කෝඩුකාරයින්ගේ ප්‍රවේශය…

Share

සරසවි කෝඩුකාරයන් වූ අප සැමට අපගේම තාලයට වැයෙන්නට ඉඩ හසර වෙන්වී ඇත. නවකයින්ගේ ක්‍රීඩා උළෙල ආරම්භ වන්නට ඇත්තේ තව දින කිහිපයකි. අපේම පවුලක් ලෙස එකම අරමුණකින් එකට එක්ව ගමන් කරන්නට කාලය එළඹ ඇත. සරසවියේ මතක පොත සරි කරන්නට, මතකයන් ගොන්නකට හිමිකම් කියන්නට පිපාසිත බවක් දැන් දැන් සිත් තුළ මෝදු වන්නේ අපටත් රහසේය. බලන බලන අත පෙනෙන උද්යෝගිමත් පෙර පුහුණුව මතින් හැඟීම් මෝදු වන්නට පටන් ගෙන ඇති සෙයක් දිස්වේ. සහෝදර බැම්මට මුසු වූ අහිංසක බලාපොරොත්තුවක් මුදුන් පමුණුවනු වස් මේ කැප කරන්නේ අපගේ සුන්දරතම, ජවසම්පන්නම හෝරාවන් වේ. හද පිරි සතුටකින් විජයග්‍රහණය සමරන්නට ඇති වූ නවමු බලාපොරොත්තුවකින් ආශාවකින් අප සියලු දෙනාම දැන් පිපාසිත ය.

කරට කර තරඟ වදින්නට සියලු පීඨයන් සහභාගි වන බව අපි දනිමු. එසේ නම් හොඳින් එකිනෙකා පරයා නැඟෙන්නට අවැසි ජවය සපුරා ගැනීම කෙසේ හෝ කළ යුතුය. විසි එක් වසරක් ගෙවා නිම කළ ඒ අපූරු පෙර පාසල් සමය සහ තරඟකාරී පාසල් දිවියේ කිසි දිනක අත නො ගැසූ, අත ගසන්නට බලාපොරොත්තු නොවූ ක්‍රීඩාවන්ගෙන් දැන් අපගේ දිවියම පිරී ඇත්තේ අනපේක්ෂිතව ය. එක් විටෙක සිතෙනුයේ මෙය කරන්නට බැරි බවකි. නමුත් එසැනින් සිහියට නැගෙන්නේ අපගේම සහෝදර සහෝදරියන්ය. ඔවුන්ගේ බලාපොරොත්තුය. අපගේ අයියලා අක්කලාගේ අපේක්ෂාවන්ය. අප මෙම ක්‍රීඩා උළෙලේ විජයග්‍රහණය ලබනවා දකින්නට ඔවුන් මහත් වූ ආශාවකින් , ලෝභකමකින් , උවමනාවකින් බලාපොරොත්තු වන බව ඔවුන්ගේ වදන් වලින් නොව නිර්ව්‍යාජ නෙත් ප්‍රකාශනයන්ද සාක්ෂි දරයි. අප මෙම විජයග්‍රහණයේ මීළඟ උරුමකරුවෝය. එවන් වූ උරුමයක් අප මඟ හරින්නේ කෙසේ ද? මෙම තෙලි තුඩින් ලිවිය හැකි දේ සීමිත නමුදු හදේ හැඟීම් පිරී ඇත. අපේම කැපවීම මැදින් කෙසේ හෝ නවකයින්ගේ කිරුළ අවැසියයි සිතන්න, අපගේ උරුමය පැහැර ගන්නට ඉඩ දිය හැකි ද? මේ අපේ පිටිය යි. අපගේ කාලයයි.

සරන්නට අවැසි සරසවි බිම තුළ කාලය පැමිණ ඇත. එන්න එකට එක්ව  එක් කුසලානයකට හිමිකම් කියන්නට. සොයුරු බැම්මට අරුතක් දෙන්නට.

මේ කෝඩුකාරයින්ගේ කාලයයි. විජයග්‍රහණයෙන් අරඹමු!

 

 
Tagged :