‘බැඩ්මින්ටන්’ ඉසව්වෙන් ‘අන්තර්පීඨ’ ක්‍රීඩා තරගාවලිය ‘යළි’ ඇරඹුණු වගයි !!

Share

කොළඹ විශ්වවිද්‍යාලයේ ‘වාර්ෂිකව’ පැවැත්වෙන මූලික ක්‍රීඩා විශේෂාංග දෙකකි.ඒ, (fresher’s) ‘නවකයින්ගේ සටන’ සහ  (inter faculty) ‘අන්තර්පීඨ තරගාවලිය’යි. විශ්වවිද්‍යාලයට අලුතින්ම පැමිණෙන විද්‍යාර්ථීන් වෙනුවෙන්, තමන්ගේ ‘පීඨය’ දිනවීම අරමුණු කරගනිමින්, ‘නවක හටන’ පැවැත්වෙන අතර, නියමිත සැලසුමට අනුව එම ඉසව්ව අප්‍රියෙල් අග, නොහොත් මැයි මස මුල වන විට නිමා කිරීමට කටයුතු පිළියෙල කෙරේ. මීට අමතරව (SLUG) අන්තර් විශ්වවිද්‍යාලයීය ක්‍රීඩා උළෙල වසර තුනකට වතාවක් පැවැත්වේ.

මේ සටහනෙන් අප සාකච්ඡා කරනු ලබන, ‘අන්තර්පීඨ තරගාවලිය’ තරමක් වෙනස් මුහුණුවරක් ගනියි. පළමුවසරේ පටන්, සිව්වනවසර දක්වා විශ්වවිද්‍යාලයේ අධ්‍යාපනය ලබන ඕනෑම විද්‍යාර්ථයකු හට තරගාවලිය වෙනුවෙන් ක්‍රීඩා කිරීමට අවස්ථාව ලැබේ. නවක හටනටත් වඩා උණුසුම්, උද්වේගකර ස්වභාවයක් ගැනෙන්නේ ද ඒ නිසාවෙනි.

‘අන්තර්පීඨ තරගාවලිය’ සාමාන්‍යයෙන් වසරාවසානයේ ආරම්භ වන අතර මේ වසරේදී, පසුගිය මාසයකදී ‘මේස පන්දු’ තරග ඉසව්ව සමඟින් ආරම්භ විය.නොවැම්බර් 02 දා  එනම් පසුගිය සෙනසුරාදා ‘බැඩ්මින්ටන් තරග ඉසව්වෙන්’ කාලයක් පුරාවට නිහඬව පැවති තරගාවලිය යළිත් බල ගැන්වුණි. එදින, කොළඹ විශ්වවිද්‍යාලයීය ක්‍රීඩා හපනුන්ට ඉතාමත් කාර්යබහුල දිනයක් විය. අවුරුද්දක කාලයල් මුළුල්ලේ බලා සිටි ඒ සුන්දර දවස, ‘බැඩ්මින්ටන් ඉසව්වෙන්’ පිළිගැනීමට සපැමිණි සහෘද ප්‍රේක්ෂක විද්‍යාර්ථීන්ගෙන්, විශ්වවිද්‍යාලයීය ගෘහස්ථ ක්‍රීඩාංගණය සැරසී තිබුණි.

ඒ අනුව කාන්තා, පිරිමි අංශ දෙක ඔස්සේ තරග වට වෙනවෙනම පැවැත්විණි. නිමාවක් නොමැති, ජයගෝසා නද මධ්‍යයේ, ක්‍රීඩක ක්‍රීඩිකාවන්, ස්වකීය විදු පීඨය වෙත කිරුළ දිනා දීමේ ඒකායන අරමුණින් බොහොම උද්වේගයෙන් යුතුව ක්‍රීඩා කරනු දක්නට ලැබිණි. වේගය,හැකියාව, ක්‍රීඩා කෞශල්‍යය, සහෝදරත්වය එකමිටකට කැටිකරගත් මේ අපූරු තරග ඉසව්ව, මනා සංවිධිත විනිසුරු මඩුල්ලකගේ, පූර්ණ අධීක්ෂණය යටතේ පැවැත්විණි.

අතොරක් නොමැතිව, පිතිපහර ලබමින්, වේදනාවෙන් දෙපසට ඉගිලෙන ‘හුරුබුහුටි කුරුල්ලෙකුගේ’ අවසාන නැවතීම ප්‍රතිවාදී ක්‍රීඩකයාගේ ඉසව්වට ලබා දෙන්නට පිටිය පුරා විදුලි සැරෙන් චලිත වෙමින් කරනු ලබන මේ බැඩ්මින්ටන් ඉසව්ව අතිශයින්ම සිත්ගන්නා සුළු විය.

ඉතාමත් තියුණු තරග වට රාශියකින් පසු, විනිසුරු මඩුල්ලගේ අනුමැතියෙන්, සමස්ත ලකුණු පුවරුව පහත පරිද්දෙන් සටහන් විය.

පිරිමි අංශය

පළමු ස්ථානය – කළමනාකරණ හා මූල්‍ය පීඨය

දෙවන ස්ථානය – විද්‍යා පීඨය

තෙවන ස්ථානය – යූ සී එස් සී

කාන්තා අංශය

පළමු ස්ථානය – වෛද්‍ය පීඨය

දෙවන ස්ථානය – විද්‍යා පීඨය

තෙවන ස්ථානය – යූ සී එස් සී

ඒ අනුව 2019 කොළඹවිද්‍යාලයීය අන්තර්පීඨ ක්‍රීඩා තරගාවලියේ, බැඩ්මින්ටන් ඉසව්වේ පිරිමි අංශයේ ශූරතාවය ‘ කළමනාකරණ හා මූල්‍ය පීඨය’ විසිනුත්, කාන්තා අංශයේ ශූරතාවය ‘වෛද්‍ය පීඨය’ විසිනුත් දිනා ගන්නා ලදියි.

එකම අරමුණක්, එක කිරුළක් වෙනුවෙන් ස්වකීය අධ්‍යයන පීඨය, ලකුණු පුවරුවේ ඉහළින්ම රඳවා තැබීමට සහෝදරත්වයෙන් සටන් වදින, ‘අන්තර්පීඨ තරගාවලියේ’ රසවත් ඉසව්, නිවැරදිව සහ ඉක්මනින්ම දැන ගන්න, එක්වන්න FoS media අප සමඟම…

Image Courtesy : FOS Media

 
Tagged : / /