සතුටින් ජීවත් වෙන්න… අපි හැම කෙනෙක්ගෙම හිතේ තියන බලාපොරොත්තුවක්. බොහොමයක් දෙනා ඇත්තටම හදවතින් සතුටු වෙලා තියෙන්නෙ ජිවිතේටම ගණන් කරන්න පුළුවන් තරම් වතාවක්. ඒකට හේතුව මිනිසුන්ගෙ හිත් වල පැල පදියම් වෙලා තියන කුහකත්වය ඉරිසියාව වගේ නොහික්මුණ සිතිවිලි.

මට හැඟෙන විදියට මේ ලෝකෙ 99% ක් මිනිස්සුන්ට තව කෙනෙක්ගෙ යහපත දැකල සතුටු වෙන්න බෑ. එහෙම කරන්න පුළුවන් 1% තමයි ඇත්තටම ජීවිතය විඳින මිනිස්සු. අනිත් අය කරන්නෙ ජීවිතය විදවන එක.

එයාට තියනව මට නෑනේ එයාට පුළුවන් මට බෑනේ කියල හැමවෙලාවෙම සංසන්දනය කරමින් හිතින් විදවන එක නෙවෙයි ඇත්තටම අපි කරන්න ඕන. අපිට කරන්න පුළුවන් මොනවද කියල හිතල ඒ දේ කරල සතුටු වෙන්න පුළුවන් නම්, අපිට මොනවද තියෙන්නෙ කියල හිතල සතුටු වෙන්න පුළුවන් නම් ඇත්තටම අපිට විදවන්න හේතුවක් නෑ.

අපිට නැති තව කෙනෙක්ට තියන දේවල් නෙවෙයි අපි ලබාගන්න ඕන, ඇත්තටම අපේ ජීවිතේට අවශ්‍ය කරන දෙය ලබාගන්නයි අපි උත්සාහ කරන්න ඕන. හරියට ඉන්න ගෙයක්වත් නැති කෙනෙක් තව කෙනෙක් ලඟ හොඳ සුඛෝපභෝගී වාහනයක් තියනව දැක්කම ඊට වැඩිය හොඳ වාහනයක් ගන්න හිතෙනව නම් එයාට ජීවිතේ විඳින්න නොහැකි වෙනවා.

ගොඩක් විදවන මිනිස්සු කරන්නෙ ජීවිතේ විඳින මිනිස්සු දිහා බලාගෙන හූල්ලන එක ඔවුන්ගෙ වැරදි අඩුපාඩු හොයන එක. තමන්ට ඒ විදියට ජීවිතේ විඳින්න නොහැකි වීමේ වේදනාව ඔවුන් ඒ විදියට යටපත් කරල දාන්න උත්සාහ කරනවා. ඒත් ඇත්තටම එතන තිබෙන්නෙ විදවීමක්ම පමණයි.

ජීවත් වෙන්න තමන්ගෙ හිතට එකඟව. හරි වැරදි කියන දේ එකිනෙකාට සාපේක්ෂයි. කෙනෙක් නිවැරදි ලෙස දකින දෙයක් තවත් කෙනෙකුට වැරදි දෙයක් ලෙස හිතෙන්න පුළුවන්. ඔබ නිතරම ඔබට ගැලපෙන නිවැරදි දෙය කිරීමට උත්සාහ කරන්න.

ඔබේ ජීවිතය පිළිබඳව තීරණ හැකි පමණ ඔබම සිතා බලා තනිව තීරණය කරන්න. ඒ තීරණ වලින් කිසියම් හානියක් සිදු වූ ඇති වන පසුතැවීම සාපේක්ෂව අඩුය. වෙන කෙනෙකු කියූ පමණින් ඔබේ ජීවිතය පිළිබඳ ගන්නා තීරණයක් වැරදුණහොත් පසුතැවීම සාපේක්ෂව වැඩිය. ඉන්පසු ඔබ කරන්නේ තීරණය ගැනීමට උපදෙස් දුන් කෙනාට මෙන්ම තමන්ට ද දෝෂාරෝපණය කරමින් දුක් වීමයි. තමන් ගන්නා තීරණ වල වගකීම තමන්ගේය. ඒවාට වෙනත් වගකිවයුතු පාර්ශවයන් නැත. කාලය විසින් ඔබ ඔබේ ජීවිතය පිළිබඳ දක්ෂ තීරකයකු කරනු නිසැකය.

එකිනෙකා ජීවිතය විඳින්න තෝරාගන්න මාර්ගයන් විවිධ යි. ඒත් සතයක්වත් වියදම් නොකර තමන්ගෙ ජීවිතය විඳින්න පුළුවන් කියල බොහොමයක් දෙනා දන්නෙ නැහැ. ඔවුන් විශාල මුදල් නාස්තියක් කරනවා. ඒත් සමහර වෙලාවට අවසානය විදවීමක්.

ඔබට සුන්දර සිනහවක් ලැබිල තියනව නේද? හුරුවෙන්න හදවතින්ම හිනාවෙන්න. හිත් වලට සතුට බෙදන්න. ඒක පට්ට. හුරුවෙන්න අනුන්ගෙ දුකකදි වචනෙකින් හරි උදව්වක් කරන්න. ඒක පට්ට. සමහරවිට ඔබ දක්වන ඒ කරුණාව කෙනෙක්ගේ ජීවිතය වෙනස් කරන්නත් පුළුවන්. හුරුවෙන්න තව කෙනෙක්ගෙ සතුට දැකලා හදවතින්ම සතුටු වෙන්න. ඒක පට්ට. හුරුවෙන්න තමන්ගෙ ජීවිතේ දේවල් අනිත් අයගෙ ජීවිත එක්ක සංසන්දනය නොකරන්න. ඒක පට්ට. හුරුවෙන්න ජීවිතේ විදවන්නෙ නැතුව විඳින්න. ඒක නම් පට්ටම පට්ට.

ජීවිතය ඇතුලෙ ජීවිතය සෙවීම වෙනම කලාවක්. එකිනෙකාට අනන්‍යය වූ වෙනස් හැඩතලයන් ජීවිතේ තුල දකින්නට පුළුවන්. ජීවිතය විඳින්න අපි අපිවම සොයාගත යුතුයි. තව කෙනකු තුලින් තමන්ව සෙවීමට යාම නිසා ජීවිත ගමන තුල අප අතරමං විය හැකියි. තවම මම ද ජීවිතය සොයන්නෙමි, නමුත් ජීවිතය විඳින්නට හුරු වෙමින් සිටිමි. විදවන ජීවිත වලට ජය✌(විඳින ජීවිත ජය ගෙන අවසන්ය.❤️)

Image Courtesy : https://bit.ly/2GI5qvS