අලි ගහන මහා මූකලාන, කරකුට්ටන් වෙච්චි වැලි පොළොව, ආසාවට බස් එකක් !! ඒක නම් හීනයක්, ඕං ඔය වගෙ, බොහොම දුෂ්කර පළාතක පුංචි ඉස්කෝලයක, අහිංසක පැංචො වෙනුවෙන් ආපු……
‘චූටි ටීච’, හරිම වාසනාවන්ත, පින්වන්ත , බොහොම ආදර්ශවත් ගුරුවරියක්, එයාගේ කතාවේ පොඩි කොටසක් තමයි මේ….
අරුණි ලු නම පොඩි කෙල්ලට
හරිම හපනි සංගීතෙට
දිනන ලකුණු ඉස්සරහට
කලින්ම පෙනුණා
නොකඩවාම උසස්පෙළට
ඉගෙන ගත්තු නිසා හොඳට
වන්දනීය ගුරු සේවෙට
වරමක් පිදුණා
සමු දීලා අම්මලාට
තුරුල් කරන් ජීවිතයට
පත්වීමක් ගම්මානෙට
ලියමන ලැබුණා
පෙම් බැඳලා මනු සුවඳට
හැඩ ගැහුණා විග විගහට
ගමේ පුංචි ඉස්කෝලෙට
එළියක් වැටුණා
දිසපාමොක් ගුරු කුලයට
ගරු සරු තුති ගී ඇසෙනට
කලට වෙලාවට අකුරට
සේවය සැදුණා
විවේකයක් ලද මොහොතට
වැවට පන්සලට කුඹුරට
ගමේ පහස ගැමි සිරිතට
උරුමය තිබුණා
සිනහ සපිරි කතා බහට
සිත සනසන රූ සිරියට
තරුණ රුවැති ගුරු තුමියට
කුමරෙක් බැඳුණා
විදුර සර් විද්යාවට
තමයි හිටියෙ ඉස්කෝලෙට
වැදගත් ගතිගුණ දෝතට
හොඳටම වෙලුණා
බඹා නළලෙ කෙටු විදියට
මව්පිය ආසිරි සතුටට
සර් ටීච පැතු නැකතට
හුයකින් බැඳුණා
දෙපළම එක අරමුණකට
සිප් නැණ මල් පුබුදන්නට
ඉස්කෝලය දිනවන්නට
කටයුතු කෙරුණා
Image Courtesy :https://bit.ly/2vyYsGJ