කැරම් පුවරුවේ සීතල යුද්ධය

Blog Team , 0 Comments

සීතල ඉල් මහ උණුසුම් කරමින් හිරුගේ කිරණ කොළොම්තොට සරසවි බිම වෙත පතිත වූයේ අන්තර් පීඨ තරගාවලිය ආරම්භ කරමිනි. එකම සරසවි මවකගේ විවිධ පීඨ සහ අනුබද්ධිත ආයතනවලට අයත් දූ පුතුන් සිය පීඨය වෙත ජයග්‍රහනයේ කිරුළ රැගෙන යාමේ අභිප්‍රායයෙන් තරඟ බිමට පිවිසියහ.

2019-11-03 වන ඉරුදින පීඨ ගණනාවකට අයත් සරසවි සිසුහු ගෘහස්ථ ක්‍රීඩාගාරය වෙත පිවිසියේ කැරම් පුවරුව මත සිය අණසක පැතිරවීමටය. ඔවුහු තීක්ෂණ දෑසින් යුතුව ඉත්තන් වල වෙත ඉලක්ක කිරීමට සිය අතැඟිලි යුහුසුලුව හසුරවන්නේ මනා ශික්ෂණයෙනි. දැඩි කැපවීමෙන් සහ මනා පුහුණුවෙන් ලබා ගත් දැනුම සහ උපායයන් සියල්ල ඔවුහු කැරම් පුවරුව මත මුදා හරින්නේ අවම වාර ගණනකින් ප්‍රතිවාදී පිලට පෙර ඉත්තන් දසදෙනා වලට දැමීම සඳහාය.

උදෑසන සිට සවස් වන තෙක් තරඟ වැදුනු තරඟ වට ගණනාවක් අවසානයේ කාන්තා අංශයේ අවසන් පූර්ව වටය සඳහා විද්‍යා පීඨය, හෙද පීඨය, කලා පීඨය සහ වෛද්‍ය පීඨය තේරී පත් වූහ.විද්‍යා පීඨය සහ හෙද පීඨය අතර පැවති තරඟයේ ජය විද්‍යා පීඨයට හිමි වූ අතර වෛද්‍ය පීඨය හා කලා පීඨය අතර තරඟය නිම වූයේ වෛද්‍ය පීඨයට ජය හිමි කර දෙමිනි. අන්තර් පීඨ කාන්තා කැරම් කිරුළ උදෙසා විද්‍යා පීඨයේ සහ වෛද්‍ය පීඨයේ ක්‍රීඩිකාවන් සිය අතඟිලි යුහුසුලුව ඉලක්කගත කළ උණුසුම් තරඟය නිමාවට පත් වූයේ විද්‍යා පීඨ ක්‍රීඩිකාවන් ජයග්‍රාහිකාවන් ලෙස අබිසෙස් ගන්වමිනි. වෛද්‍ය පීඨ ක්‍රීඩේකාවන් තරගාවලියේ දෙවන ස්ථානයට හිමිකම් කියූහ.හෙද පීඨ කණ්ඩායම සහ කලා පීඨ කණ්ඩායම තෙවන ස්ථානය සඳහා තරඟ වැදුනු අතර එහි ජයග්‍රහණය තමා සතු කරගත් කලා පීඨ කාන්තා කැරම් කණ්ඩායම තරඟාවලියේ තෙවන ස්ථානයට හිමිකම් කියූහ.

පිරිමි අංශයේ අවසන් පූර්ව වටය සඳහා විද්‍යා පීඨය, කළමණාකරණ පීඨය, කොළඹ විශ්ව විද්‍යාලයීය පරිඝණක අධ්‍යනාංශය සහ කලා පීඨය නියෝජනය කළ කණ්ඩායම් තේරි පත්වූහ. විද්‍යා පීඨ සහ කළමණාකරණ පීඨ කණ්ඩායම  අතර තරඟය විද්‍යා පීඨයට ජය හිමිකර දෙමින් නිමාවූ අතර පරිගණක අධ්‍යනාංශය සහ කලා පීඨ කණ්ඩායම අතර තරඟය නිමවූයේ පරිගණක අධ්‍යනාංශ කණ්ඩායමට ජය හිමිකර දෙමිනි. කිරුළ උදෙසා වූ විද්‍යා පීඨ – පරිගණක අධ්‍යනාංශ තරඟය උණුසුම් මුහුණුවරක් ගත් අතර එය නිමවූයේ විද්‍යා පීඨ කණ්ඩායමට ජය කිරුළු පළඳවමිනි. පරිගණක අධ්‍යනාංශ කණ්ඩායම දෙවන ස්ථානයට හිමිකම් කියූහ. තෙවන ස්ථානය සඳහා කළමණාකරන පීඨ සහ කලා පීඨ කණ්ඩායම් තරඟ වැදුනු අතර එහි ජය කළමණාකරන පීඨය හිමි කර ගත්තේ තෙවන ස්ථානය තමා සතු කරගනිමිනි.

දිනය නිමාවන විට අන්තර්  පීඨ කැරම් තරඟාවලියේ නිමාව සනිටුහන් වූයේ සමස්ථ තරඟාවලියේ ශූරතාවයේ කිරුළ විද්‍යා පීඨයට හිමි කර දෙමිනි.

ජයග්‍රාහක ක්‍රීඩක ක්‍රීඩිකාවන් හට FOS MEDIA අපගේ උණුසුම් සුභ පැතුම්.

Author – Sajini Vindula

Image Courtesy – FOS Media