසට තැපැල් මඟින් ලැබෙනු ඇත.

මේ සඳහා ඔබට වැඩි දුර තොරතුරු පහත යොමු තුළින් ලබා ගත හැක. ඉදිරි පියවරයන් ගැන අප තවත් ලිපියකින් විමසා බලමු.

link 1link 2

තොරතුරු මූලාශ්‍ර: ශ්‍රි ලංකා ආගමන විගමන දෙපාර්තමේන්තු වෙබ් අඩවිය

featured image credit: www.iuemag.com