අන්තර් විශ්වවිද්‍යාලයීය ක්‍රීඩා තරගාවලියේ ක්‍රිකට් ශුරතාවය දිනාගැනීමට කොළඹ විශ්වවිද්‍යාලයීය කණ්ඩායම සමත්විනි. ඒ මොරටුව විශ්වවිද්‍යාලය සමඟ පැවති අවසන් මහා තරගයේ කඩුලු 4 විශිෂ්ට ජයක් වාර්තා කරමිනි. අවසන් මහා තරගය කැළණිය විශ්වවිද්‍යාලයීය ක්‍රිඩාංගනයේ දී පැවත්විනි.

තරගයේ කාසිය වාසිය දිනු කොළඹ විශ්වවිද්‍යාලයීය කණ්ඩායමේ ආරාධනයෙන් ප්‍රථමයෙන් පන්දුවට පහරදුන් මොරටුව විශ්වවිද්‍යාලයීය කණ්ඩායමේ සමස්ත ලකුණු පුවරුව පන්දුවාර 50 අවසානයේ සියල්ලන් දැවී ලකුණු 185 ක ට සීමා කිරීමට කොළඹ විශ්වවිද්‍යාලයීය පන්දු යවන්නන් සමත්විය.

මොරටු ඉනිමේ මුල් පෙළ පිතිකරුවන් අඩු ලකුණු සංඛ්‍යාවකට දැවී යද්දී හිරුෂ බලපිටිය පන්දු 91 ක් තුළ ලකුණු 70ක් ලබා ගන්නේ මොරටු ක්‍රීඩා ලෝලීන්ගේ ගිලිහී ගිය බලාපොරොත්තුවට යම් ජිවයක් ලබා දෙමිනි. පන්දු යැවීමේදී විශිෂ්ට පන්දු යැවීමක නිරත වු සහන් විජේසිංහ කඩුලු 3 ක්ද නවිඳු පෙරේරා කඩුලු 2ක්ද දවා ගැනීමට සමත්විය.

ලකුණු 186 ජයග්‍රාහී ඉලක්කයක් හඹා යෑමට පිටියට පිවිසි කොළඹ විශ්වවිද්‍යාලයීය කණ්ඩායම පන්දු වාර 32 ක දී පන්දු 5 ක් තුළ කඩුලු 6 ක් දැවී ලකුණු 188 ක් ලබා ගනිමින් 2018 අන්තර් විශ්වවිද්‍යාලයීය ක්‍රිකට් සමස්ත ශුරතාවය දිනා ගැනිමට සමත්විය. උදිප්ත බාලසූරිය පන්දු 50 ක් තුළ නොදැවී ලකුණු 52 ක්ද උදේෂ් සැන්දනායක පන්දු 42 ක් තුළ ලකුණු 46ක් ලබා ගනිමින් කොළඹ විශ්වවිද්‍යාලයීය ලකුණු පුවරුව ඉහළ නැංවිය. පන්දු යැවීමේදී මොරටු කණ්ඩායම වෙනුවෙන් චන්දුල වැලිවිට කඩුලු 2ක් ලබා ගැනීමට සමත්විය.

මෙවර අන්තර් විශ්වවිද්‍යාලයීය ක්‍රිකට් ශුරතාවය දිනු කොළඹ විශ්වවිද්‍යාලයීය කණ්ඩායමට FOS Media අපි සුභාශිංසන එක් කර සිටිමු.

Image Courtesy : FOSMedia