අධ්‍යාපනය මතින් නව ලෝකයක් කරා…

Share

‘අධ්‍යාපනය’ යන වදනෙන් සරලව ම අදහස් වන්නේ යම් දෙයක් ඉගෙන ගැනීම යි. මව් කුස පිළිසිඳ ගත් දා සිට ම හුස්ම වැටෙන හැම නිමේෂයක ම අලුත් දේවල් අපේ ජීවිතයට එකතු වෙනවා. නව අත්දැකීම් ලබා ගන්නවා. මේ හැමදෙයකින් ම අපි අලුත් දෙයක් ඉගෙන ගැනීම නිරන්තරයෙන් ම අපි දැනුවත් ව හෝ නොදැනුවත්ව ම සිදු වන දෙයක්. ඉන්දීය දාර්ශනිකයෙක්, ලේඛකයෙක් වන ජිද්දු ක්‍රිශ්ණමූර්ති සඳහන් කර ඇති ආකාරයට අධ්‍යාපනයට සීමාවක් සහ අවසානයක් නැහැ. ඒ වගේ ම ඉපදුණු මොහොතේ සිට මිය යන මොහොත දක්වා මුළු ජීවිතය ම ඉගෙනීමේ ක්‍රියාවලියක්.

විශ්වවිද්‍යාල ශිෂ්‍යයන් වශයෙන් ඔබ සියලු දෙනා ම පාසල් අධ්‍යාපනයේ උපරිම ප්‍රතිඵල නෙළා ගත් අය බවට සැකයක් නැහැ. ඒ හේතුව නිසා ම අධ්‍යාපනයේ ඇති වටිනාකම පිළිබඳව ඔබ සියළු දෙනාට ම හොඳ වැටහීමක් තිබෙන බව නොඅනුමානයි.

නමුත් නිසි අධ්‍යාපනයක් ලැබීමේ වැදගත්කම ලෝකවාසී සියළු දෙනා ම දැනුවත් විය යුතු ම දෙයක් ලෙස හැඳින්විය හැකීයි. මෙයට හේතුව වන්නේ පුද්ගලයෙක්ට තම ජීවිතය සාර්ථක කරගන්න නිසි අධ්‍යාපනයක් ලැබීම කියන්නේ එකම ක්‍රමය නොවුණත් කෙටි ම සහ පහසු ම ක්‍රමවේදය ලෙස හඳුන්වන්න හැකියාව තිබෙන නිසා ය.

අධ්‍යාපනයේ ඇති මේ වැදගත්කම නිසා ම එක්සත් ජාතීන්ගේ අධ්‍යාපනික, විද්‍යාත්මක සහ සංස්කෘතික සංවිධානය විසින් සෑම වසරක ම ජනවාරි 24 වන දිනය ‘ජාත්‍යන්තර අධ්‍යාපන දිනය’ වශයෙන් නම් කර තිබෙනවා. මෙහි අරමුණ වී ඇත්තේ අධ්‍යාපනය ලැබීම සඳහා සෑම කෙනෙකුගේ ම අයිතිය තහවුරු කිරීම සහ වඩාත් තිරසර, සාමකාමී අනාගතයක් ගොඩනැගීම උදෙසා අධ්‍යාපනයෙහි පෝෂණය විය යුතු පැතිකඩයන් සහ සිදු විය යුතු පරිවර්තනයන් මුළු මහත් ලෝකයට ම ප්‍රදර්ශනය කිරීමයි.

ජාත්‍යන්තර අධ්‍යාපන දින සැමරුමේ ඉතිහාසය සැලකීමේ දී, 2018 දෙසැම්බර් 03 වන දින එක්සත් ජාතීන්ගේ මහා මණ්ඩලය විසින් සාමය සහ සංවර්ධනය සඳහා අධ්‍යාපනයේ කාර්යභාරය සැමරීම සඳහා සෑම වසරක ම ජනවාරි 24 වන දිනය ජාත්‍යන්තර අධ්‍යාපන දිනය ලෙස ප්‍රකාශයට පත් කිරීමේ යෝජනාවක් සම්මත කරගන්නා ලදි. ඉන් අනතුරු ව 2019 ජනවාරි 24 වන දින ප්‍රථම වතාවට ජාත්‍යන්තර අධ්‍යාපන දිනය සමරනු ලැබුවා.

කෙසේ නමුත් මේ වන විට එක්සත් ජාතීන්ගේ සංවිධානයේ පණිවිඩය ලොව පුරා ප්‍රචාරය වෙමින් පවතින අතර ඔවුන්ගේ යහපත් සහ අවංක ප්‍රයත්නයන් ලොව පුරා සුභවාදී සහ යහපත් ප්‍රතිඵල ද පෙන්නුම් කර තිබීම සතුටට කරුණක්.

ඉතින් ජාත්‍යන්තර අධ්‍යාපන දිනය සමරන අද දවසේ අධ්‍යාපනයෙන් ඔබ සියළු දෙනාගේ ම ජීවිත ආලෝකමත් කර ගන්නා අතරේ අධ්‍යාපනයේ වටිනාකම පිළිබඳ එක්සත් ජාතීන්ගේ සංවිධානයේ පණිවිඩය ලොව පුරා ප්‍රචලිත කිරීමෙහිලා ඔබගේ කාර්යභාරය නොපිරිහෙලා ඉටු කරන මෙන් ඉල්ලා සිටිමු.

 

Written By: Chamudi Senevirathna

 

References:

Image Links:

 

 
Tagged : /